މާލެ ސިޓީ ކައުންސިލްގެ ބަހެއް ނެތި އެކުލަވާލާ ފްލެޓް ލިސްޓެއް ބަލައެއް ނުގަންނާނަން - އާޒިމް
މިހާރު އެކުލަވާލާ ފްލެޓް ލިސްޓެއްގައި ސިޓީ ކައުންސިލްގެ ބައިވެރިވުން ނެތްކަން އާޒިމް ފާހަގަކުރެއްވި
މާލެ ސިޓީގެ މޭޔަރ އާދަމް އާޒިމް
މާލެ ސިޓީ ކައުންސިލްގެ ބަހެއް ނެތި އެކުލަވާލާ ފްލެޓް ލިސްޓެއް ބަލައި ނުގަންނާނެ ކަމަށް މާލެ ސިޓީގެ މޭޔަރ އާދަމް އާޒިމް ވިދާޅުވެއްޖެއެވެ.
ނިމިދިޔަ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން އެކުލަވާލި ގެދޮރުވެރިޔާ ސިޔާސަތުގެ ދަށުން 4000 މީހުންނަށް ފްލެޓް ދިނުމަށް ނިންމާ އެ ފްލެޓް ލިބޭ މީހުންގެ ފައިނަލް ލިސްޓު އޭރުގެ ސަރުކާރުން ވަނީ އެކުލަވާލާފައެވެ. އެހެންނަމަވެސް ވެރިކަން ބަދަލުވުމުގެ ކުރިން އޭސީސީން ވަނީ އެ ފްލެޓް ލިސްޓާއި މެދު ބައެއް ޝަކުވާތައް ހުށަހެޅިފައިވާ ކަމަށް ބުނެ ފްލެޓް ދިނުމުގެ މަރުހަލާ ހުއްޓުވާފައެވެ.
އޭގެ ފަހުން އޭސީސީން މައްސަލަ ބަލާ ނިމުނުތާ ވެސް އެތައް ދުވަހެއް ވެފައިވާ އިރު ފްލެޓް ދޫކުރުމުގެ މަރުހަލާ ވަނީ މަޑު ޖެހިފައެވެ. ކުރިން ހައުސިން މިނިސްޓަރަކަށް އަލީ ހައިދަރު ހުންނެވި އިރު ވެސް ފްލެޓް ލިސްޓް އިވަލުއޭޓްކުރުމުގެ މަސައްކަތް ވަނީ ކުރިއަށް ގެންގޮސްފައެވެ. އަދި މިހާރުގެ ހައުސިން މިނިސްޓަރ ޑރ.އަބްދުﷲ މުއްތަލިބް ވަނީ ހައުސިން މިނިސްޓަރގެ މަޤާމާއި ހަވާލުވުމަށް ފަހު އަލުން އަނެއްކާވެސް ފްލެޓް ލިސްޓް އެކުލަވާލުމުގެ މަސައްކަތް ކުރަމުންދާ ކަމަށް ވިދާޅުވެފައެވެ.
އެހެންކަމަށް ވާއިރު އެ މަރުހަލާގައި ކިހާވަރަކަށް ސިޓީ ކައުންސިލްގެ ބައިވެރިވުން ހިމެނޭތޯ ސާފުކުރުމަށް ރާއްޖެއެމްވީން ސުވާލުކުރުމުން އާޒިމް ވަނީ ފްލެޓްގެ މައްސަލައިގެ ހަގީގަތް އެއްވެސް މިންވަރަކަށް ސިޓީ ކައުންސިލަށް ނޭނގޭކަން ހާމަކުރައްވާފައެވެ. ސިޓީ ކައުންސިލްގައި ފްލެޓް ކޮމިޓީ އެއް އޮތް ނަމަވެސް އެ ކޮމިޓީ އާއި އެއްވެސް މިންވަރަކަށް ފްލެޓާއި ގުޅުން ހުރި ކަންކަމާއި މެދު މަޝްވަރާކުރަމުން ނުދާކަން ފާހަގަކުރައްވާ އާޒިމް ވަނީ އެކަމާއި މެދު ކަންބޮޑުވުން ފާޅުކުރައްވާފައެވެ.
އާޒިމް ވަނީ އެކަމާއި މެދު ކަންބޮޑުވުން ފާޅުކޮށް ހޮނިހިރު ދުވަހު ހައުސިން މިނިސްޓްރީ އަށް ސިޓީ އެއް ފޮނުވަން ނިންމާފައިވާކަން ހާމަކުރައްވާފައެވެ. އެ ކައުންސިލްގެ ބައިވެރިވުން ނެތި އެކުލަވާލާ ލިސްޓަކީ ސައްހަ ލިސްޓެއްގެ ގޮތުގައި ބަލައި ނުގަންނާނެ ކަމަށާއި، އެކަމާއި މެދު ކައުންސިލްގެ ބައްދަލުވުންތަކުގައި ވެސް މަޝްވަރާކުރައްވާފައިވާނެ ކަމަށް އެނާ ވަނީ ވިދާޅުވެފައެވެ.
ގެދޮރުވެރިޔާ ސްކީމަށް ކުރިމަތިލީ 20،000 މީހުންގެ ތެރެއިން ސަރުކާރުން އިވަލުއޭޓްކުރުމުގެ މަސައްކަތް ކުރިއަށް ގެންދަނީ ފްލެޓް ދިނުމަށް ނިންމާފައިވާ 4000 މީހުންގެ ފުލެޓުގައި ހިމެނޭ ނަންތައް އެކަންޏެވެ. އެ ނިންމުން ނިންމާފައި ވަނީ ވެސް ސިޓީ ކައުންސިލްގެ ބައިވެރިވުމަކާއި ނުލައެވެ.
ގެދޮރުވެރިޔާ ސްކީމުން ފުލެޓަށް އެދި ހުށަހެޅި މީހުންގެ ތެރެއިން ޝަރުތު ހަމަވި 15،000 އަށްވުރެ ގިނަ މީހުންނަށް ފުލެޓު ދިނުމަށް އެމްޑީޕީ ސަރުކާރުން އޮތީ ނިންމައިފައެވެ.
ރައީސް މުއިއްޒު ވަނީ ބަޔަކަށް ލިބިފައި އޮތް ފުލެޓެއް އަތުލުމުގެ ވިސްނުންފުޅެއް ނެތް ކަމަށް ވެރިކަމަށް އައުމުގެ ކުރިން ވިދާޅުވެފައެވެ. އަދި ފުލެޓު ލިބޭ މީހުންގެ ދާއިމީ ލިސްޓު، މި ރޯދަ މަހުގެ ކުރިން އިއުލާނުކުރެވޭނެކަމުގެ ބޮޑު ޔަޤީންކަމެއް އެބައޮތް ކަމަށް ވެސް މުއިއްޒު ވަނީ ވިދާޅުވެފައެވެ.
ރޯދަ މަސް ފެށެން ދެ ހަފްތާ އަށް ވެފައިވާ އިރު މިހާތަނަށް އައި އިރު ވެސް އިވަލުއޭޝަން މަރުހަލާ ކުރިއަށް ގެންގޮސްފައިވާ ހިސާބު ސަރުކާރުން ހާމައެއް ނުކުރެއެވެ. އެހެންކަމުން ރައީސް ވިދާޅުވި ގޮތަށް ރޯދަ މަހާއި ހިސާބަށް ވެސް ފްލެޓް ލިސްޓު އާއްމުކުރެވިދާނެ ކަމާއި މެދު ވަނީ ސުވާލު އުފެދިފައެވެ.
