ރަޝިޔާ-ޔޫކްރެއިން ހަނގުރާމައާއި ގުޅިގެން ޖިއްދާގައި ބާއްވާ މަޝްވަރާތަކުގައި ކުރިއެރުންތަކެއް ލިބޭނެ ކަމަށް އުންމީދު ކުރަން: ޓްރަމްޕް

ރަޝިޔާ-ޔޫކްރެއިން ހަނގުރާމައާއި ގުޅިގެން ސައުދީ އަރަބިއްޔާގައި ބޭއްވުމަށް ހަމަޖެހިފައިވާ މަޝްވަރާތަކުގައި ކުރިއެރުންތަކެއް ލިބޭނެ ކަމަށް އުންމީދު ކުރައްވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ޓްރަންޕާއި ހަވާލާދެއްވައި، އަލްއަރަބިއްޔާގައި ރިޕޯޓުކޮށްފައިވާ ގޮތުގައި ސައުދީ އަރަބިއްޔާގެ ޖިއްދާގައި ބޭއްވުމަށް ހަމަޖެހިފައިވާ ރަޝިޔާ-ޔޫކްރެއިން ހަނގުރާމައިގެ މަޝްވަރާތަކުގައި ރަނގަޅު ނަތީޖާއެއް ފެންނާނެ ކަމަށެވެ.

އަންގާރަ ދުވަހު ޖިއްދާގައި ބޭއްވުމަށް ހަމަޖެހިފައިވާ މަޝްވަރާތަކުގައި ބައިވެރިވާ ޔޫކްރެއިންގެ ވަފުދާއެކު އެމެރިކާގެ އިސް ވެރިން ބައްދަލުކުރައްވާނެއެވެ. އަދި މި ބައްދަލުވުމުގެ މައިގަނޑު މަގުސަދަކީ ރަޝިޔާއާއެކު ހަނގުރާމަ ނިންމުމަށް ޔޫކްރެއިންގެ ކޮންސެޝަންތަކެއް ދިނުމަށް ތައްޔާރަށް ތިބިތޯ ބެލުން ކަމަށް ރިޕޯޓުކޮށްފައިވެއެވެ.

މީގެ އިތުރުން މައުދަން ފޯރުކޮށްދިނުމާއި ގުޅޭ އެއްބަސްވުމާއި ގުޅޭގޮތުން ވެސް މަޝްވަރާ ބައްދަލުވުންތައް ކުރިއަށް ގެންދާނެެއެވެ.

އަޅުގަނޑު ގަބޫލުކުރާ ގޮތުގައި މި ހަފްތާގައި ވަރަށް ބޮޑު ކުރިއެރުމެއް ލިބޭނެ.

އެމެރިކާގެ ރައީސް ޑޮނަލްޑް ޓްރަމްޕް

މީގެ ކުރިން ޔޫކްރެއިންގެ ރައީސް ވޮލޮޑިމިރް ޒެލެންސްކީއާއެކު މައުދަން ފޯރުކޮށްދިނުމާއި ގުޅޭ އެއްބަސްވުމެއްގައި ސޮއިކުރެއްވުމަށް ހަމަޖެހިފައިވީ ނަމަވެސް، ވައިޓް ހައުސްގެ ބައްދަލުވުމުގައި ދެ ލީޑަރުންގެ މެދުގައި އުފެދުނު ޚިޔާލު ތަފާތުވުމާ ގުޅިގެން އެ އެއްބަސްވުމުގައި ސޮއިކުރައްވާފައިނުވެއެވެ. 

އެމެރިކާއިން ވަނީ ޔޫކްރެއިންއަށް ފޯރުކޮށްދެމުން އައި އިންޓެލިޖެންސް މަޢުލޫމާތު ވަގުތީގޮތުން ހުއްޓާލާފައެވެ. ސީއައިއޭގެ ޑިރެކްޓަރ ޖޮން ރެޓްކްލިފް ވިދާޅުވި ގޮތުގައި މިއީ ޒެލެންސްކީ ރަޝިޔާއާއެކު ސުލްހަވެރި މަޝްވަރާތަކަށް އައުމަށް ބާރުއެޅުމުގެ ގޮތުން އެޅުނު ފިޔަވަޅެއް ކަމަށެވެ.