ފައިސާ ޗާޕްކުރުމުގެ މައްސަލަ - ފާޑުކިޔުން ބޮޑުވެ ޝުހާދު އެމްއެމްއޭގެ ބޯޑުން އިސްތިއުފާދެއްވައިފި

މޯލްޑިވްސް މަނިޓަރީ އޮތޯރިޓީ (އެމްއެއެމްއޭ) މެދުވެރިކޮށް ސަރުކާރުން ފައިސާ ޗާޕުކުރުމަށް ނިންމުމާއި ގުޅިގެން ސަރުކާރާއި އެމްއެމްއޭ އަށް އާއްމުންގެ ފާޑުކިޔުން އަމާޒުވެފައި ވަނިކޮށް، އެމްއެމްއޭގެ ބޯޑުން ޝުހާދު އިބްރާހިމް އިސްތިއުފާ ދެއްވައިފި އެވެ.

އޭނާ އިސްތިއުފާ ދެއްވީ އަންގާރަ ދުވަހުއެވެ.

އެމްއޭގެ ބޯޑުގައި އޭނާ ތަމްސީލްކުރައްވަނީ އިކޮނޮމިކް މިނިސްޓްރީއެވެ. އެމްއެމްއޭގެ ބޯޑުގައި ފިނޭންސް މިނިސްޓްރީ ތަމްސީލްކުރައްވަމުން ގެންދެވި އަހުމަދު ޒަޔާން މުހައްމަދު ވެސް ވަނީ ހޯމަ ދުވަހު މަޤާމުން އިސްތިއުފާދެއްވާފައެވެ.

ރާއްޖެއެމްވީ އަށް އިތުބާރު ހުރި މަސްދަރަކުން އެނގިފައިވާ ގޮތުން މި ދެ ބޭފުޅުން ވެސް މަޤާމުން އިސްތިއުފާދެއްވީ ފައިސާ ޗާޕްކުރުމަށް ސަރުކާރުން ނިންމުމާއި ގުޅިގެންނެވެ. އަދި ޝުހާދު އިސްތިއުފާދެއްވާފައި ވަނީ ފައިސާ ޗާޕްކުރުމުގެ މައްސަލަ ރިވިއުކުރުމަށް ހުށަހެޅި ހުށަހެޅުން ބަލައި ނުގަންނާތީ ކަމަށް ވެސް މި ނޫހަށް ވަނީ މައުލޫމާތު ލިބިފައެވެ.

ސަރުކާރުން ވަނީ އެމްއެމްއޭ މެދުވެރިކޮށް އިގްތިސާދުގެ ތެރެއަށް ފައިސާ ނެރުމަށް ނިންމާފައެވެ. އެކަން ކުރުމަށް ހަމަޖެހިފައި ވަނީ އެޗްޑީސީގެ މިލްކިއްޔާތުގައި ހުރި ބިންތަކުގެ ތެރެއިން 22 ހެކްޓަރުގެ ބިން އެމްއެމްއޭ އަށް ގަތުމުގެ މުއާމަލާތެއް ހިންގައިގެންނެވެ.

ރާއްޖޭގެ ރިޒަރވްގައި އެފަދަ ކަމެއް ކުރެވޭ ވަރަށް ފައިސާ ނެތް އިރު އެ މުއާމަލާތް ހިންގަން އޮތް ހަމައެކަނި ގޮތަކީ ފައިސާ ޗާޕްކުރުން ކަމަށް އިގްތިސާދީ ތަޖުރިބާކާރުން ބުނެއެވެ. ނަމަވެސް މިއީ ރާއްޖޭގެ މާލީ ނިޒާމާއި އިގްތިޞާދަށް ވެސް ވަރަށް ނުރައްކާ ކަމެއް ކަމަށް އިގްތިޞާދު ދިރާސާކުރާ ފަރާތްތަކުން ބުނެއެވެ.