ބަކާގެ ހަނދާނަށް ޚާއްސަކޮށްގެން ވެޓަރަންސް ލީގެއް ފަށައިފި

މޯލްޑިވްސް ސޮކާ މޭޓްސް (އެމްއެސްއެމް) އިން އިންތިޒާމުކޮށްގެން ކުރިއަށް ގެންދާ، ސެވަން އަ ސައިޑް ވެޓަރަންސް ލީގު ފަށައިފި އެވެ.

ހެންވޭރު ދަނޑުގައި ހޯމަ ދުވަހުގެ ހަވީރު ފެށި މުބާރާތް ޚާއްސަކޮށްފައި ވަނީ، މިދިޔަ އަހަރުގެ ޖޫން މަހުގެ ތެރޭގައި ނިޔާވި، ޤައުމީ ޓީމުގެ ކުރީގެ މިޑްފީލްޑަރު މުޙައްމަދު އާރިފް (ބަކާ) އަށެވެ.

މުބާރާތުގެ 40 އަހަރުން މަތީގެ ވެޓަރަންސް ބައިގެ ފުރަތަމަ މެޗުގައި ބައްދަލު ކޮށްފައި ވަނީ މުއިވެޔޮ ފްރެންޑްސް އާއި މަޑިސްޓާސް އެވެ. އެ މެޗު މުއިވެޔޮ އިން ވަނީ 2-1 އިން ކާމިޔާބު ކޮށްފަ އެވެ.

މީގެ އިތުރުން 50 އަހަރުން މަތީގެ މާސްޓަސް ބައިގެ ފުރަތަމަ މެޗުގައި ބައްދަލު ކޮށްފައި ވަނީ ސޮކާ ވެޓަރަންސް އެސޯސިއޭޝަން އޮފް މޯލްޑިވްސް އާއި މުއިވެޔޮ ފްރެންޑްސް އެވެ. މި މެޗު ވެޓަރަންސް އެސޯސިއޭޝަން އިން ކާމިޔާބު ކޮށްފައި ވަނީ 5-1 އިންނެވެ.

މުބާރާތް ކުރިއަށް ގެންދަނީ 40 އަހަރުން މަތީގެ ވެޓަރަންސް އަދި 50 އަހަރުން މަތީގެ މާސްޓަސް ބަޔަށް ބަހާލައިގެން، ދެ ބަޔަކަށެވެ. ވެޓަރަންސް ބައިގައި ނުވަ ޓީމު އަދި މާސްޓަސް ބައިގައި އަށް ޓީމާ އެކު، މުބާރާތުގައި ޖުމުލަ 17 ޓީމަކުން ވާދަކުރެ އެވެ.

ހޯމަ ދުވަހުން ފެށި މި މުބާރާތް ކުރިއަށް ދާނީ މާޗު މަހުގެ 29 ވަނަ ދުވަހުގެ ނިޔަލަށެވެ.