މިހާރު ކުރިއަށްދާ ގޯލްޑަން ފުޓްސަލް ޗެލެންޖުގެ ސެމީ ފައިނަލްގައި ގދ.ވާދޫގެ މައްޗަށް ކުރި ހޯދައި، ކ.ކާށިދޫ އިން މުބާރާތުގެ ފައިނަލްގެ ޖާގަ ހޯދައިފި އެވެ.

ހުކުރު ދުވަހުގެ ރޭ ހުޅުމާލޭ ރެހެންދި ފުޓްސަލް ދަނޑުގައި ކުޅުނު ސެމީ ފައިނަލް މެޗު ކާށިދޫ އިން ކާމިޔާބު ކުރީ 4-2 އިންނެވެ.

މެޗުގައި ވާދޫ އިން ލަނޑު ޖަހައި ކުރި ހޯދާއި ވަނިކޮށް، ކާށިދޫ އިން ނަތީޖާ ހަމަހަމަކޮށް ލީޑު ވެސް ނެގި އެވެ. އޭގެ ފަހުން ވާދޫ އިން ނަތީޖާ ހަމަހަމަ ކުރިއިރު، އިތުރު ދެ ލަނޑު ޖަހައިގެން ކާށިދޫ ވަނީ މެޗުން މޮޅުވެފަ އެވެ.

މެޗު ފަށައިގެން ކުރީ ކޮޅު ވާދޫ އިން ލީޑު ނެގީ ނަޝާހު އަޙުމަދު ޖެހި ލަނޑުންނެވެ. ނަމަވެސް އޭގެ ފަހުން ވާދޫގެ ކެޕްޓަން އަޔާޒް އަޙުމަދު (އަޔާ) އަތުން ބައި ކޮޅަށް ވަތް ލަނޑާ އެކު ކާށިދޫ އިން ވަނީ ނަތީޖާ ހަމަހަމަ ކޮށްފަ އެވެ.

މެޗުގެ ދެ ވަނަ ހާފުގައި ފުރަތަމަ ފަހަރަށް ކާށިދޫ އަށް ލީޑު ނަގައިދިނީ އަޖުލާން ޢަބްދުލް ޙަންނާން އެވެ. ނަމަވެސް، އޭގެ މިނެޓެއް ފަހުން ނަޝާހު ވަނީ ލަނޑު ޖަހައި ވާދޫ އަށް މެޗުގެ ނަތީޖާ ހަމަހަމަ ކޮށްދީފަ އެވެ.

ވާދޫ އިން ނަތީޖާ ހަމަހަމަ ކުރިތާ ދެ މިނެޓު ފަހުން އިސްމާއީލް ރަޔާން ވަނީ ލަނޑު ޖަހައި ކާށިދޫ އަށް ކުރި ހޯދައިދީފަ އެވެ. އަދި ޖެހިގެން އައި މިނެޓުގައި ދެ ވަނަ ލަނޑެއް ޖަހައި އޭނާ ވަނީ ކާށިދޫގެ ލީޑު ފުޅާ ކޮށްފަ އެވެ.

ވާދޫ ބަލިކޮށް ކާށިދޫ އިން މުބާރާތުގެ ފައިނަލްގެ ޖާގަ ހޯދިއިރު، މިއީ ކާށިދޫ އިން މުބާރާތުގެ ފައިނަލްގެ ޖާގަ ހޯދި ފުރަތަމަ ފަހަރެވެ. އަންގާރަ ދުވަހުގެ ރޭ އޮންނަ ފައިނަލް މެޗުގައި ކާށިދޫ ނިކުންނާނީ ހދ.ނައިވާދޫއާ ދެކޮޅަށެވެ.