ފައިސާ ޗާޕުކުރާތީ ހުށަހެޅި ކުއްލި މައްސަލަ - ޝަރުތު ހަމަ ނުވާ ކަމަށް ބުނެ މައްސަލަ ބަލަ އެއް ނުގަތް

މޯލްޑިވްސް މަނިޓަރީ އޮތޯރިޓީ، އެމްއެމްއޭ މެދުވެރިކޮށް ސަރުކާރުން ފައިސާ ޗާޕުކުރުވަން އުޅޭތީ އެކަމާއި މެދު ހުރި ކަންބޮޑުވުންތައް ހާމަކޮށް ހުށަހެޅި ކުއްލި މައްސަލަ ބަލައިނުގަންނަން މަޖިލީހުގެ ރައީސް އަބްދުއްރަހީމް އަބްދުﷲ ނިންމައިފިއެވެ.

އެ ކުއްލި މައްސަލަ ހުށަހަޅުއްވާފައި ވަނީ ކެޔޮދޫ ދާއިރާގެ މެމްބަރު މުހައްމަދު ނިއުޝާދެވެ. އެހެންނަމަވެސް ކުއްލި މައްސަލަ އެއްގައި ހުންނަންޖެހޭ ޝަރުތު ހަމަނުވާކަމަށް ފާހަގަކުރައްވާ މަޖިލީހުގެ ރައީސް އަބްދުއްރަހީމް ވަނީ އެ މައްސަލަ ބަލައިނުގަންނަން ނިންމަވާފައެވެ.

އެ ކުއްލި މައްސަލައިގައި ބުނެފައި ވަނީ އެއީ ޤާނޫނުއަސާސީ އާއި ޤާނޫނުތަކާއި އަދި 2025ގެ ބަޖެޓާއި ވެސް ޚިލާފަށް މޯލްޑިވްސް މަނިޓަރީ އޮތޯރިޓީ އިން ކުރާ ކަންކަން ސަރުކާރުގެ ސަމާލުކަމަށް ގެނައުމަށް ހުށަހެޅި މައްސަލަ އެއް ކަމަށެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ފައިސާ ނެގުމުގެ ބޭނުމުގައި ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މިލްކިއްޔާތުގައި ވާ ބިމެއް ދައުލަތުގެ ބޭންކަށް ގަތުމުގެ މުއާމަލާތެއް ހިންގުމަށް ފަހު އެ ފައިސާ އެޗްޑީސީ މެދުވެރިކޮށް ސަރުކާރަށް ދޭން މަސައްކަތް ކުރަމުންދާތީ އެކަމާއި ގުޅުން ހުރި ކަންބޮޑުވުންތައް އެ މައްސަލައިގައި ވަނީ ހިމަނާފައެވެ.

ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 96 ވަނަ މާއްދާގެ (ށ)ގައި ރައްޔިތުންގެ މަޖިލީހުން ހުއްދަ ނުހޯދާ މަޖިލީހުން ފާސްކުރާ ބަޖެޓަށް ވުރެ އިތުރަށް ޚަރަދުކޮށްގެން ނުވާނެ ކަމަށާ، ބަޖެޓުގައި ވަކި ކަމަކަށް ޚަރަދެއް ކުރަން ކަނޑައަޅާފައިވާ ނަމަ އެ ޚަރަދު ކުރަން ވާނީ އެ ކަމަށް އެކަނި ކަމަށް ބަޔާންކޮށްފައިވާ ކަމަށް އެ މައްސަލައިގައި ފާހަގަކޮށްފައިވެއެވެ. ހަމައެހެންމެ އެމްއެމްއޭގެ ޤާނޫނުގެ 4 ވަނަ މާއްދާގައި އެ އޮތޯރިޓީގެ މައިގަނޑު މަގްސަދަކީ ދެމެހެއްޓެނެވި އިގްތިސާދެއްގެ މަގްސަދު ހާސިލްކުރުމަށް މަގުފަހިވާ ގޮތަށް ތަކެތީގެ އަގާއި ފަނޭންޝަލް ސްޓެބިލިޓީ ދެމެހެއްޓުމަށް ސަރުކާރަށް އެހީތެރިވުން ކަމަށް ވެސް އެ މައްސަލައިގައިވެއެވެ.

މީގެ އިތުރުން އެމްއެމްއޭގެ ޤާނޫނުގައި ބުނާ ގޮތުން އެ އޮތޯރިޓީގެ ޑިރެކްޓަރުންގެ ބޯޑުގެ މައިގަނޑު މަސައްކަތްތަކާއި ބާރުގެ ގޮތުގައި ބަޔާންކޮށްފައިވަނީ، މަނިޓަރީ ސިޔާސަތު ކަނޑައެޅުމާއި، މަނިޓަރީ މަގްސަދުތަކާއި، މައިގަނޑު އިންޓްރެސްޓް ރޭޓްތަކާއި ރާއްޖޭގެ ފައިސާ ލިބެން ހުންނާނެ ގޮތް ހެދުމާއި އެކަންކަމާއި ގުޅޭގޮތުން އެއިރަކަށް އެކަށީގެންވާ ނިންމުންތައް ކަނޑައެޅުން ކަމަށް ވެސް އެ މައްސަލައިގައި ބުނެފައިވެއެވެ.

