ރާއްޖޭގެ ސިއްހީ ނިޒާމު ހަރުދަނާ ކޮށް، ރައްޔިތުން ބޭނުންވާ ރަނގަޅު ފެންވަރުގެ ސިއްހީ ޚިދުމަތެއް ފޯރުކޮށްދިނުމަކީ މިސަރުކާރުގެ އެއް އަމާޒެވެ. ރައީސް ޑރ.މުހައްމަދު މުއިއްޒު ވެރިކަމަށް ވަޑައިގެންނެވީ ވެސް ސިއްހީ ޚިދުމަތްފުޅާކޮށް، އާސަންދަ ޚިދުމަތް ވެސް ތައިލޭންޑާއި ޔޫއޭއީން ހަމަޖައްސައިދޭނެ ކަމުގެ ވައުދުފުޅާއެކު އެވެ. ނަމަވެސް މި ވައުދުފުޅު ވެސް ބިލާހަކަށް މީގެ ކުރިން އާސަންދަ ލިބުނު ބޭރުގެ ހޮސްޕިޓަލްތަކުން ވަނީ އާސަންދަ ކަނޑާލާފައެވެ.

މި ސަރުކާރު އައުމުގެ ކުރިން އެއްވެސް ތަކުލީފަކާ ނުލައި ލިބެމުންދިޔަ އާސަންދަ ޚިދުމަތް ހޯދުމަށް މިއަދު ރައްޔިތުން ވަނީ އާދޭސް ކުރަންޖެހިފައެވެ. ގިނަ ބޭސްތައް ނުލިބޭއިރު، ޑޮކްޓަރަށް ދެއްކުމަށްފަހު ބިލުގެ ބޮޑުބަޔަކަށް ފައިސާ ދައްކަންޖެހެއެވެ.

ކަންމިހެން އޮތްއިރު، ފައިސާ ދައްކައިގެން ވެސް ރަނގަޅު ފަރުވާއެއް ނުލިބޭ ކަމުގެ ޝަކުވާ ވަނީ ބޮޑުވެފައެވެ. އޭޕްރީލް މަހުގެ ތެރޭގައި އެކަނި ސިއްހީ އިހުމާލުން ބައެއް ފުރާނަތައް ގެއްލި، ބައެއް މީހުން އިތުރަށް ނުރައްކަލަކަށް ހުށަހެޅިފައިވާ ކަމަށް ތުހުމަތުތައް ކޮށްފައިވެއެވެ.

އެގޮތުން ގެމަނަފުށީގެ ސިއްހީ މަރުކަޒުގެ އިހުމާލުން ހަތް މަހުގެ ތުއްތު ކުއްޖެއް މަރުވި މައްސަލަ ފެންމަތިވެފައިވާއިރު، ހދ. މަކުނުދޫގައި ފިހުނު ތުއްތު ކުއްޖަކަށް އިހުމާލުވެ، އެކުއްޖާގެ ހާލު ސީރިއަސްވިއެވެ. އަދި ހޯރަފުށީ ސިއްހީ މަރުކަޒުން 9 މަހުގެ ކުޑަ ކުއްޖެއްގެ ގަޔަށް 18 މަހުގައި ޖަހަން ޖެހޭ ވެކްސިން އެއް ޖަހާފައިވާއިރު، ހދ ނެއްލައިދޫ ސިއްހީ މަރުކަޒަށް ގެންދިޔަ ތުއްތު ކުއްޖަކަށް މުއްދަތު ހަމަވެފައިވާ ހުރި އައިވީ އެއް ދިން މައްސަލައެއް ވަނީ ފެންމަތިވެފައެވެ.

މިފަދަ މައްސަލަތައް ފެންމަތިވުމާއެކު އަބަދުވެސް އެމައްސަލަތައް ބަލާ ކަމަށް ހެލްތް މިނިސްޓްރީން ބުނެއެވެ. އަދި އިހުމާލުވާ ފަރާތްތަކާމެދު ފިޔަވަޅު އަޅާކަމަށް ވެސް އެމިނިސްޓްރީން ބުނެއެވެ. ނަމަވެސް އިތުރު ތަފްސީލެއް ނުވަތަ އެޅި ފިޔަވަޅެއް ހެލްތް މިނިސްޓްރީން ހާމައެއް ނުކުރެއެވެ.

މާލެސިޓީގެ އިތުރުން އަތޮޅުތެރޭގެ ސިއްހީ މަރުކަޒުތަކާއި، ހޮސްޕިޓަލްތަކުގެ ފެންވަރު ރަނގަޅު ކުރުމަށް ގިނަ މަސައްކަތްތައް ކުރަމުންދާ ކަމަށް ސަރުކާރުން ބުނެއެވެ. ހޮސްޕިޓަލްތަކުގައި ޚިދުމަތްތައް ފުޅާކުރާ ނަމުގައި ޓާޝަރީ ފެންވަރަށް ބަދަލުކޮށް ބައެއް ހޮސްޕިޓަލްތަކުގެ ނަންތައް ވެސް ބަދަލުކޮށްފައިވެއެވެ.

