ޣައްޒާ އަކީ މީހުން މަރާ މައިދާނަކަށް ހަދައިފި - ގުޓަރޭޒް

ޣައްޒާ އަކީ މީހުން މަރާ މައިދާނަކަށް ބަދަލުވެފައިވާ ކަމަށް އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ވިދާޅުވެއްޖެއެވެ.

އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ވިދާޅުވީ ޣައްޒާ އަކީ "މީހުން މެރުމުގެ މައިދާނަކަށް" ވެފައިވާ ކަމަށާއި، އިސްރާއީލުން އެހީ އަށް ހުރަސް އެޅުމާއި ފަލަސްތީނުގެ ސަރަހައްދުގެ ރައްޔިތުންގެ ބޭނުންތައް ފުއްދައިދިނުމުގައި އިސްރާއީލުން އަދާކުރަންޖެހޭ "ދެފުށް ފެންނަ ވާޖިބުތައް" އަދާނުކުރާ ކަމަށެވެ.

ޣައްޒާއަށް އެހީ ގެނައުމެއް ނެތި މުޅި މަހަށްވުރެ ގިނަ ދުވަސް ފާއިތުވެއްޖެކަން ފާހަގަކުރައްވާ ގުޓަރޭޒް ވިދާޅުވީ ޣައްޒާގައި ކާނެ އެއްޗެއްސާއި ތެލާއި، ބޭހެއް ވެސް ނެތް ކަމަށެވެ. އަދި ކޮމާޝަލް ސަޕްލައިއެއް ނެތް އިރު، އެހީ ތައް ހުސްވާން ފަށާފައިވާއިރު، ބިރުވެރިކަމުގެ ދޮރުތައް އަނެއްކާވެސް ހުޅުވިއްޖެ ކަމަށް ނޫސްވެރިންނާ ވާހަކަ ދައްކަވަމުން ގުޓަރޭޒް ވިދާޅުވި އެވެ.

ހަނގުރާމައިގައި އުޅޭ މީހުންނަށް ފަރުވާދިނުމާ ބެހޭ ޖެނީވާ މުއާހަދާތަކަށް އިޝާރާތް ކުރައްވައި، އާބާދީއަށް ބޭނުންވާ ކާބޯތަކެއްޗާއި ބޭސްފަރުވާއަށް ބޭނުންވާ ސާމާނު ފޯރުކޮށްދިނުމަކީ ތަނެއް ހިސޯރުކޯށްގެން އުޅޭ ބާރެއްގެ މައްޗަށް ލާޒިމްވާ ކަމެއް ކަމަށް ވިދާޅުވި އެވެ. ނަމަވެސް އެއިން އެއްވެސް ކަމެއް މިއަދު ނުހިނގާ ކަމަށާއި، ޣައްޒާއަށް އިންސާނީ އެއްވެސް ސާމާނެއް ނުވަދެވޭ ކަމަށް އޭނާ ވިދާޅުވި އެވެ.

ނިއުޔޯކްގައި ހުންނަ އދ.ގެ މައި މަރުކަޒުގައި ނޫސްވެރިންނާ ވާހަކަ ދައްކަވަމުން ގުޓެރޭޒް ވިދާޅުވީ، އިޒްރޭލުގެ ކަމާބެހޭ ފަރާތްތަކުން އެހީ ފޯރުކޮށްދިނުމަށް އަލަށް ހުށަހަޅާފައިވާ "އޮތޮރައިޒޭޝަން މެކޭނިޒަމްސް" ގެ ސަބަބުން އެހީތައް ހިފަހައްޓާ ހަރުކަށި ފިޔަވަޅުތައް އަޅާފައިވާ ކަމަށެވެ.

ޣައްޒާއަށް ދޭ އެހީ ތައް ކޮންޓްރޯލް ކުރުމާ ގުޅޭ ގޮތުން އިސްރާއީލުން ދާދި ފަހުން ހުށަހެޅި ހުށަހެޅުންތަކަށް އިޝާރާތް ކުރައްވާ އދ.ގެ މަސްދަރަކުން އޭއެފްޕީއަށް މައުލޫމާތު ދެއްވަމުން ވިދާޅުވީ ހަމާސް ޖަމާއަތުން އެހީތައް ނަހަމަ ގޮތުގައި ބޭނުން ކުރުން ހުއްޓުވުމަށް ގައްޒާއަށް އެތެރެކުރާ ކާނާގެ ކެލެރީ ވެސް މޮނިޓަރ ކުރަމުން އަންނަ ކަމަށެވެ.

އިންސާނިއްޔަތާއި އަދުލުވެރިކަމާއި މިނިވަންކަމާއި ވަކިކޮޅަކަށް ނުޖެހުން ފަދަ އިންސާނީ އުޞޫލުތަކަށް ފުރިހަމައަށް އިހުތިރާމް ނުކުރާ އެއްވެސް އިންތިޒާމެއްގައި ބައިވެރިނުވާނެ ކަމަށް ގުޓަރޭޒް ވިދާޅުވެފައިވާ އިރު، ހުއްޓުމެއް ނެތި އެހީ ވަންނާނެ ކަމުގެ ޔަގީންކަން ދިނުމަށް އޭނާ ގޮވާލެއްވި އެވެ.

ހުޅަނގު އައްސޭރީގެ ހާލަތާ މެދު ނުރައްކަލުގެ ރަނގަބީލު ގުޓެރޭޒް ވަނީ ޖައްސަވާފައެވެ. ގުޓަރޭޒް ވިދާޅުވީ މިހާރު މި އޮތް މަގު މަރުވެފައިވާ ކަމަށާއި، މިއީ ބައިނަލްއަގްވާމީ ގާނޫނުތަކާއި ތާރީޚަށް ބަލާއިރު ވެސް ކެތްނުކުރެވޭ ވަރުގެ މަގެއް ކަމަށެވެ.

އަދި ހިފާފައިވާ ހުޅަނގު އައްސޭރި އެހެން ޣައްޒާއަކަށް ބަދަލުވުމުގެ ނުރައްކާ އިތުރަށް ގޯސްވެގެންދާ ކަމަށް ގުޓަރޭޒް އިންޒާރު ދެއްވިއެވެ. މިއީ އިންސާނިއްޔަތާ ހިލާފު އަމަލުތައް ނިމުމަކަށް ގެނެސް، އާންމުން ހިމާޔަތްކޮށް، އަސީރުން ދޫކޮށްލުމާއި، ފުރާނަ ސަލާމަތްކޮށްދޭ އެހީތެރިކަން ކަށަވަރުކޮށް، ހަނގުރާމަ ހުއްޓާލުމުގެ ކަންކަން އައު ކުރުމަށް ގުޓަރޭޒް ވަނީ ގޮވާލައްވާފައެވެ.