ސަރުކާރުން މަސައްކަތް ކުރަމުންދަނީ ސަރުކާރު ޖަވާބުދާރީ ކުރުވޭނެ ހުރިހާ ދޮރުތަކެއް ބަންދު ކުރުމަށް: މެންބަރު މައުރޫފް
ސަރުކާރު ހިންގަމުންދާ ގޮތުން ދައުލަތެއްގެ ސިފަ ދަނީ ގެއްލެމުން
އެމްޑީޕީ ޕާލަމެންޓަރީ ގްރޫޕުން މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމުގެ ތެރެއިން
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން މަސައްކަތް ކުރަމުންދަނީ ސަރުކާރު ޖަވާބުދާރީ ކުރުވޭނެ ހުރިހާ ދޮރުތަކެއް ބަންދު ކުރުމަށް ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފު ޒާކިރު ވިދާޅުވެއްޖެއެވެ.
ބުދަ ދުވަހު އެމްޑީޕީ ޕާލަމެންޓަރީ ގްރޫޕުން މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމުގައި މެންބަރު މައުރޫފް ވިދާޅުވީ ސަރުކާރު ހިންގަމުންދާ ގޮތުން ދައުލަތެއްގެ ސިފަ ގެއްލެމުންދާ ކަމަށާއި، ބާރުތައް އެއްވެ، ޖަވާބުދާރީ ކުރެވެންޖެހޭ މިނިވަން މުއައްސަސާތައް ޖަވާބުދާރީ ކުރުވުމުގައި ވަރަށް ބޮޑެތި ގޮންޖެހުންތަކާއި ކުރިމަތިލާން ޖެހިފައިވާ ކަމަށެވެ.
ރައްޔިތުންގެ މަޖިލީހުގެ މައްޗަށް ގާނޫނު އަސާސީން މަތިކޮށްފައިވާ ސަރުކާރު ޖަވާބުދާރީ ކުރުވުމުގެ ޒިންމާ އަދާ ކުރުމަށް ބޮޑެތި ގޮންޖެހުންތަކެއް ކުރިމަތިކުރުވާފައިވާކަން ފާހަގަކުރައްވައި މެންބަރު މައުރޫފް ވިދާޅުވީ ސަރުކާރުގެ އަމާޒުކުރީ ސަރުކާރު ޖަވާބުދާރީ ކުރުވޭނެ ހުރިހާ މަގެއް ބަންދުކުރުމަށް ކަމަށެވެ.
ވަކިން ޚާއްސަކޮށް ރައްޔިތުންގެ މަޖިލީހުގެ މައްޗަށް ގާނޫނު އަސާސީން މަތިކޮށްފައިވާ ސަރުކާރު ޖަވާބުދާރީ ކުރުވުމުގެ ޒިންމާ އަޅުގަނޑުމެންނަށް އަދާ ކުރުމަށް ވަރަށް ބޮޑެތި ގޮންޖެހުންތަކާއި ގާތްގަނޑަކަށް މިއަދު މިވަނީ އެކީއެކަށް ހެން ހުއްޓިފައި. އަޅުގަނޑުމެންނަށް މަޖިލިސް މެދުވެރިކޮށް ސަރުކާރު އަދި ދައުލަތުގެ މިނިވަން މުއައްސަސާތައް ޖަވާބުދާރީ ކުރުވުން. އެގޮތުން އަޅުގަނޑުމެން ކަމާގުޅުންހުރި ކަންބޮޑުވުންތައް ހުށަހަޅައި ޖަވާބުދާރީ ކުރުވުމުގެ ގޮތުން ހުށަހަޅޭ މައްސަލަތައް ބޭރުކޮށްލުމާއި، އަދި ކޮމެޓީތަކުގައި އަޅުގަނޑުމެންނަށް އެފަދަ ފަރާތްތައް ހާޒިރުކޮށްގެން ކުރަންޖެހޭ މަސައްކަތްތައް ކުރުމަށް ހުރި ގޮންޖެހުންތަކާއި، އަދި ވަކިން ޚާއްސަކޮށް މިނިވަން މުއައްސަސާތަކުގެ ބާރު ރައީސުލްޖުމްހޫރިއްޔާ މުތުލަގަށް ނަގައިގެން މިހާރު މިހިނގަމުންދާ ކަންކަމުގައި ކަންބޮޑުވޭ.ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފު ޒާކިރު
ސުޕްރީމް ކޯޓުގެ ފަނޑިޔާރުންގެ އަދަދު ދަށް ކުރާ ބިލަށް އިޝާރާތް ކުރައްވައި މެންބަރު މައުރޫފް ވިދާޅުވީ އެބިލު ފާސްކުރިއިރު ވެސް ގާނޫނު އަސާސީއާ ހިލާފު ކަމަށާއި، ނަމަވެސް އެމަސައްކަތް ކުރީ ކަމަށެވެ. ނަމަވެސް މިހާރު މި މަސައްކަތުގައި ސަރުކާރު އުނބަށް ޖަހާފައިވާ ކަމަށާއި، މުޅިން ވެސް ފެނިގެންދަނީ ސަރުކާރުން މިފަދަ ކަންކަން ކުރާ މަންޒަރު ކަމަށެވެ.
މީގެ އިތުރުން ދިވެހިރާއްޖޭގެ ޝަރުއީ ނިޒާމާއި، މިނިވަން މުއައްސަސާތަކަށް ސަރުކާރުގެ ނުފޫޒު ފޯރުވައި، ފަނޑިޔާރުގެ ނެތް މައްސަލަތަކެއް ނަގައި، ބަލަމުންދާ ކަމަށާއި، އެއީ ބާރުތައް އެއްކުރުމުގެ ގޮތުން ސަރުކާރުން ކުރާ ކަމެއް ކަމަށް މެންބަރު މައުރޫފް ވިދާޅުވިއެވެ.
މެންބަރު މައުރޫފް ވިދާޅުވީ މި ސަރުކާރުން ރައްޔިތުންގެ އުންމީދުތައް ފުޑުފުޑުކޮށްލާފައިވާ ކަމަށާއި، ރައްޔިތުންނަށް ލިބުނު ބޯހިޔާވަހިކަމާއި، ފްލެޓުތައް ފޭރިގަނެފައިވާ ކަމަށެވެ. އަދި އިގްތިސާދީ ހާލަތު އިތުރަށް ގޯސްވެދާނެ ފިޔަވަޅުތައް އަޅައި، ރައްޔިތުންނަށް ތަކުލީފު ކުރިމަތިވާނެ ގޮތަށް ސަރުކާރުން އަމަލުކުރަމުންދާ ކަމަށް މެންބަރު މައުރޫފް ވިދާޅުވިއެވެ.
