ދިވެހި ޕްރިމިއާ ލީގު: ދަގަނޑޭގެ ލަނޑުތަކާ އެކު މާޅޮސްގެ މައްޗަށް ނިއު ކުރިހޯދައިފި

އުރީދޫ ދިވެހި ޕްރިމިއާ ލީގުގައި އަލީ އަޝްފާގް (ދަގަނޑޭ) ގެ ލަނޑުތަކާ އެކު މާޅޮސްގެ މައްޗަށް ނިއުރޭޑިއަންޓް ސްޕޯޓްސް ކްލަބް ކުރިހޯދައިފި އެވެ.

ބުރާސްފަތި ދުވަހުގެ ރޭ ކުޅުނު މެޗު މާޅޮހާ ވާދަކޮށް ނިއު އިން މެޗު ކާމިޔާބުކުރީ 0-3 އިންނެވެ.

ގަލޮޅު ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ ނިއު އެވެ. އެގޮތުން އެޓީމުން ވަނީ މާޅޮސްގެ ހާފަށް ބާރުބޮޑުކޮށް ލަނޑު ޖެހުމަށް ގިނަ ފުރުސަތުތަކެއް ހޯދާފައެވެ.

ނިއު އިން މެޗުގެ ލީޑު ނެގީ 28 ވަނަ މިނެޓުގައި ދަގަނޑޭ ކާމިޔާބުކުރި ލަނޑަކުންނެވެ. މި ލަނޑު އޭނާ ކާމިޔާބުކުރީ އަހުމަދު އަބްދުﷲ (ލިލީ) ނަގައިދިން ހުރަހަކުން ބޮލުންނެވެ. އޭގެ މިނެޓެއް ފަހުން މާޅޮހުގެ ޑިފެންސް ލައިނުން ހެދި ގޯހެއްގެ ފައިދާ ނަގާ ނިއު އިން ވަނީ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ އަލީ ފާސިރު (ސެންޓޭ) އެވެ.

ފުރަތަމަ ހާފް ނިމުނީ 0-2 ގެ ނަތީޖާއިން މާޅޮސްގެ މައްޗަށް ނިއު ކުރިހޯދައިގެންނެވެ.

ދެވަނަ ހާފް ފެށިގެން ވެސް މޮޅަށް ކުޅުނީ ނިއު އެވެ. އެގޮތުން ލަނޑު ޖަހަން އެޓީމުން ވަނީ ގިނަ ފުރުސަތަކެއް ތަނަވަސްކޮށްފައެވެ. ނިއު އިން ތިންވަނަ ލަނޑު ކާމިޔާބުކުރީ 61 ވަނަ މިނެޓުގައެވެ. މި ލަނޑު ވެސް އެޓީމަށް ކާމިޔާބުކޮށްދިނީ ދަގަނޑޭ އެވެ. ދަގަނަޑޭ އަށް ވަނީ މެޗުގައި ހެޓްރިކް ހެދުމަށް ވެސް ފުރުސަތެއް ލިބި ބޭކާރުވެފައެވެ.

މި ނަތީޖާއާ އެކު ނިއު އޮތީ ނުވަ ޕޮއިންޓާއެކު ލަނޑުގެ ތަފާތުން ދެވަނައިގައެވެ. އެއްވަނައިގައި އޮތީ 10 ޕޮއިންޓާއެކު މާލޭ ލީގުގެ ޗެމްޕިއަން މާޒިޔާ އެވެ.