ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ނޯމަލައިޒިންގ ކޮމެޓީގެ ޗެއާމަންކަމުން އަޙުމަދު ޒުހޫރު ވަކި ކުރުމުގެ ފަހަތުގައި އޮތީ ސަރުކާރުކަން އެނގިއްޖެ އެވެ.

ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ރާއްޖެ ނޯމަލައިޒް ކުރަން ނިންމީ މިދިޔަ އަހަރު އެވެ. އެއަށްފަހު ފަސް މެމްބަރުންގެ މައްޗަށް އެކުލެވޭ ނޯމަލައިޒިން ކޮމެޓީއެއް ވަނީ އައްޔަން ކޮށްފަ އެވެ. އެ ކޮމެޓީގެ ޗެއާމަނަކަށް ފީފާ އިން ހަމަޖެއްސީ ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމުގެ ވެރިކަމުގައި ވަޒީރުކަން ވެސް ކުރެއްވި ޒުހޫރު އެވެ.

އެފްއޭއެމްގެ ނޯމަލައިޒިން ކޮމެޓީގެ ޗެއާމަނަކަށް ހަމަޖެއްސުމުގެ ކުރިން ޒުހޫރު ހުންނެވީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ޗެއާމަންކަމުގެ މަގާމުގަ އެވެ. އެ މަޤާމަށް ޒުހޫރު ހަމަޖެއްސީ 2024 ވަނަ އަހަރުގެ ފެބްރުވަރީ މަހުގެ 19 ވަނަ ދުވަހު އެވެ. ނަމަވެސް، އެ އަހަރުގެ މެއި މަހުގެ 22 ވަނަ ދުވަހު ވަނީ ޒުހޫރު އެ މަގާމުން ވަކިކޮށްފަ އެވެ.

އެފްއޭއެމްގެ ނޯމަލައިޒިން ކޮމެޓީގެ ޗެއާމަންކަމުގެ މަގާމުން ޒުހޫރު ވަކި ކުރަން ފީފާ އިން ނިންމީ މިދިޔަ ބުރާސްފަތި ދުވަހު އެވެ. ފަސް މެމްބަރުންގެ ކޮމެޓީގެ އަދަދު ތިން މެމްބަރުންނަށް މަދުކޮށް، އެ ކޮމެޓީގެ ޗެއާމަންކަމަށް ދެން ހަމަޖެއްސީ ކުރީގެ ޕްރޮސެކިއުޓަރ ޖެނަރަލް (ޕީޖީ) އަޙުމަދު މުޢިއްޒު އެވެ.

އެނގިފައިވާ ގޮތުގައި އެފްއޭއެމްގެ ނޯމަލައިޒިން ކޮމެޓީން ޒުހޫރު ވަކި ކުރަން ފީފާ އިން ނިންމީ، ސަރުކާރުން އެކަމަށް އެދިގެންނެވެ. އެކަމުގެ މައުލޫމާތު އިނގޭ ފަރާތަކުން "ރާއްޖެ އެމްވީ" އަށް ވިދާޅުވީ، އެފްއޭއެމްގެ ނޯމަލައިޒިން ކޮމެޓީން ޒުހޫރު ވަކި ކުރަން ސަރުކާރުން ބޭނުންވާތާ ވަރަށް ދުވަސްވެފައިވާ ކަމަށެވެ.

އެގޮތުން އެޗްޑީސީގެ ޗެއާމަންކަމުގައި ޒުހޫރު ހުންނަވަނިކޮށް، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އަށް ޒުހޫރު ފޮނުވި ސިޓީ ލީކުވީ ހިސާބުން، ސަރުކާރާއި ޒުހޫރުގެ ގުޅުން ވަރަށް ބޮޑަށް ގޯސްވި ކަމަށް އޭނާ ބުންޏެވެ. އޭގެ ކުރިން ވެސް ސަރުކާރުން ޒުހޫރާ މެދު ހިތްހަމަ ނުޖެހޭ ކަމަށް އޭނާ ބުންޏެވެ.

