ސްޕެނިޝް ލީގުގައި ޖިރޯނާއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ރެއާލް މެޑްރިޑުން ލީގު ރޭހުގައި ވިއްދައިފި އެވެ.

ރެއާލްގެ އަމިއްލަ ދަނޑުގައި އާދީއްތަ ދުވަހުގެ ރޭ ޖިރޯނާއާ ދެކޮޅަށް ކުޅުނު މެޗުން އެ ޓީމު މޮޅުވީ 2-0 އިންނެވެ. މެޗުގެ ފުރަތަަމަ ހާފުގައި ރެއާލް އިން އެއް ލަނޑު ޖެހިއިރު، ދެ ވަނަ ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 41 ވަނަ މިނެޓުގައި ރެއާލަށް ލީޑު ނަގައިދިނީ ކްރޮއޭޝިއާގެ ލޫކާ މޮޑްރިޗް އެވެ. އެއީ ޖިރޯނާގެ އޭރިޔާ ބޭރުން ލިބުނު ބޯޅައެއް، ގޯލުގެ މަތީ ކަނަށް ފޮނުވާލައިގެން މޮޑްރިޗް ޖެހި ހިތްގައިމު ލަނޑެކެވެ.

މެޗުގެ ފަހު ވަގުތުގައި ރެއާލްގެ ދެ ވަނަ ލަނޑު ޖެހީ ބްރެޒިލްގެ ވިނީޝިއުސް ޖޫނިއާ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ފްރާންސްގެ ކެޕްޓަން ކީލިއަން އެމްބާޕޭ އެވެ.

މޮޅާއެކު ރެއާލް ދެ ވަނައިގައި އޮތީ މިހާތަނަށް އެ ޓީމު ކުޅެފައިވާ 25 މެޗުން 54 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން އެއް ވަަނައިގައި އޮތް ވާދަވެރި ބާސެލޯނާ އަށް ވެސް ލިބެނީ 54 ޕޮއިންޓެވެ. ނަމަވެސް ލަނޑުގެ ތަފާތުން ކުރި ހޯދަނީ ބާސެލޯނާ އެވެ.