މާލިއްޔަތު ޤާނޫނާއި ދައުލަތުގެ މާލިއްޔަތުގެ ޤަވައިދާއި ޚިލާފަށް ދައުލަތުގެ ފައިސާ އިން ޚަރަދުކުރުމާއި، ދައުލަތުގެ މުދަލެއް ވިއްކާލުމަކީ ހުއްދަ އަމަލެއްކަން އެ މައްސަލައިގައި ފާހަގަކޮށްފައިވެއެވެ. އެ ކުއްލި މައްސަލައިގައި އިތުރަށް ބުނެފައި ވަނީ ދައުލަތުގެ ފިސްކަން ޒިންމާގެ ޤާނޫނުގެ ދަށުން އެމްއެމްއޭ އިން ދަރަންޏާއި ފައިސާ ނަގަން ވާނީ ދައުލަތުގެ ކޭޝް ފްލޯ މެނޭޖްކުރުމަށް، އަދި 91 ދުވަހުގެ ތެރޭގައި ފައިސާ ދައްކާ ޚަލާސްކުރާ ގޮތަށް ކަމާއި، އެގޮތަށް ނެގޭނީ ފާއިތުވި 3 އަހަރު ސަރުކާރަށް ލިބުނު އާމްދަނީގެ 2.5 އިންސައްތަ އަށް ވުރެ އިތުރު ނޫން އަދަދެއް ކަމަށެވެ.

އެމްއެމްއޭ އިން 22 ހެކްޓަރުގެ ބިމެއް ގާތްގަނޑަކަށް 15 ބިލިއަން ރުފިޔާ އަށް ގަތުމަށް ނިންމާފައި ވާއިރު އެކަމަށްޓަކާ ބޭނުންވާ ފައިސާ ޗާޕުކޮށްގެން އެ މަރުހަލާ ކުރިއަށް ގެންދަން ނިންމާފައިވާތީ އެކަމުގެ ކަންބޮޑުވުން އެ ކުއްލި މައްސަލައިގައި ވަނީ ހިމަނާފައެވެ. އެކަމުގެ ފަހަތުގައި ފޮރުވިފައިވާ ކަންތައްތަކެއް ހުރި ކަމަށް މެމްބަރު ނިއުޝާދު ވަނީ ވިދާޅުވެފައެވެ.

ނިއުޝާދު ވަނީ އެމްއެމްއޭގެ އޮފީސް ހިންގުމަށް ބޭނުންވާ މިންވަރަށް ވުރެ އިތުރަށް ބިން ހޯދަން ޖެހޭ އިތުރު އެއްވެސް ސަބަބެއް ނެތް ކަމަށެވެ. އެހެންކަމުން އެފަދަ މުއާމަލާތެއް ހިންގާ ދައުލަތުގެ މަރުކަޒީ ބޭންކުން ފައިސާ ނެގުމަކީ އުސޫލުތައް އެއް ފަރާތްކޮށް އުސޫލުތަކާއި ކަނޑައެޅިގެން ޚިލާފުވުން ކަމަށް އޭނާ ވިދާޅުވިއެވެ.

އޭގެ ނަތީޖާ އަކަށް ވާނީ އެމްއެމްއޭގެ މިނިވަންކަން ގެއްލި މުޅި މާލީ ނިޒާމްގެ އިތުބާރު ގެއްލުން ކަމަށް ނިއުޝާދު ފާހަގަކުރެއްވިއެވެ. ހަމައެހެންމެ މިއީ 2025ގެ ބަޖެޓުގައި ދައުލަތަށް ފައިސާ ހޯދާނެ ކަމަށް ފިނޭންސް މިނިސްޓްރީން ބަޔާން ކުރި ކަންކަމުގެ ބޭރުން މަޖިލީހުގެ ހުއްދަ ނުހޯދާ ކުރާކަމެއް ކަމަށް ވާއިރު އޭގެ ސަބަބުން ދިވެހި ރުފިޔާގެ އަގު ދަށް ވާނެ ކަމަށް އެ ކުއްލި މައްސަލައިގައި ބަޔާންކޮށްފައިވެއެވެ. ހަމައެހެންމެ ބޭރު ފައިސާގެ އަގު މަތިވުމުގެ ނަތީޖާއެއްގެ ގޮތުން މުދަލާއި ޚިދުމަތުގެ އަގުތައް އުފުލޭނެ ކަމަށް ވެސް އޭނާ ވިދާޅުވިއެވެ. އެހެންކަމުން މިއީ ދައުލަތުގެ މާލީ ކަންކަން ނުރައްކާތެރި ދަރަޖައަކަށް ހިނގައިދާނެ ކަމެއް ކަމަށް ނިއުޝާދު ހުށަހެޅުއްވި ކުއްލި މައްސަލައިގައި ވެއެވެ.

މިއީ ވެރިކަން ހިންގުމުގެ ބާރުގެ ފަރާތުން ހިނގާ ނުހިނގާ ގޮތް ބަލާ ޖަވާބުދާރީ ކުރުވުމަށް މަޖިލީހާއި މަތިކުރުވާފައިވާ ޒިންމާގެ ދަށުން ބަލަން ޖެހޭ ކަމަކަށް ވާތީ އެކަމާއި މެދު މަޖިލީހުގައި ބަހުސްކުރުމަށް އެ ކުއްލި މައްސަލަ ހުށަހަޅާ ކަމަށް އެ މައްސަލައިގައި ވަނީ ފާހަގަކޮށްފައެވެ.