ގަން ބަލިކޮށް، ނައިވާދޫ ފައިނަލަށް

މިހާރު ކުރިއަށްދާ ގޯލްޑަން ފުޓްސަލް ޗެލެންޖުގެ ސެމީ ފައިނަލްގައި ލ.ގަން ބަލިކޮށް، ހދ.ނައިވާދޫ އިން މުބާރާތުގެ ފައިނަލްގެ ޖާގަ ހޯދައިފި އެވެ.

ހުޅުމާލޭ ރެހެންދި ފުޓްސަލް ދަނޑުގައި ހުކުރު ދުވަހުގެ ރޭ ކުޅުނު ސެމީ ފައިނަލްގައި ނައިވާދޫ އިން ވަނީ 3-1 އިން ގަން ބަލިކޮށްފަ އެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ނައިވާދޫ އިންނެވެ. ނަމަވެސް އޭގެ ފަހުން ގަމުން ވަނީ ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ. އޭގެ ފަހުން އިތުރު ދެ ލަނޑު ޖަހައިގެން ނައިވާދޫ ވަނީ މުބާރާތުގެ ފައިނަލްގެ ޖާގަ ހޯދައިފަ އެވެ.

މެޗުގައި ނައިވާދޫފގެ ފުރަތަމަ ލަނޑު ޖަަހައި އެ ޓީމަށް ކުރި ހޯދައިދިނީ 10 ވަނަ މިނެޓުގައި މުޙައްމަދު ޝާއިން އެވެ. އޭގެ ހަ މިނެޓު ފަހުން އަޙުމަދު ޙަލީމް (އައްމަޑޭ) ޖެހި ލަނޑުން ގަމުން ވަނީ ނަތީޖާ ހަމަހަމަ ކޮށްފަ އެވެ.

މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި ދެ ވަނަ ފަހަރަށް ނައިވާދޫ އަށް ލީޑު ނަގައިދިނީ އަޙުމަދު ޙަމީދު އެވެ. އޭގެ ފަހުން މެޗު ނިމެން މިނެޓަކަށް ވެފައި ވަނިކޮށް ޝާއިން ވަނީ ނައިވާދޫގެ ދެ ވަނަ ލަނޑެއް ވެސް ޖަހައިފަ އެވެ.

މިއީ ގޯލްޑަން ފުޓްސަލް ޗެލެންޖުގެ ފައިނަލްގެ ޖާގަ ނައިވާދޫ އަށް ލިބުނު ފުރަތަމަ ފަހަރެވެ. ނައިވާދޫ އަތުން ބަލިވެ މުބާރާތުން ކެޓި ގަމަކީ، މިއަހަރުގެ ޗެރިޓީ ޝީލްޑު ކާމިޔާބު ކުރި ޓީމެވެ. މުބާރާތުގެ އަތޮޅު ބުރުގެ ފައިނަލްގައި ގަން ވަނީ ލ.އިސްދޫ އަތުން ބަލިވެފަ އެވެ. އަދި ޒޯން ފައިނަލްގައި ވަނީ ތ.ތިމަރަފުށި އަތުން ވެސް ބަލިވެފަ އެވެ.