މުއިވެޔޮ އިން އީގަލްސް ބަލި ކުރި މެޗުގެ މޮޅު ކުޅުންތެރިޔަކަށް ނައިބު ރައީސް

މިހާރު ކުރިއަށްދާ، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ވެޓަރަންސް ލީގުގައި ކުލަބު އީގަލްސްއާ ދެކޮޅަށް ކުޅުނު މެޗު މުއިވެޔޮ މޮޅުވެއްޖެ އެވެ.

މާފަންނު ޓާފު ދަނޑުގައި އާދީއްތަ ދުވަހުގެ ހަވީރު ކުޅުނު މެޗު މުއިވެޔޮ އިން ކާމިޔާބު ކުރީ 5-0 އިންނެވެ. މެޗުގެ ފުރަތަމަ ހާފުގައި މުއިވެޔޮ އިން ދެ ލަނޑު ޖެހިއިރު، އަނެއް ތިން ލަނޑު އެ ޓީމުން ޖެހީ ފަހު ހާފުގަ އެވެ.

މެޗުގެ ފަސް ވަނަ މިނެޓުގައި މުއިވެޔޮ އަށް ލީޑު ނަގައިދިނީ ޢަބްދުﷲ ޝުޖާއު އެވެ. އޭގެ ތިން މިނެޓު ފަހުން އޭނާ ވަނީ އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

މެޗުގެ 37 ވަނަ މިނެޓުގައި އަޙުމަދު ނިޔާޒް ވަނީ މުއިވެޔޮގެ ތިން ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެެ ޓީމުގެ ހަތަރު ވަނަ ލަނޑު އިބްރާހީމް ފުރުގާން ޖެހީ 42 ވަނަ މިނެޓުގަ އެވެ.

މެޗުގައި މުއިވެޔޮގެ ފަސް ވަނަ ލަނޑު 58 ވަނަ މިނެޓުގައި ޖެހީ ރައީސުލުލްޖުމްހޫރިއްޔާގެ ނައިބު އަލްއުސްތާޛް ޙުސެއިން މުޙައްމަދު ލަޠީފް އެވެ. މެޗުގެ މޮޅު ކުޅުންތެރިޔަކަށް ހޮވުނީ ވެސް، މުއިވެޔޮގެ ކެޕްޓަންކަން ވެސް ކުރައްވަމުން އަންނަ ނައިބު ރައީސް އެވެ.

މިއަހަރުގެ ވެޓަރަންސް ލީގު ކުރިއަށް ދާނީ މި މަހުގެ 27 ވަނަ ދުވަހުގެ ނިޔަލަށެވެ. މިއަހަރުގެ މުބާރާތުގައި ޖުމުލަ 10 ޓީމަކުން ބައިވެރިވެ އެވެ.

މުބާރާތް ކުރިއަށް ގެންދަނީ ދެ ގުރޫޕަކަށް ބަހާލައިގެންނެވެ. އެގޮތުން ގުރޫޕު އޭގައި އޮތީ ދިވެހި ސިފައިންގެ ކުލަބު، ވިލިމާލެ ޔުނައިޓެޑު، ހުޅުމާލޭ ވެޓަރަންސް ކުލަބު، ޒެލޮޓް އަދި ހުއްރިއްޔާ އެވެ. ގުރޫޕު ބީ ގައި ހިމެނެނީ ޕޮލިސް ކުލަބު، ސްޓެލްކޯ، ކުލަބު އީގަލްސް، މުއިވެޔޮ އަދި ދަ ގްރާންޑޭ އެވެ.