ގައުމީ ސަލާމަތާއި ގުޅުންހުރި އޮޕަރޭޝަނުގައި ހައްޔަރުކުރި މީހުންގެ ތަފްސީލެއް ފުލުހުން ހާމަ ނުކުރި
މި އޮޕަރޭޝަނުގައި 3 މީހުން ހައްޔަރުކޮށް 4 ތަނެއް ބަލައި ފާސްކޮށްފައިވޭ
ފުލުހުންނާއި ސިފައިން ގުޅިގެން ކުރިއަށްގެންދިޔަ ގައުމީ ސަލާމަތާއި ގުޅުންހުރި ހާއްސަ އޮޕަރޭޝަނުގައި ޝަބްނަމީ މަގުގައި ހުރި ގެއެއް ބަލާ ފަސްކުރަނީ - 10 މާޗް 2025
މި މަހުގެ 10 ވަނަ ދުވަހުގެ ރޭ ފުލުހުންނާއި ސިފައިން ގުޅިގެން ގައުމީ ސަލާމަތާއި ގުޅުންހުރި ހާއްސަ އޮޕަރޭޝަނެއް މާލޭގައި ފަށާފައިވާ އިރު، އެ އޮޕަރޭޝަނުގެ އިތުރު ތަފްސީލެއްދޭން ފުލުހުން ދެކޮޅު ހަދައިފިއެވެ.
ފުލުހުން ހޯމަ ދުވަހުގެރޭ ސޯޝަލް މީޑިއާގައި ކުއްލި ގޮތަކަށް އިއުލާންކުރީ ފުލުހުންގެ އިންޓެލިޖެންސަށް ލިބުނު މައުލޫމާތަކާއި ގުޅިގެން ފުލުހުންގެ ހިދުމަތާއި ގައުމީ ދިފާއީ ބާރު ގުޅިގެން ގައުމީ ސަލާމަތާއި ގުޅުންހުރި ހާއްސަ އޮޕަރޭޝަނެއް މާލެ ސަަރަހައްދުގައި ކުރިއަށް ގެންދާ ކަމަށެވެ.
ފުލުހުން އެ ބަޔާން ސޯޝަލް މީޑިއާގައި އާންމުކުރީ 10:35 ހާއިރުއެވެ. އަދި އޭގެ ފަހުން 10:56 ގައި ފުލުހުންގެ މީޑިއާ ގްރޫޕުގައި ބުނެފައިވަނީ އެކްސްގައި ކުރިން ހިއްސާކުރި ބަޔާން ވަގުތީ ގޮތުން ނަގާފައިވަނީ ނާޒުކު ތަފްސީލުތައް ޔަގީންކުރަމުންދާތީ ކަމަށެވެ.
ނަމަވެސް އެރޭ ފުލުހުން ވަނީ އެމްއެންޑީއެފްއާއި ގުޅިގެން އޮޕަރޭޝަން ކުރިއަށްގެންގޮސް 3 މީހަކު ހައްޔަރުކޮށްފައެވެ. އަދި މާލެއާއި ހުޅުމާލޭގެ 4 ތަނެއް ބަލައި ފާސްކޮށްފައިވެއެވެ.
ފުލުހުން 3 މީހަކު ހައްޔަރުކުރި އިރު، އޭގެ ތެރެއިން އެކަކު ހައްޔަރުކުރީ ޖުމްހޫރީ މައިދާން ކައިރިން ދަތުރުކުރަމުން ދިޔަ ޕިކަޕެއްގައި އިން މީހެކެވެ. ދެވަނަ މީހަކު ހައްޔަރުކުރީ ހުޅުމާލެ ވިނަރެސްއިންނެވެ.
މި މައްސަލައާއި ގުޅިގެން ތަކުރާރުކޮށް ފުލުހުންނާއި ސުވާލުކުރުމުންވެސް ހައްޔަރު ކުރި މީހުންގެ ވަނަވަރެއް ވެސް، އަދި ހައްޔަރުކުރި ސަބަބަކާއި، ގެތައް ބަލައި ފާސްކުރީ ކީއްވެގެން ކަމެއްވެސް ބުނެފައިނުވެއެވެ. އަދި މިކަމާއި ގުޅިގެން މީޑިއާއާއި ހަވާލުވެ ހުންނެވެި އެސިސްޓެންޓް ކޮމިޝަނަރ އޮފް ޕޮލިސް އަހުމަދު ޝިފާނާއި ސުވާލުކުރުމުންވެސް އެއްވެސް ޖަވާބެއް ދީފައެއް ނުވެއެވެ. މީގެ އިތުރުން ފުލުހުންގެ މީޑިއާގެ ހެޑް، ޗީފް އިންސްޕެކްޓަރ އޮފް ޕޮލިސް ވަސީމާ ހަސަންވެސް ސުވާލުތަކަށް ޖަވާބެއް ނުދެއްވިއެވެ.
ފުލުހުންނާއި ސިފައިން ގުޅިގެން ގައުމީ ސަލާމަތާއި ގުޅުންހުރި ހާއްސަ އޮޕަރޭޝަނެއް މާލޭގައި ކުރިއަށް ގެންދިޔަ އިރު، އެ އޮަޕަރޭޝަން ނިންމާފައިވާކަމެއް ވެސް ފުލުހުން ހާމަ ނުކުރެއެވެ.
މި އޮޕަރޭޝަނަކީ ޓެރަރިޒަމް އާއި ގުޅުންހުރި މައްސަލައެއް ކަމަށް ނޫސްތަކުގައި ރިޕޯޓްކޮށްފައިވެއެވެ. އަދި މި އޮޕަރޭޝަނުގައި ހަމަލާއެއް ދީފާނެ ކަމަށް ބެލެވޭ ބައެއް ސާމާނު ހޯދާފައިވާ ކަމަށް ވެސް ނޫސްތަކުގައި ބުނެފައިވެއެވެ.
