ލިވަޕޫލްގެ ދަނޑުގައި ކުރި ހޯދައި، ޕީއެސްޖީން ކުއާޓާ ފައިނަލްގެ ޖާގަ ހޯދައިފި

ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ދެ ވަނަ ލެގުގައި ލިވަޕޫލް ބަލިކޮށް، ޕެރިސް ސެއިންޓް ޖާމަން (ޕީއެސްޖީ) އިން މުބާރާތުގެ ކުއާޓާ ފައިނަލް އިން ޖާގަ ހޯދައިފި އެވެ.

ޕީއެސްޖީގެ އަމިއްލަ ދަނޑުގައި މި ދެ ޓީމު ބައްދަލު ކުރި މެޗު ލިވަޕޫލް އިން ކާމިޔާބު ކުރީ 1-0 އިންނެވެ. އެއީ އެ މެޗުގައި ޕީއެސްޖީން ރަނގަޅަށް ކުޅެމުން ދަނިކޮށް، ލިވަޕޫލް އިން ޖެހި ލަނޑުންނެވެ.

އަންގާރަ ދުވަހުގެ ރޭ ލިވަޕޫލްގެ އަމިއްލަ ދަނޑު، އެންފީލްޑުގައި ކުޅުނު ދެ ވަނަ ލެގުގެ މެޗު ޕީއެސްޖީން ކާމިޔާބު ކުރީ ޕެނަލްޓީ ޖަހައިގެންނެވެ. އެއީ މެޗުގެ ފުރިހަމަ ވަގުތު ހަމަވެ، އިތުރު ވަގުތު ކުޅުނު އިރު ވެސް، ދެ ޓީމު 1-1 އިން އެއްވަރުވެފައި އޮތުމުންނެވެ.

މެޗު ފަށައިގެން 12 ވަނަ މިނެޓުގައި ޕީއެސްޖީން ވަނީ ލިވަޕޫލް ކޮޅަށް ލަނޑު ޖަހައި، އެގްރިގޭޓް ނަތީޖާ ހަމަހަމަ ކޮށްފަ އެވެ. އެ ލަނޑު ޕީއެސްޖީ އަށް ޖަހައިދިނީ މި ސީޒަންގައި އެ ޓީމުގައި މޮޅަށް ކުޅެމުން އަންނަ ފްރާންސްގެ އޮސްމާން ޑެމްބެލޭ އެވެ.

މެޗުގައި ލަނޑު ޖަހާނެ ފުރުސަތުތަކެއް ލިވަޕޫލްް އިން ތަނަަވަސް ކުރި ނަަމަވެސް، އެ ޓީމަށް އެ ފުރުސަތުގެ ބޭނުން ކުރެވޭ ގޮތެއް ނުވި އެވެ. ލިވަޕޫލަށް ކުޅެމުން އަންނަ މިޞްރުގެ ފޯވާޑު، މުޙައްމަދު ޞަލާޙު އަށް ވަނީ ލަނޑު ޖަހާނެ ފުރުސަތު ލިބިފަ އެވެ.

މެޗުގެ ނަތީޖާ ނެރުމަށް ޖެހި ޕެނަލްޓީގައި ޕީއެސްޖީން ވަނީ ހަތަރު ޕެނަލްޓީ ވެސް ކާމިޔާބު ކޮށްފަ އެވެ. އެއީ ވިޓީނިއާ، ގޮންޒާލޯ ރާމޯސް، ޑެމްބެލޭ އަދި ޑިސެއާ ޑޯ ގެ ޕެނަލްޓީ އެވެ.

ލިވަޕޫލަށް ކާމިޔާބު ކުރެވުނީ އެންމެ ޕެނަލްޓީ އެކެވެ. އެއީ ފުރަތަމަ ޞަލާޙު ޖެހި ޕެނަލްޓީ އެވެ. ލިވަޕޫލްގެ ޑާވިން ނޫނޭޒް އަދި ކާޓިސް ޖޯންސް ޖެހި ޕެނަލްޓީ ޕީއެސްޖީގެ ގޯލު ކީޕަރު ވަނީ މަތަކޮށްފަ އެވެ.

މިފަހަރުގެ ޗެމްޕިއަންސް ލީގުގެ ލީގު ބުރުގެ އެއް ވަނަ ހޯދައިގެން ލިވަޕޫލް ވަނީ މުބާރާތުގެ ގަދަ 16 ވަނަ ބުރުން ޖާގަ ހޯދައިފަ އެވެ.