އެގޮތުން ނޯމަލައިޒިން ކޮމެޓީގެ ޗެއާމަންކަމަށް ޒުހޫރު ހަމަޖައްސައި، މެމްބަރުންނާ އެކު އެ ކޮމެޓީން މަސައްކަތް ކުރަން ފެށި ފަހުން، ރައީސް މުޢިއްޒުއާ ބައެްދަލު ކުރަން އެދި ނޯމަލައިޒިން ކޮމެޓީން ވަނީ ހަތަރު ސިޓީއެއް ވެސް ފޮނުއްވައިފަ އެވެ. އަދި އޭގެން އެއްވެސް ސިޓީ އަކަށް ރައީސުލްޖުމްހޫރިއްޔާގެ އޮފީހުން އޮތީ ޖަވާބު ނުދީ އެވެ. އެހެންވެ، މިދިޔަ މުއްދަތުގައި ނޯމަލައިޒިން ކޮމެޓީ އަށް ރައީސް މުޢިއްޒުއާ ބައްދަލު ކުރެެވޭ ގޮތެއް ނުވި އެވެ.

މީގެ އިތުރުން ދާދި ފަހުން ފެށި އެފްއޭއެމް ޔޫތު ޗެމްޕިއަންޝިޕް ފަސް ކުރުމަށް ސަރުކާރުން ބޭނުން ވެގެން އެކަމަށް އެދިފައި ވަނިކޮށް، އެ މުބާރާތް ފަސް ނުކޮށް ކުރިއަށް ގެންދަން ނިންމުމުން ވެސް، އެކަމުގައި ސަރުކާރުގެ ނުރުހުން ޒުހޫރަށް އޮތެވެ.

އެގޮތުން މުބާރާތް ފަށަން ހަތަރު ގަޑި އިރަށް ވެފައި ވަނިކޮށް ކުޅިވަރު ވަޒީރު ޢަބްދުﷲ ރާފިޢު ޒުހޫރަށް ގުޅުއްވައި، އެ މުބާރާތް ފެށުން ފަސްކޮށްދިނުމަށް އެދުނެވެ. އެއީ އެޑިއުކޭޝަން މިނިސްޓަރު ޑޮކްޓަރު އިސްމާއީލް ޝަފީއުގެ އެދުމުގެ މަތިންނެވެ. އެގޮތަށް އެދުނީ ބައެއް ބެލެނިވެރިންގެ ކަންބޮޑުވުންތައް ހުރުމުން ކަމަށް ބުނެ އެވެ.

އެކަމަކު އެފްއޭއެމްގެ ޓެކްނިކަލް ކޮމެޓީ އާއި ވަޒީރު ރާފިޢުއާއެކު ބޭއްވި ބައްދަލުވުމަށް ފަހު ވެސް، އެ ކޮމެޓީ އަށް ފެނުނީ މުބާރާތް ކުރިއަށް ގެންދިޔުމަށެވެ. އެއީ ރާއްޖޭގައި ފުޓުބޯޅައިގެ ޙަރަކާތްތަތައް ހުއްޓިފައި އޮންނަތާ ގިނަ ދުވަސްވުމާއި، މުބާރާތް ފަށަން ކުލަބުތަކުން ތައްޔާރުވެ، މުބާރާތް ފަށަން މަދު ވަގުތު ކޮޅަކަށް ވެފައި ވަނިކޮށް މުބާރާތް ފަސް ކުރަން ޓެކްނިކަލް ކޮމެޓީ އަށް ނުފެނުމުންނެވެ.

އެގޮތަށް ނިންމުމުން ޒުހޫރަށް ސަރުކާރުގެ ނުރުހުން ވަަރަށް ބޮޑަށް އަމާޒުވި އެވެ. އެކަން އެހެން އޮއްވާ، މިދިޔަ ބުރާސްފަތި ދުވަހުގެ ހަވީރު ޔޫތު ޗެމްޕިއަންޝިޕުގައި ކުލަބު އީގަލަސް އާއި މާޒިޔާ ސްޕޯޓްސް އެންޑް ރެކްރިއޭޝަން ބައްދަލު ކުރި މެޗު ނިމުނުތަނާ، ފީފާ އިން ވަނީ ޒުހޫރު ވަކި ކުރަން ނިންމާފައިވާކަން އަންގައިފަ އެވެ. އަދި އެ ނިންމުން ނިންމަން ޖެހުނީ ސަރުކާރަށް ޒުހޫރުގެ އެއްބާރުލުން ނުލިބި، ސަރުކާރަށް ޒުހޫރު ދަތި ކުރަން މަސައްކަތް ކުރާ ކަމަށް ބުނެ އެވެ.

ނަމަވެސް މިހާތަނަށް އައިއިރު، ޒުހޫރު ވަކި ކުރަން ނިންމިކަން ފީފާ އިން ރަސްމީކޮށް ލިޔުމުން އަންގާފައި ނެތް ކަމުގެ މައުލޫމާތު ވެސް މި ނޫހަށް ވަނީ ލިބިފަ އެވެ.