މިއަދު މި ގައުމުން ފެނިގެން މިދަނީ ރާއްޖޭގެ ކޮންޓްރަކްޝަން އިންޑަސްޓްރީ މުޅިން ފުނޑާލައި ސަރުކާރުގެ ހުރިހާ ބޮޑެތި ޕްރޮޖެކްޓް ތައް އެސްއޯއީތަކަށް ދޭތަން ކަމަށާއި މިއީ ވައްކަމަށް ހުޅުވާލާ ދޮރެއް ކަމަށް ރައްޔިތުންގެ މަޖިލީހުގެ ވެލިދޫ ދާއިރާގެ މެމްބަރު މުހައްމަދު އައްބާސް ވިދާޅުވެއްޖެއެވެ.

އައްބާސް ވިފަދައިން ވިދާޅުވީ އަންގާރަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުންނެވެ.

ރާއްޖޭގެ ޓޫރިޒަމް ޤާނޫނަށް އިސްލާހު ގެނައުމާއި ގުޅޭ ބިލަށް މަޖިލީހުގައި ބަހުސް ކުރެވެމުން އަންނަ އިރު މިވަގުތު ޓޫރިޒަމް އެންމެ ބޮޑަށް ކުރި އަރަމުން އަންނަ އައްޑޫގައި ފުޅާދާއިރާއެއްގައި ޓޫރިޒަމް އިސްތިހާރު ކުރަމުން އަންނަ މި ދަނޑިވަޅުގައި އައްޑޫގެ ގުޅިފައިވާ ރަށްތަކުން ކަރަންޓު ކެނޑެމުންދާ މައްސަލަ ވަނީ ވަރަށް ބޮޑަށް ކުރިމަތިވެފައެވެ.

މި މައްސަލައަށް އަހަރު ދުވަސް ފާއިތުވެގެން ދިިޔައިރު ވެސް ހައްލެއް ލިބިފައި ނުވާތީ އެ ސިޓީގެ ރައްޔިތުންނަށް ޖެހެމުންދާ ތަކުލީފުތަކަށް ވަގުތުން ވަގުތަށް ހައްލެއް ހޯދައިދިނުމަށް ސަރުކާރަށް ގޮވާލައި، ހިތަދޫ ދެކުނު ދާއިރާގެ އެމްޑީޕީ މެންބަރު، އިބްރާހިމް ނާޒިލް މަޖިލީހަށް ހުށަހެޅުއްވި ކުއްލި މައްސަލަ ހުށަހެޅުއްވީ ހޯމަ ދުވަހު އެވެ. އަދި މި މައްސަލަ ބޭރުކޮށްލީ ވެރިކަން ކުރާ ޕީއެންސީގެ 47 މެންބަރުންގެ ވޯޓާއެކު އެވެ.

މިކަމާއި ކަންބޮޑުވުން ފާޅުކުރައްވައި ރާއްޖޭގެ ޓޫރިޒަމް ޤާނޫނަށް އިސްލާހު ގެނައުމާއި ގުޅޭ ބިލަށް ބަހުސް ކުރައްވަމުން އައްބާސް ވިދާޅުވީ އައްޑޫގެ ގުޅިފައިވާ ރަށްތަކުން ކަރަންޓު ކެނޑެމުންދާ މައްސަލަ މަޖިލިސް ތަޅުމުން ބޭރުކޮށްލުމަކީ ހިތާމަހުރި ކަމެއް ކަމަށާއި އަދި އެކަން އެގޮތަށް ކުރެއްވީ ވެރިކަން ކުރާ ޕާޓީ ޕީއެންސީ ގެ ޕީޖީ ލީޑަރު އިބުރާހީމް ފަލާހު ވިޕެއް ނެރެގެން ކަމުގައި ވެސް އައްބާސް ވިދާޅުވިއެވެ.

އައްބާސް ވިދާޅުވީ މިއަދު ވެސް މަޖިލީޙުގައި ބަހުސް ކުރެވެމުން މިދަނީ ގައުމުގެ އިގްތިޞާދު ރަނގަޅުވުމަށް ކަމަށާއި އެގޮތުން އިޤްތިޞާދު ރަނގަޅުކުރުމުގެ ނަމުގައި ޓޫރިޒަމް ގެ ޤާނޫނަށް ތަފާތު ނަންނަމުގައި އިސްލާހުތައް އެބަ ގެންނަކަމަށެވެ.

އެގޮތުން ބޮޑެތި ލޯނުތައް ނަގައިގެން ޓޫރިޒަމަށް އިންވެސްޓު ކޮށްގެން ތިބި އިންވެސްޓަރުން، އެ ބައިމީހުންގެ ދަށުން ތިބޭ މުވައްޒަފުންނަށް ވީހާވެސް ރަނގަޅަކަށް ކަންކަން ކޮށްދެމުން އަންނަ ހިނދު، ރާއްޖޭގެ އިޤްތިޞާދު ރަނގަޅު ކުރުމުގެ ނަމުގައި، ފެނިގެން މިދަނީ ތަރައްޤީގެ ދަޅަ ދައްކައިގެން ކޮންމެ ފަހަރަކު ޓޫރިޒަމަށް ލިބޭ ފައިސާ އިސްރާފު ކުރާ މަންޒަރުކަމަށް އައްބާސް ވިދާޅުވިއެވެ.

