ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ކްލަބް އިވެންޓްސްއާ ގުޅިގެން ކުރިއަށްގެންދާ އެފްއޭއެމް ވެޓަރަންސް ލީގުގެ ތަށި ޖެހިޖެހިގެން ހަތަރު ވަނަ ފަހަރަށް ހުޅުމާލެ ވެޓަރަންސް އިން ހޯދައިފި އެވެ.

ހުޅުމާލެ ވެޓެރަންސް ޗެމްޕިއަންކަން ހޯދީ ބުރާސްފަތި ދުވަހު ހަވީރު ކުޅުނު ފައިނަލް މެޗުގައި 2-0 އިން ވިލިމާލެ ޔުނައިޓެޑް ބަލިކޮށްގެންނެވެ.

މީގެ ކުރިން އެ ޓީމުން ވެޓެރަންސްގެ ޗެމްޕިއަން ކަން ހޯދާފައި ވަނީ 2022، 2023 އަދި 2024 ވަނަ އަހަރު ގައެވެ.

މި މެޗުގައި ހުޅުމާލެ ވެޓެރަންސް ލީޑު ނެގި ލަނޑު ޖަހައިދިނީ އަހުމަދު މުހައްމަދު (އަންމަޑޭ) ނަގައިދިން ހިލޭޖެހުން ބޮލުން ފޮނުވާލައިގެން އަލީ ރިޝްވާން އަހުމަދެވެ. ލީޑު ފުޅާ ކުރި ލަނޑު ޖަހައިދިނީ ފަރުހާދު އިސްމާއިލް (ފަރޭ) އެވެ

މި ދެ ޓީމު ގްރޫޕް ސްޓޭޖުގައި ކުޅުނު މެޗުން ވިލިމާލެ ޔުނައިޓެޑް މޮޅުވި ނަމަވެސް، ފައިނަލުގައި ކާމިޔާބު ހޯދީ ހުޅުމާލެ ވެޓަރަންސް އެވެ.

ބުރާސްފަތި ދުވަހު ނިމުނު ވެޓެރަންސް ލީގުގެ އެންމެ ގިނަ ލަޑު ޖެހި ކުޅުންތެރިޔާގެ މަގާމާއި އެންމެ މޮޅު ކުޅުންތެރިޔާގެ މަގާމު ހޯދީ ހުޅުމާލެ ވެޓެރަންސްގެ ހުސައިން ޝިމާޒް (ކޮކީ) އެވެ. އަދި އެންމެ މޮޅު ގޯލްކީޕަރަކަށް ހޮވުނީ ވިލިމާލެ ޔުނައިޓެޑުގެ މުހައްމަދު ސިނާން (ނާނި) އެވެ. އަދި އެންމެ މޮޅު ކޯޗުގެ މަގާމު ހޯދީ ހުޅުމާލޭގެ ކޯޗު އަބްދުﷲ ޝިފާއު އެވެ. އަދި، މުބާރާތުގެ ފެއާ ޕްލޭ ޓީމަކީ ޕޮލިސް ކްލަބެވެ.

ކުރީގެ ކުޅުންތެރިންނަށް އަމާޒު ކޮށްގެން ބާއްވާ މި މުބާރާތުގައި މިފަހަރު ވެސް 10 ޓީމު ބައިވެރިވި އެވެ.