ސޫރިޔާގެ ރައީސް އަލް-ޝަރާ އައު އިންތިޤާލީ ސަރުކާރެއް އުފައްދަވައިފި

ސޫރިޔާގެ ރައީސް އަޙްމަދު އަލް-ޝަރާ އައު އިންތިޤާލީ ސަރުކާރެއް އިޢުލާނުކުރައްވައިފިއެވެ.

ސޫރިޔާގެ ރައީސް އަޙްމަދު އަލް-ޝަރާ އައު އިންތިޤާލީ ސަރުކާރުގެ ފުޅާ ކެބިނެޓަކަށް 23 ވަޒީރުން ޢައްޔަން ކުރެއްވިއެވެ.

ސޫރިޔާގެ އައު ކަމާބެހޭ ފަރާތްތަކަށް ހުޅަނގާއި އަރަބި ގައުމުތަކުގެ ޕްރެޝަރު ބޮޑުވެފައި ވަނީ އެ ގައުމުގެ ތަފާތު ނަސްލުތަކާއި ދީނީ މުޖުތަމައުތައް ހިމެނޭ ގޮތަށް ސަރުކާރެއް އެކުލަވާލުމަށެވެ.

އެ ޕްރެޝަރު ބޮޑުވީ ސީރިއާގެ ހުޅަނގު އައްސޭރިފަށުގައި މި މަހު ހިނގި ހަމަނުޖެހުންތަކުގައި އަލަވީގެ އެތައް ސަތޭކަ އާންމުން މަރާލުމާ ގުޅިގެންނެވެ.

ކެބިނެޓްގައި ޓްރާންސްޕޯޓް މިނިސްޓަރުކަމަށް އައްޔަން ކުރެއްވި އަލަވީ ބޭފުޅެއް ކަމަށްވާ ޔަރޫބް ބަދުރު ހިމެނިވަޑައިގަންނަވާއިރު، އެގްރިކަލްޗާ މިނިސްޓްރީގެ އިސްވެރިޔަކަށް ހުންނާނީ ޑްރޫޒް ކޮމިއުނިޓީއަށް ނިސްބަތްވާ އަމްގަދު ބަދުރު އެވެ.

ކްރިސްޓިއަން އަންހެނެއް ކަމަށްވާ އަދި އިންޓަފެއިތު ޓޮލަރެންސް އާއި އަންހެނުން ބާރުވެރިކުރުވުމަށް މަސައްކަތް ކުރެއްވި އަސަދާ އިދިކޮޅަށް ކުރިން ދެކޮޅު ހެއްދެވި ހިންދު ކަބާވަތު ވަނީ ސޯޝަލް އެފެއާޒް އެންޑް ލޭބާ މިނިސްޓަރުގެ މަގާމަށް އައްޔަންކޮށްފަ އެވެ.

ފިނޭންސް މިނިސްޓަރުގެ މަގާމަށް އައްޔަން ކުރެއްވީ މުހައްމަދު ޔޯސްރު ބާނިއްޔާ އެވެ.

އޭގެ ތެރޭގައި މިދިޔަ ޑިސެމްބަރު މަހު ހަނގުރާމަވެރިންގެ ބަޑީގެ ހަމަލާއެއްގައި އަލް އަސަދުގެ ވެރިކަން ވައްޓާލި ފަހުން ސީރިއާގައި ވެރިކަން ކުރަމުން އައި ކުރީގެ ކެއާޓޭކަރު ކެބިނެޓުގައި ކުރިން ވެސް ޑިފެންސް އަދި ހާރިޖީ ވަޒީރުކަން ކުރައްވަމުން ގެންދަވާ މުރުހަފް އަބޫ ކަސްރާ އާއި އަސްއަދު އަލް ޝިބާނީ ތިއްބެވި އެވެ.

މީގެ އިތުރުން އަލްޝާރާ ވިދާޅުވީ ފުރަތަމަ ފަހަރަށް ކުޅިވަރާ ބެހޭ ވުޒާރާއަކާއި އިމަޖެންސީ ހާލަތްތަކަށް ހާއްސަ ވުޒާރާއެއް އުފައްދަވާ، ވައިޓް ހެލްމެޓްސް ނަމަކަށް ކިޔާ ރެސްކިއު ގްރޫޕެއްގެ ވެރިޔާ ރާއިދު އަލް ސާލިހް އިމަޖެންސީ މިނިސްޓަރުގެ މަގާމަށް ހަމަޖެއްސެވި ކަމަށެވެ.

މިދިޔަ ޖެނުއަރީ މަހުގެ ތެރޭގައި އަލް ޝަރާ އިންތިގާލީ ރައީސަކަށް ހަމަޖެއްސެވި އިރު، ސީރިއާގެ ހަލާކުވެފައިވާ ދައުލަތުގެ މުއައްސަސާތައް ބިނާކޮށް، އިންތިހާބާ ހަމައަށް ގައުމު ހިންގޭނެ އިންތިގާލީ ސަރުކާރެއް އެކުލަވައިލާނެ ކަމަށް އޭނާ ވަނީ ވައުދުވެވަޑައިގެންފަ އެވެ.

ސަރުކާރުގެ ބޮޑުވަޒީރަކު ނުހުންނާނެ ކަމަށާއި އެގްޒެކެޓިވް ބްރާންޗުގެ އެންމެ އިސްކޮށް ހުންނަވާނީ އަލް ޝަރާ ކަމަށް ބެލެވެ އެވެ.

މިމަހުގެ ކުރީކޮޅު ސޫރިޔާއިން ވަނީ އަލްޝަރާ އިސްވެ ހުންނަވައިގެން އިންތިޤާލީ މުއްދަތުގެ ބިންގަލެއްގެ ގޮތުގައި މަސައްކަތްކުރުމަށް އެކުލަވާލާފައިވާ ދުސްތޫރީ އިއުލާނެއް ނެރެފައެވެ. އެ އިއުލާނުގައި އިސްލާމީ ޝަރީޢަތުގެ މައިގަނޑު ދައުރެއް ހިފަހައްޓައި، އަންހެނުންގެ ޙައްޤުތަކާއި ޚިޔާލުފާޅުކުރުމުގެ މިނިވަންކަން ކަށަވަރުކޮށްދީފައިވެއެވެ.