އައްބާސް ވިދާޅުވީ ރައީސް ޑރ. މުހައްމަދު މުއިއްޒުގެ މި ވެރިކަމަށް ދޮޅު އަހަރުވެގެން ދިއަ އިރު، ވެލިދޫ ދާއިރާގައި އަލަށް އެއްވެސް މަޝްރޫޢެއް ފަށާފައި ނުވާކަމަށާއި ވެވަޑައިގެން ވަޢުދުފުޅުގެ މަތިން މިހާރު ކުޑަކޮށް ވެސް ރައީސް މުއިއްޒު ހަނދުމަފުޅުނެއް ކަމަށެވެ.

އައްބާސް ވިދާޅުވީ މި ސަރުކާރުގެ ސުޕަމެޖޯރިޓީ އޮތް މި މަޖިލީހުން މިގެންދަނީ ރައީސް މުއިއްޒު ވިދާޅުވިއްޔާ ވިދާޅުވިހާ ޤާނޫނަކަށް ބަދަލުގެންނަވަމުން، ވިދާޅުވިއްޔާ ވިދާޅުވިހާ ބައަކު މުއައްސަސާތަކަށް އައްޔަން ކުރަމުން ކަމަށާއި ނަމަވެސް މި ހުރިހާ ކަމަކުން ރައީސް މުއިއްޒުގެ މުށުތެރެއަށް ހުރިހާ ބާރުތަކެއް ލަމުން ދިއައިރު، މިއަދު ދިވެހި ރައްޔިތުންނަށް ލިބިފައި އޮތް އެއްވެސް އުފަލެއް ހިތްހަމަ ޖެހުމެއް ނެތް ކަމަށް އައްބާސް ވިދާޅުވިއެވެ.

އައްބާސް ވިދާޅުވީ މަޖިލީހުންނާއި ޤާނޫނުތަކުގައި ހުރި ކަންކަން ތަންފީޒުކުރުމުގައި ހަމަ އެކަނި ރައީސުލްޖުމްޙޫރިއްޔާ އަށް ކަންކަން ފަހިވާ ގޮތަށް މަޖިލީހުންނާއި ސަރުކާރުގެ ތެރެއިން ކަންކަން ކުރެވިގެންދާއިރު، ރައްޔިތުންގެ ހައްޤުގައި އެއްވެސް ކަމެއް ކުރެވިގެން ދާތަން ނުފެންނަ ކަމަށެވެ.

އައްބާސް ވިދާޅުވީ ޓޫރިޒަމްގެ ޤާނޫނާއި ބެހޭގޮތުން ވާހަތައް ދައްކާއިރު، ޓޫރިޒަމުގެ ތެރެއިން ލިބޭ އިންކަމުން ދިވެހި ރާއްޖެ ތަރައްޤީ ކުރާ ވާހަކަ ދައްކާއިރު، ނިމިދިއަ ސަރުކާރުން ވެސް ަދި ރައީސް މުއިއްޒުގެ މި ސަރުކާރުންވެސް ނ. ވެލިދޫގައި 30 އެނދުގެ ހޮސްޕިޓަލެއް އަޅުއްވައި ދެއްވާނޭ ކަމުގައި ވިދާޅުވިކަމަށެވެ. އަދި އެއީ ރައީސް މުއިއްޒުގެ ރިޔާސީ ވައުދުފުޅެއް ކަމަށާއި ނަމަވެސް އަދިވެސް އެ ވައުދު ނުފުއްދި ވާކަން އައްބާސް ފާހަގަކުރެއްވި އެވެ.

އައްބާސް ވިދާޅުވީ ވެލިދޫގައި އެ އަޅާ ހޮސްޕިޓަލެއްގެ ވާހަކަ ދައްކާއިރު، މިއަދު ފެނިގެން މި ދަނީ ރާއްޖޭގެ ކޮންޓްރަކްޝަން އިންޑަސްޓްރީ މުޅިން ފުނޑާލައި ސަރުކާރުގެ ހުރިހާ ބޮޑެތި ޕްރޮޖެކްޓް ތައް އެސްއޯއީތަކަށް ދޭތަން ކަމަށެވެ. އަދި މިއީ މި ސަރުކާރުން ވައްކަމަށް ހުޅުވާ ދޮރެއް ކަމަށާއި އެއީ ސީދާ ދިވެރި ރައްޔިތުންގެ ފައިސާއިން ވައްކަން ކުރުން ކަމަށް އައްބާސް ވިދާޅުވިއެވެ.