ނަމަވެސް ޓާޝަރީ ފެންވަރުގެ އެއްވެސް ޚިދުމަތެއް މާލެ ސަރަހައްދުގައި ސަރުކާރުގެ އެއްވެސް ހޮސްޕިޓަލަކުން ނުލިބެއެވެ. އެންމެ ގިނަ މީހުން އާބާދުވަމުންދާ ހުޅުމާލޭގައި ހުރި ހުޅުމާލޭގެ ހޮސްޕިޓަލުން ވެސް ބޮޑެތި ބަލިތަކަށް ހަދާ ޓެސްޓުތަކާއި، ސްކޭންތައް ނުހެދެއެވެ.

މީގެ އިތުރުން ސިއްހީ ޚިދުމަތްފުޅާ ކުރާކަމަށް ބުނެ، އެއާ އެމްބިއުލާންސްއާއި، ސީ އެމްބިއުލާންސް ހަމަ ޖައްސާފައިވާކަން ސަރުކާރުން ބުނެއެވެ. ނަމަވެސް ކުއްލި ހާލަތެއް މެދުވެރިވެގެން ސީ އެމްބިއުލާންސް ނުވަތަ އެއަރ އެމްބިއުލާންސްއަށް އެދުމުން އެ ޚިދުމަތް ނުލިބޭ ކަމުގެ ޝަކުވާ ބޮޑެވެ. އަދި އަވަސް ފަރުވާ ދިނުމަށް މާލެ ގެންނަންޖެހޭއިރު، އެ ޚިދުމަތް ހަމަޖެއްސުމުގައި ވަރަށް ބޮޑަށް ލަސްވާ ކަމަށް ވެސް އާއްމު ރައްޔިތުން ބުނެއެވެ.

އެގޮތުން ފެބްރުއަރީ މަހުގެ ތެރޭގައި ގއ. ވިލިނގިލީގައި ދެމައިން މަރުވީ ވެސް ހޮސްޕިޓަލުގައި ވެސް އެއަރ އެމްބިއުލާންސްގައި ވެސް ފަރުވާ ދެވޭނެ ގޮތެއް ނެތިގެން ކަމަށް އެއާއިލާއިން ބުނެފައިވެއެވެ. އެއަރ އެމްބިއުލާންސް ހަމަޖެހުނީ ވެސް ވަރަށް ލަހުން ކަމަށް އާއިލާއިން ބުނެފައިވެއެވެ. މި މައްސަލާ ވެސް ސީރިއަސް މައްސަލައެއްގެ ގޮތުގައި ތަހުގީގު ކުރަމުންދާ ކަމަށް އެދުވަސްކޮޅު ސަރުކާރުން ބުނި ނަމަވެސް މިއަދާ ހަމައަށް ތަހުގީގު ގޮސްފައިވާ ހިސާބެއް ހާމަ ކޮށްފައިނުވެއެވެ.

ރައީސް މުއިއްޒު ވެރިކަމާ ހަވާލުވެވަޑައިގެންނެވީ ޒަމާނުއްސުރެ އިހުމާލުވެފައިވާ ކަމަށް ބުނާ ސިއްހީ ނިޒާމު އައު ހަރުފަތަކަށް ގެންދިއުމަށެވެ. ނަމަވެސް މިސަރުކާރުގައި އިތުރަށް މި ނިޒާމު ފެއިލްވެ، ބަންދު ދުވަހެއް އަތުވެއްޖެނަމަ ސިއްހީ ޚިދުމަތްތަކުގައި ބޮޑު ތަޅުއަޅުވާ ކަމަށް އާއްމުންދަނީ ބުނަމުންނެވެ. އަދި މީގެ ކުރިން ވެސް ލިބުނު ޚިދުމަތްތައް ނުލިބި، ރައްޔިތުން ބޭހަށް ސަލާން ޖަހާ ސަގާފަތް އިޔާދަވަމުންނެވެ. ހަމައެކަނި އޭޕްރީލް މަހުގެ ތެރޭގައި ވެސް ސިއްހީ އިހުމާލުން ގިނަ ހާދިސާތަކެއް ހިނގާފައިވާ ކަމަށް އެ އާއިލާތަކުން ތުހުމަތު ކޮށްފައިވާއިރު، ރާއްޖޭއިން ސިއްހީ ފަރުވާ ހޯދަން ވެސް ރައްޔިތުން މިއަދު ޖެހެލުންވެއެވެ.