ޒެލެންސްކީ އާއި ސައޫދީ ކްރައުން ޕްރިންސް މުޙައްމަދު ބިން ސަލްމާން ބައްދަލުކުރައްވަނީ

ޔުކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެފައިވަނީ އަންނަ ހޯމަ ދުވަހު  ސައޫދީ އަރަބިއްޔާއަށް ވަޑައިގަންނަވާނެ ކަމަށެވެ. 

މި ދަތުރުފުޅުގައި ސައޫދީ ކްރައުން ޕްރިންސް މުޙައްމަދު ބިން ސަލްމާނާ ބައްދަލުކުރެއްވުމަށް ވަނީ ހަމަޖެހިފައެވެ. 

ޓެލެގްރާމް މެދުވެރިކޮށް ކުރެއްވި ޕޯސްޓެއްގައި ރައީސް ޒެލެންސްކީ ވިދާޅުވެފައިވަނީ އެމަނިކުފާނުގެ ޓީމު ސައޫދީގައި މަޑުކުރައްވާނެ ކަމަށާއި، އަދި ސައުދީގައި އެމެރިކާގެ އޮފިޝަލުންނާއެކު މަސައްކަތް ކުރައްވާނެ ކަމަށެވެ. 

އަދި ޔުކްރެއިންގެ އެންމެ ބޮޑު އެދުމަކީ ސުލްހަ ކަމަށް ވެސް ޒެލެންސްކީ ވިދާޅުވިއެވެ. އެމެރިކާގެ މެދުއިރުމަތީގެ ސުލްހައަށް ޚާއްސަ އެންވޯއީ ސްޓީވް ވިޓްކޮފް ވިދާޅުވެފައިވަނީ ރިޔާޟް ނުވަތަ ޖިއްދާގައި އެމެރިކާ އަދި ޔޫކްރެއިންގެ އޮފިޝަލުން ބައްދަލުވުމެއް ބޭއްވުމަށް ރޭވިފައިވާ ކަމަށެވެ. 

މި ބައްދަލުވުމުގައި ސުލްހައިގެ އެއްބަސްވުމެއްގެ އޮނިގަނޑަކާ ބެހޭ ގޮތުން އަދި ހަނގުރާމަ ހުއްޓާލުމުގެ މަޝްވަރާކުރެވޭނެއެވެ.