ޖަރުމަނު ލީގުގައި އައިންޓްރަކްޓް ފްރޭންކްފާޓާ ދެކޮޅަށް ކުޅުނު މެޗުން މޮޅުވެ، ބަޔާން މިއުނިކް އިން އެއް ވަނައިގައި އަށް ޕޮއިންޓުގެ ލީޑެއް ނަގައިފި އެވެ.

ބަޔާންގެ އަމިއްލަ ދަނޑު، އަލިއާންޒް އެރީނާގައި އާދީއްތަ ދުވަހުގެ ރޭ ކުޅުނު މެޗުން އެ ޓީމު މޮޅުވީ 4-0 އިންނެވެ. މެޗުގެ ފުރަތަމަ ހާފުގައި ބަޔާނުން އެއް ލަނޑު ޖެހިއިރު، ދެ ވަނަ ހާފުގައި ވަނީ އިތުރު ތިން ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގައި ބަޔާނަށް ލީޑު ނަަގައިދިނީ މައިކަލް އޮލައިސޭ އެވެ. އެއީ ލެރޯއީ ސާނޭ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގެ ދެ ވަނަ ހާފުގައި ބަޔާންގެ ދެ ވަނަ ލަނޑެއް ޖަހައި، ލީޑު ފުޅާ ކޮށްދިނީ ހިރޯކީ އިޓޯ އެވެ. މެޗުގައި ބަޔާންގެ ފަހު ދެ ލަނޑު ވެސް އެ ޓީމުން ޖެހީ މެޗުގެ ފަހު ދިހަ މިނެޓުގެ ތެރޭގަ އެވެ.

އެގޮތުން މެޗުގެ 83 ވަނަ މިނެޓުގައި ޖަމާލް މުސިއާލާ ވަނީ ބަޔާންގެ ތިން ވަނަ ލަނޑު ޖަހައިފަ އެވެ. އަދި މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ބަޔާންގެ ހަތަރު ވަނަ ލަނޑު ޖެހީ ސާޖް ގްނަބްރީ އެވެ. އެއީ ކިންގްސްލީ ކޯމަން ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މޮޅާއެކު ބަޔާން އެއް ވަަނައިގައި އޮތީ މިހާތަނަށް އެ ޓީމު ކުޅެފައިވާ 23 މެޗުން 58 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަަނައިގައި އޮތް އެންމެ ފަހުގެ ޗެމްޕިއަން ބަޔާ ލެވަކޫސަނަށް ލިބެނީ 50 ޕޮއިންޓެވެ. ބަޔާން އަތުން ބަލިވި ފްރޭންކްފާޓަށް ތިން ވަނައިގައި ލިބެނީ 42 ޕޮއިންޓެވެ.