ދުސްތޫރީ އެއްވެސް މައްސަލައެއް ނުބެލޭގޮތަށް ސްޕްރީމް ކޯޓު އޮންނަތާ ދޮޅުމަސްވެއްޖެ: މީކާއިލް
ދުސްތޫރީ އެއްވެސް މައްސަލައެއް ނުބެލޭގޮތަށް މިވަގުތު ދިވެހިރާއްޖޭގެ އެންމެ މަތީ ފަނޑިޔާރުގެ ކަމުގައިވާ ސްޕްރީމް ކޯޓު އޮންނަތާ ދޮޅުމަސް ދުވަސް ވެއްޖެ
މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް އަޙުމަދު ނަސީމް ރާއްޖެ ޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަނީ
ދުސްތޫރީ އެއްވެސް މައްސަލައެއް ނުބެލޭގޮތަށް މިވަގުތު ދިވެހިރާއްޖޭގެ އެންމެ މަތީ ފަނޑިޔާރުގެ ކަމުގައިވާ ސްޕްރީމް ކޯޓު އޮންނަތާ ދޮޅުމަސް ދުވަސް ވެއްޖެ ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ވިދާޅުވެއްޖެ އެވެ.
މީކާއިލް ނަސީމް މިފަދައިން ވިދާޅުވީ ރާއްޖެ ޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުންނެވެ.
ރައީސް މުއިއްޒުގެ މި ސަރުކާރުގައި ދައުލަތެއްގެ ސިފަ މިހާރު ގެއްލިގެން ގޮސްފައިވާ ކަމަށް ގިނަ ބަޔަކު އަންނަނީ ބުނަމުންނެވެ. އެގޮތުން ރައްޔިތުންގެ މަޖިލީހުގެ އެއްވެސް ޖަލްސާއެއް ވެސް ނުބޭއްވި މަޖިލީހުގެ މަސައްކަތްތައް ހުއްޓިފައި އޮތުމާއި ޖުޑިޝަރީގެ ފަނޑިޔާރުން ސަސްޕެންޑް ކޮށް، ކޯޓުގައި ތުސްތޫރީ މައްސަލަތައް ނުބެލި އެތަކެއް ދުވަސްތަކެއް ފާއިތުވެގެން ދިއުންފަދަ ކަންކަމަކީ މިކަމުގެ އަލިގަދަ ހެއްކެއްގެ ގޮތުގައި ގިނަ ބަޔަކު އަންނަނީ ފާހަގަކުރަމުންނެއެވެ.
ސްޕްރީމް ކޯޓުގެ ފަނޑިޔާރުން ސަސްޕެންޑް ކޮށް، އެ ކޯޓުގައި މައްސަލައެއް ނުބެލި ދޮޅުމަސް ދުވަސް ވެފައިވާކަން ފާހަގަކޮށް މީކާއިލް ވިދާޅުވީ ރައީސް މުއިއްޒު ގެންދަވަނީ ދައުލަތުގެ ބާރުތައް އަމިއްލަ ކޮށް، މުށުތެރެއަށް ލައިގެން ޚުދުމުހުތާރު ވެރިކަމެއް ކުރެއްވުމަށް މަސައްކަތް ކުރައްވަމުން ކަމަށެވެ.
މީކާއިލް ވިދާޅުވީ ރާއްޖޭގެ ސްޕްރީމް ކޯޓު ރައީސްގެ މުށުތެރެއަށް ލައްވައިގެން ބޭނުންހާ ގޮތަކަށް ކަންކަން ކުރައްވަމުން ގެންދަވާއިރު، އުއްތަމަ ފަނޑިޔާރު ވެސް ހުންނެވީ ހަނު ކަމަށާއި މިފަދަ ކަންކަން ހިގަމުން ދާއިރުގައި އުއްތަމަ ފަނޑިޔާރު އެއްޗެއް ވިދާޅުނުވެ ހަނު ހުންނެވުމަކީ ކަންބޮޑުވާކަމެއް ކަމަށެވެ.
މީކާއިލް ވިދާޅުވީ އުއްތަމަ ފަނޑިޔާރަކީ ރާއްޖޭގެ ހުރިހާ ކޯޓުތަކެއް ޝާމިލްވާ ގޮތަށް އޮތް ރާއްޖޭގެ ފަނޑިޔާރުގޭގެ އިސްވެރިޔާ ކަމަށާއި އެހެންކަމުން އެއްބާރުން އަނެއްބާރަކަށް، ވެރިކަން ކުރާ ބާރުން ފަނޑިޔާރުގެ އަށް އަރައިގަންނައިރު، އޭގެ އެންމެ އިސްވެރިޔާ ހަނުހުންނެވުމަކީ ބަލައިގަނެވޭނޭ ކަމެއް ނޫންކަމަށެވެ.
މިއީ ކުރިންވެސް އަޅުގަނޑު ފާހަގަކުރަމުން އަންނަ ކަމެއް. އަދި މިއަދުވެސް މިކަން ފާހަގަކުރަމުން މި އަންނަނީ. މިއަދުވެސް އަޅުގަނޑަށް ހަމަ ޤަބޫލު ކުރެވެނީ ކުރިއަށް ލިބެން އޮންނަ ދެއްތޯ..؟ ރިޓަޔަމެންޓުގައި ކުރިއަށް ލިބެން އޮންނަ އިމްތިޔާޒުތަކާއި ލިބެން އޮންނަ ބެނެފިޓް ތަކެއްގެ އުންމީދުތަކެއްގައި މިހާރު ތިމަން މަނިކުފާނު ހަވާލުވެ ހުންނެވި އިނގޭތޯ.. މުޅި މުއައްސަސާ ފުނޑާލަމުން ދާއިރު ހަނުހުންނަވާ ކަމަށް ވާނަމަ ތިމަން މަނިކުފާނުގެ އިންޓަގްރިޓީއާއި މެދު ގައިވެސް ރައްޔިތުން ސުވާލު އުފައްދާނެ ކަމަށް އެމަނިކުފާނު ވެސް ވިސްނަން ޖެހޭރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް ނަސީމް
މީކާއިލް ވިދާޅުވީ ސްޕްރީމް ކޯޓު އޮތީ ވައުކޮށްލާފައި ކަމަށާއި މިވަގުތު ސްޕްރީމް ކޯޓުން ތުސްތޫރީ އެއްވެސް މައްސަލައެއް ނުބެލި އޮންނަތާ ހަމަހަށް ވުރެ ގިނަ ދުވަސްވެފައިވާ ކަމަށެވެ.
އަދި ސްޕްރީމް ކޯޓު ވާކޮށްލީމައި ވެރިކަން ކުރާ ފަރާތްތަކަށް ދެން ވިސްނިފައި އޮންނަނީ ދެން ހުރި ދައުލަތުގެ ހުރިހާ ބާރަކީ ވެސް ހިތުހުރި ގޮތަކަށް ކުޅެލުމުގެ ފުރުސަތު ލިބިފައި ބާރުތަކެއް ކަމަށެވެ. އަދި ރައްޔިތުންގެ މަޖިލީހުގައި ޖަަލްސާއެއްހައި މިންވަރުވެސް މިހާރު ނުބޭއްވުމަކީ ވެސް މިކަމުގެ ހެއްކެއް ކަމަށް މީކާއިލް ވިދާޅުވިއެވެ.
