ޓިކްޓޮކް އެނބުރި އެޕަލް އަދި ގޫގުލްގެ އެޕް ސްޓޯ ތަކަށް

އެމެރިކާގެ ރައީސް ޑޮނަލްޑް ޓްރަމްޕް ޗައިނާގެ އުފެއްދުމެއް ކަމަށްވާ ސޯޝަލް މީޑިއާ އެޕް ޓިކްޓޮކް އެމެރިކާގައި މަނާކުރުން ފަސްކުރައްވާ، އެޕް ޑިސްޓްރިބިއުޓް ކުރުމާއި ބޭނުންކުރުމުން ޖޫރިމަނާ ނުކުރާނެކަމުގެ ޔަޤީންކަން ދެއްވުމާއެކު، ބުރާސްފަތި ދުވަހު އެޕަލް އަދި ގޫގުލްގެ އެމެރިކާގެ އެޕް ސްޓޯތަކަށް ޓިކްޓޮކް އަނބުރާ އައިސްފިއެވެ.

ގާތްގަނޑަކަށް އެމެރިކާގެ އާބާދީގެ ދެބައިކުޅަ އެއްބައި މީހުން ބޭނުން ކުރާ މަޤްބޫލު ކުރު ވީޑިއޯ އެޕް، ޖެނުއަރީ 19 ވަނަ ދުވަހު ސަލާމަތީ ސަބަބުތަކަށްޓަކައި ކަމަށް ބުނެ ޢަމަލު ކުރަން ފެށި ޤާނޫނެއްގެ ސަބަބުން، އެޕްގެ ޗައިނާގެ ވެރިފަރާތް ކަމުގައިވާ ބައިޓް ޑާންސް އިން އެޕް ވިއްކާލުން ނުވަތަ ހުއްޓާލުމާ ކުރިމަތިލާން ޖެހުމާއެކު، ކުރު މުއްދަތަކަށް އެޕް ސްޓޯރ ތަކުން އެޕް ވަނީ ނަގާފައެވެ.

ގާނޫނު ތަންފީޒު ކުރަން ފެށި ދުވަހާ ޖެހިގެން އައި ދުވަހު ޓްރަމްޕް ވަނީ އެގްޒެކެޓިވް އޯޑަރެއްގައި ސޮއި ކުރައްވާ، އެޕް އެމެރިކާގައި ބޭނުން ކުރުން ހުއްޓާލުން ތަންފީޒުކުރަން ދީފައި އޮތް ތާރީޚް 75 ދުވަހަށް ފަސްކޮށްދެއްވައި، ވަގުތީގޮތުން އެމެރިކާގައި ޓިކްޓޮކްގެ ޚިދުމަތް ކުރިއަށް ގެންދިއުމަށް ހުއްދަ ދެއްވާފައެވެ.

ޓްރަމްޕް ދެއްވި ޔަޤީން ކަމާއެކު ޓިކްޓޮކް ގެ ޚިދުމަތް އަލުން ފެށި ނަމަވެސް، ގޫގުލް އަދި އެޕަލްއިން ވަނީ އެމެރިކާގެ އެޕް ސްޓޯތަކުން އެޕް ނަގަން ނިންމި ނިންމުން ދަމަހައްޓާފައެވެ.

އެމެރިކާގައި ފާއިތުވި އަހަރު ދެވަނަ އަށް އެންމެ ގިނައިން ޑައުންލޯޑް ކުރި އެޕް ކަމުގައިވާ ޓިކްޓޮކް، ބުރާސްފަތި ދުވަހު އެމެރިކާގެ އެޕް ސްޓޯތަކުން އަލުން ޑައުންލޯޑް ކުރެވޭ ގޮތް ވަނީ ހަދާފައެވެ.

ދިރާސާ ކުރާ ފަރާތްތަކުގެ ބުނާ ގޮތުގައި އެޕް ސްޓޯރ ތަކުން އެ އެޕް ހޯސްޓް ކުރުން ލަސްކުރީ އެޕް ޑިސްޓްރިބިއުޓް ކުރިޔަސް ދަޢުވާ ނުކުރާނެ ކަމުގެ ޔަޤީން ކަމަށް ގޫގުލް އަދި އެޕަލްއިން އިންތިޒާރު ކުރަމުން ދިޔުމުގެ ސަބަބުން ކަމަށް ބެލޭ ކަމުގައެވެ.

ޓްރަމްޕް ނެރުއްވި އިރުޝާދުގައި ބުނެފައިވަނީ މޮބައިލް އެޕްލިކޭޝަން ސްޓޯތައް ނުވަތަ ޑިޖިޓަލް މާކެޓްޕްލޭސްތައް ހިންގާ ކުންފުނިތަކަކީ، އެތަންތަން ބޭނުންކުރާ ފަރާތްތަކަށް އެޕްތައް ބަލައި، ޑައުންލޯޑްކޮށް އަދި އަޕްޑޭޓްކުރެވޭ ތަންތަނަށް ވާތީ، ޓިކްޓޮކް އެޕް ހިންގަމުން ގެންދިއުމަކުން އެއިން ފަރާތަކަށް އެއްވެސް އަދަބެއް ނުދެވޭނެ ކަމަށެވެ.

މާކެޓް އިންޓެލިޖެންސް ކުންފުންޏެއް ކަމުގައިވާ ސެންސަރ ޓަވަރގެ މަޢުލޫމާތުން ދައްކާގޮތުގައި، 2024 ވަނަ އަހަރު ޓިކްޓޮކް 52 މިލިއަނަށްވުރެ ގިނަ ފަހަރު ޑައުންލޯޑް ކޮށްފައިވެއެވެ.