އެފްއޭއެމްގެ ޚާއްސަ ކޮންގްރެސްއެއް މާޗު މަހު ބާއްވަނީ

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އެކްސްޓްރާ އޯޑިނަރީ ކޮންގްރެސް އެއް، އަންނަ މާޗު ބަހު ބާއްވަން ތައްޔާރުވަމުން އަންނަ ކަމަށް، އެފްއޭއެމްގެ ނޯމަލައިޒިން ކޮމެޓީން ބުނެފި އެވެ.

ދާދި ފަހުން، ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ވަނީ ނޯމަލައިިޒިންގ ކޮމެޓީގެ މެމްބަރުންގެ އަދަދު، ފަސް މެމްބަރުން، ތިން މެމްބަރުންނަށް ބަދަލު ކޮށްފަ އެވެ. އަދި އެ ކޮމެޓީގެ އައު ޗެއަރމަނަކަށް ހަމަޖެއްސީ ކުރީގެ ޕްރޮސެކިއުޓަރ ޖެނެރަލް (ޕީޖީ) އަޙުމަދު މުޢިއްޒު އެވެ.

"ރާއްޖެ އެމްވީ" އާއި ވާހަކަ ދައްކަވަމުން ނޯމަލައިޒިންގ ކޮމެޓީގެ ޗެއަރމަން މުޢިއްޒު ވިދާޅުވީ މާޗު މަހުގެ 15 ވަނަ ދުވަހު އެފްއޭއެމްގެ އެކްސްޓްރާ އޯޑިނަރީ ކޮންގްރެސް އެއް ބާއްވަން މަސައްކަތް ކުރައްވަމުން އަންނަ ކަމަށެވެ. އަދި އެއީ ދެ ކަމަކަށް އަމާޒުކޮށްގެން ބާއްވާ ކޮންގްރެސްއެއް ކަމަަށް ވެސް ވިދާޅުވި އެވެ.

އެގޮތުން އެއީ 2023 ވަނަ އަހަރާއި 2024 ވަނަ އަހަރު، އެފްއޭއެމްގެ އޯޑިޓްތައް ކުރުމަށް، އޮޑިޓަރުން އައްޔަން ކުރުމަށް ބާއްވާ އެކްސްޓްރާ އޯޑިނަރީ ކޮންގްރެސް އެއް ކަމަށް ވިދާޅުވި އެވެ. މީގެ އިތުރުން، އޭޕްރީލް މަހުގެ ތެރޭގައި ފުޓުބޯޅަ ސީޒަން ފެށުމަށް މަސައްކަތް ކުރަމުން އަންނައިރު، އޭގެ ކުރިން އެކުލަވާލަން ޖެހޭ ޖުޑީޝަލް ކޮމެޓީތައް އެކުލަވާލުން ވެސް އޮންނާނެ ކަމަށް މުޢިއްޒު ވިދާޅުވި އެވެ.

މީގެ އިތުރުން މިހާރު ނޯމަލައިޒިންގ ކޮމެޓީން ކުރަމުން އަންނަ މަސައްކަތްތަކުގެ އެންމެ ފަހުގެ ތަފުސީލުތައް، މެމްބަރުންނަށް ހިއްސާ ކުރުން ވެސް އޮންނާނެ އެވެ. އެކްސްޓްރާ އޯޑިނަރީ ކޮންގްރެސް އަށް ފަހު، އޮޑިޓު ކުރުން ނިމުމާއެކު، އިތުރު ކޮންގްރެސްއެއް ބާއްވާނެ ކަމަށް ވެސް ނޯމަލައިިޒިންގ ކޮމެޓީން ވަނީ މައުލޫމާތު ދީފަ އެވެ.

އެފްއޭއެމްގެ ނޯމަލައިޒިންގ ކޮމެޓީން މިހާރު ނިންމާފައި ވަނީ އޭޕްރީލް މަހުގެ އަށް ވަނަ ދުވަހު ޗެރިޓީ ޝީލްޑު މެޗު ކުޅުމަށެވެ. އަދި އޭގެ ފަހުން އޭޕްރީލް މަހުގެ 10 ވަނަ ދުވަހު ދިވެހި ޕްރިމިއާ ލީގުގެ ކުޅުން ފެށުމަށެވެ.

ޗެރިޓީ ޝީލްޑު މެޗަށްފަހު ކުރިން ތާވަލުކޮށްފައި އޮތް ޕްރެޒިޑެންޓްސް ކަޕް މިހާރު އޮތީ އޮކްޓޫބަރު މަހުގެ 20 ވަނަ ދުވަހު ފަށަން ތާވަލުކޮށްފަ އެވެ.

ތިން ވަނަ ޑިވިޝަންގެ ފުޓުބޯޅަ މުބާރާތް ފަށާނެ ތާރީޚަކަށް ހަމަޖައްސާފައި އޮތީ ޖޫން މަހުގެ އެއް ވަނަ ދުވަހެވެ. އޭހެ ފަހުން ޖުލައި މަހުގެ 12 ވަނަ ދުވަހު އެފްއޭ ކަޕް ކުޅުމަށް ވަނީ ތާވަލުކޮށްފަ އެވެ. އަދި ޖުލައި 18 ވަނަ ދުވަހު ދެ ވަނަ ޑިވިޝަން ފުޓުބޯޅަ މުބާރާތް ފެށުމަށް ވަނީ ހިމަނައިފަ އެވެ.

މީގެ އިތުރުން ކުރިއަށް އޮތް މާޗު މަހުގެ ތެރޭގައި ބައިނަލްއަޤުވާމީ ރަޙުމަތްތެރިކަމުގެ މެޗެއް ކުޅުމަށް ވެސް ރާއްޖެ އިން ވަނީ ނިންމައިފަ އެވެ. އެ މެޗުގައި މާޗު މަހުގެ 19 ވަނަ ދުވަހު ރާއްޖެ އިން ނިކުންނާނީ އަވައްޓެރި އިންޑިއާއާ ދެކޮޅަށެވެ.