ކެރަމް އެސޯސިއޭޝަނުން މުޅިން އަލަށް ވެޓަރަންސް ކެރަމް މުބާރާތެއް ބާއްވަނީ

ކެރަމް އެސޯސިއޭޝަން އޮފް މޯލްޑިވްސް (ސީއޭއެމް)އިން ވެޓަރަންސް ކެރަމް ޗެމްޕިއަންޝިޕްގެ ނަމުގައި މުޅިން އަލަށް ވެޓަރަންސް ކެރަމް މުބާރާތެއް ބޭއްވުމަށް ނިންމައިފިއެވެ.

އެސޯސިއޭޝަނުން ރަސްމީކޮށް މުބާރާތް އިއުލާނުކޮށްފައިވާއިރު، މުބާރާތުގައި ބައިވެރިވުމަށް ހުޅުވާލާފައިވަނީ ޖޫން މަހުގެ 9 ވަނަ ދުވަހާ ހަމައަށެވެ. މުބާރާތް ފެށުމަށް ހަމަޖެހިފައިވަނީ ޖޫން މަހުގެ 11 ވަނަ ދުވަހުއެވެ.

މުޅިން އަލަށް ފަށާ މި މުބާރާތަކީ 40 އަހަރުން މަތީ މީހުންނަށް ޚާއްސަކުރެވިފައިވާ މުބާރާތެކެވެ. މާލޭ ކެރަމް ހޯލުގައި ކުރިޔަށް ގެންދިއުމަށް ހަމަޖެހިފައިވާ މި މުބާރާތުގައި ކުރިޔަށްދާނީ އޯޕަމެން ސިންގަލްއާއި އޯޕެން ޑަބަލްސްގެ އިވެންޓެވެ. ކެރަމް އެސޯސިއެޝަނުން ބުނިގޮތުގައި މި މުބާރާތުގެ މަގުސަދަކީ ޕްރޮފެޝަނަލް ކުޅުންތެރިން ނުހިމެނޭހެން، ވެޓަރަންސް ތެރޭގައި ވާދަވެރި މެޗުތަކެއް ކުޅުމުގެ ފުރުސަތު ދިނުމެވެ.

އެއްވަނަ ވެޓަރަންސް ކެރަމް ޗެމްޕިއަންޝިޕުގައި ބައިވެރިވުމަށް އެދޭ ފޯމު ލިބެން ހުންނާނީ ގަލޮޅު ދަނޑުގައި ހުންނަ ކެރަމް އެސޯސިއޭޝަންގެ އިދާރާއިންނެވެ.