ކައުންސިލް އަތުން އޮޅުހިޔާ ނެގުމަށްފަހު، މާލެސިޓީގައި އުޅޭ ބުޅާތައް މަރުވެ، މަގުތައް ނަޖިސް ކުރުމަށް ވަނީ ދޫކޮށްލާފައި: މޭޔަރު އާޒިމް
މިއީ މާލެ ސިޓީގެ ރައްޔިތުންނަށް ދެވޭ ވަރަށް ބޮޑު އަނިޔާއެއް
މާލެސިޓީ ކައުންސިލްގެ ނޫސްވެރިންގެ ބައްދަލުވުމެއްގައި މޭޔަރު އާދަމް އާޒިމް ވާހަކަ ދައްކަވަނީ
ބުޅާ ބެލެހެއްޓުމަށް ތަރައްގީކޮށްފައިވާ "އޮޅުހިޔާ" ކައުންސިލް އަތުން ސަރުކާރުން އަތުލުމަށްފަހު ބުޅާތައް މަގުމަޗަށް މަރުވެ، މަގުތަށް ނަޖިސްކުރަން ދޫކޮށްލާފައިވާ ކަމަށް މާލެސިޓީގެ މޭޔަރު އާދަމް އާޒިމް ވިދާޅުވެއްޖެ އެވެ.
މި މައްސަލައާ ގުޅިގެން ކަންބޮޑުވުންފާޅު ކުރައްވައި އާޒިމް ވިދާޅުވީ ބުޅާތައް ގެންދިއުމަށް ކައުންސިލުން ވަރަށް ބުރަ މަސައްކަތްތަކެއް ކުރި ކަމަށާއި، ބޮޑު އަގުގައި ހަރަދުކޮށްގެން މާލޭ ސިޓީގެ ރައްޔިތުންނަށް ޓަކައި ހެދި ބުޅާ ފެސިލިޓީ ކައުންސިލް އަތުން ސަރުކާރުން އަތުލުމަށްފަހު ބުޅާތައް އެތަނަށް ނުގެން ގޮސް މަގުމައްޗަށް މާރުވާން ދޫކޮށްލާފައިވާ ކަމަށެވެ. އަދި މަގުތަށް ވެސް ނަޖިސްކުރަން ބުޅާތަށް ދޫކޮށްލާފައިވާ ކަމަށް އާޒިމް ވިދާޅުވިއެވެ.
މިއީ ހިތާމަކުރައްވާ ކަމެއްކަން ފާހަގަކުރައްވައި އާޒިމް ވިދާޅުވީ މިއީ މާލެ ސިޓީގެ ރައްޔިތުންނަށް ދެވޭ ވަރަށް ބޮޑު އަނިޔާއެއް ކަމަށެވެ. އަދި ބުޅާތަށް މަރުވެ މަގުތަށް ނަޖިސްވަމުން އަންނާތީ ބުޅާތަކުގެ ކިބައިން ބަލިތަކެއް ފެންނަމުން އަންނަ ކަމަށާއި ރައްޔިތުން ބުޅަލުގެ ނަޖިސްތެރޭގައި ހިނގާބިގާވެ، ކޮންމެ ދުވަހަކުވެސް އުޅެންޖެހޭ ކަމަށް އާޒިމް ވިދާޅުވިއެވެ.
މީގެ އިތުރުން އާޒިމް ވިދާޅުވީ މޫދު ކައިރީގައި އުޅޭ ކުދިންނާއި އަދި މޫދަށް އެރޭ އެކި އުމުރު ފުރައިގެ މީހުން ކޮންމެ ދުވަހަކު ބުޅަލުގެ ނަޖިސްތެރޭގައި އުޅެން ޖެހިފައިވާ ކަމަށެވެ. އެހެން ކަމުން މަގުތަކުގައި ތިބި ބުޅާތައް އަވަހަށް ބުޅާ ފެސިލިޓީއަށް ގެންދިއުމަށް ވެސް މޭޔަރ އާޒިމް ވަނީ ދިރޭތަކެއްޗާ ބެހޭ ވުޒާރާގެ ކިބައިން އެދިވަޑައިގެންފައެވެ.
މާލެ ސިޓީ ކައުންސިލްގެ އަތުން ސަރުކާރުން ބުޅާ ފެސިލިޓީގެ ތަޅުދަނޑި އަތުލާފައިވަނީ ނިމިދިޔަ ފެބްރުއަރީ މަހުގެ 26 ވަނަ ދުވަހުގެ ހަވީރުގެ ވަގުތެއްގަ އެވެ.
ހުޅުމާލޭގެ ދެ ވަނަ ފިޔަވަހީގައި ގާއިމް ކޮށްފައިވާ މި ބުޅާ ފެސިލިޓީ އަކީ ފަސްހާސް އަކަފޫޓޫ ބޮޑު ފެސިލިޓީއެކެވެ. އެތަނުގައި ބުޅާތައް ކަރަންޓީނު ކުރާނެ ސަރަހައްދަކާއި ކްލިނިކަކާއި ލެބޯޓްރީއެއްގެ އިތުރުން ބުޅާތަކަށް ދޭން ޖެހޭ ބޭސްތައް ބަހައްޓާނެ ފާމަސީއަކާއި އެ ބުޅާތަށް އުޅޭނެ ރަނގަޅު ފެންވަރެއްގެ ސަރަހައްދެއް ވެސް ކައުންސިލުން ވަނީ ތަރައްގީ ކޮށްފަ އެވެ.
