ކެރަމް އެސޯސިއޭޝަން އޮފް މޯލްޑިވްސް އިން އިންތިޒާމު ކޮށްގެން ކުރިއަށް ގެންދިޔަ، އެސޯސިއޭޝަން ކަޕްގެ ފިރިހެން ސިންގަލްސް އިވެންޓުގެ ޗެމްޕިއަންކަން އިސްމާއީލް އަޒްމީން ހޯދިއިރު، އަންހެން ސިންގަލްސް އިވެންޓުގެ ޗެމްޕިއަންކަން އާމިނަތު ވިދާދު ހޯދައިފި އެވެ.

ފިރިހެން ސިންގަލްސް އިވެންޓުގެ ފައިނަލްގައި އަޒްމީން ވާދަކޮށްފައި ވަނީ ޙަސަން ނާޒިމް (ނާނަ)އާ އެވެ. އެ މެޗު އަޒްމީން ކާމިޔާބު ކުރީ ދެ ސެޓު އެއް ސެޓުންނެވެ. މެޗުގެ ފުރަތަމަ ސެޓު އަޒްމީން ކާމިޔާބު ކޮށްފައި ވަނިކޮށް، ނާޒިމް ވަނީ ދެ ވަނަ ސެޓު ކާމިޔާބު ކޮށްފަ އެވެ. ނަމަވެސް ތިން ވަނަ ސެޓު ކާމިޔާބުކޮށް އަޒްމީން ވަނީ ޗެމްޕިއަންކަން ހޯދައިފި އެވެ.

މެޗުގެ ސެޓުތައް ދިޔައީ 20-07، 03-25 އަދި 17-14 އިންނެވެ.

އަންހެން ސިންގަލްސް ފައިނަލްގައި ވިދާދު ވާދަކޮށްފައި ވަނީ ފާތިމަތު ރަޔާނާއާ އެވެ. އެ މެޗުގައި ވިދާދު ވަނީ ދެ ސެޓު އެއް ސެޓުން ރަޔާނާގެ މައްޗަށް ކުރި ހޯދައިފަ އެވެ. މެޗުގެ ފުރަތަމަ ސެޓު ވިދާދު ކާމިޔާބު ކުރީ 13-10 އިންނެވެ. ނަމަވެސް ރަޔާނާ ވަނީ ދެ ވަނަ ސެޓު 17-18 އިން ކާމިޔާބު ކޮށްފަ އެވެ. ތިން ވަނަ ސެޓުގައި 19-12 އިން ރަޔާނާގެ މައްޗަށް ކުރި ހޯދައި ވިދާދު ވަނީ ޗެމްޕިއަންކަން ހޯދައިފަ އެވެ.

މިއަހަރުގެ އެސޯސިއޭޝަން ކަޕްގައި ޖޫނިއާ ބައިގެ އިތުރުން އޯޕަން ސިންގަލްސް ވެސް ކުރިއަށް ގެންގޮސްފަ އެވެ. ޖޫނިއާ ބަައިގައި ވަނީ 15 އަހަރުން ދަށް އަދި 19 އަހަރުން ދަށް ކުރިއަށް ގެންގޮސްފަ އެވެ.