ހުސްވި 2024 ވަނަ އަހަރު ފަތުރުވެރިކަން ކުރިއެރި ނިސްބަތައް ބަލާއިރު ދިވެހި ރާއްޖެ ހިމެނޭ ގޮތުން ދުނިޔޭގެ އެތައް މަންޒިލެއް ފަހަތައް ޖައްސާ ސައުދީ އަރަބިއްޔާ ކުރި ހޯދައިފިއެވެ.

ރާއްޖޭގެ އިތުރުން ބަޙްރައިން، ޓެންޒޭނިއާ، ޕިއުޓޯ ރިކޯ، ޖަޕާން، ބްރެޒިލް، ޔޫކޭ އަދި ފްރާންސް ފަދަ ޤައުމުތައް ފަހަނައަޅައި 69 އިންސައްތައިގެ ބޮޑު ކުރިއެރުމެއް ސައުދީން ވަނީ ހޯދާފައެވެ.

އދ. ގެ ފަތުރުވެރިކަމާ ބެހޭ ތަފާސްހިސާބަށް ބަލާއިރު، 2024 ވަނަ އަހަރު ދުނިޔޭގެ ޓޫރިޒަމް ދާއިރާއަށް ވަރަށް ބޮޑު ކުރިއެރުމެއް ލިބި، ބައިނަލްއަޤްވާމީ ފަތުރުވެރިންގެ އަދަދު 1 ބިލިއަނަށް އަރައި، ކޮވިޑްގެ ކުރިން ފަތުރުވެރިކަން އޮތް މިންވަރާ ވަރަށް ކައިރި ކުރިއެވެ. ގިނަ ޤައުމުތަކުން ވަރުގަދަ ކުރިއެރުމެއް ފާހަގަކުރިއިރު، އޭގެ ތެރެއިން އެއް ގައުމެއް ވަނީ ވަކިން ބޮޑަށް ފާހަގަ ކުރެވިފައެވެ - އެއީ ސަޢޫދީ ޢަރަބިއްޔާއެވެ.

ސައުދީ އަރަބިއްޔާ އަށް މިދިޔަ އަހަރު ޒިޔާރަތް ކުރި ފަތުރުވެރިންގެ އަދަދު އޭގެ ކުރީ އަހަރާ އަޅާ ބަލާއިރު 69 އިންސައްތައިގެ ކުރިއެރުމެއް ލިބުން އެއީ ހައިރާންކުރުވަނިވި ކުރިއެރުމެއް ކަމަށް ޓްރެވެލް އެންޑް ޓުއަރ ވޯލްޑް ވެބްސައިޓުގައި ބުނެފައިވެއެވެ.

ފަތުރުވެރިކަމަށް މަޝްހޫރު އެހެން ބައެއް މަންޒިލުތަކުގައި ފަތުރުވެރިކަން ކުރިއެރި ނިސްބަތައް ބަލާއިރު ބަޙްރައިން 52 އިންސައްތަ، ޓެންޒޭނިއާ 43 އިންސައްތަ، ޕިއުޓޯ ރިކޯ 23 އިންސައްތަ، ދިވެހިރާއްޖެ 20 އިންސައްތަ، ޖަޕާން 16 އިންސައްތަ، ބްރެޒިލް 5 އިންސައްތަ، ޔޫކޭ އިންސައްތަ އަދި ފްރާންސް 1 އިންސައްތަ ހާސިލު ކޮށްފައިވެއެވެ.

ސަޢޫދީ ޢަރަބިއްޔާއިން މި ބޮޑު ކުރިއެރުން ހޯދި ސަބަބުތަކުގެ ތެރޭގައި ދުރުވިސްނުންތެރި ލީޑަރޝިޕާއި، ރެކޯޑު އަދަދެއްގެ އިންވެސްޓްމަންޓްތަކާއި، އަދި ދުނިޔޭގެ ފަތުރުވެރިކަމުގެ މަރުކަޒަކަށް ވުމަށް ކުރެވުނު ހަރުދަނާ މަސައްކަތްތަކުގެ ނަތީޖާ ކަމަށް ޓްރެވަލް އެންޑް ޓުއަރ ވޯލްޑް އިން ބުނެފައިވެއެވެ. ދުނިޔޭގެ އެހެން ޤައުމުތަކުން އާންމު ޓޫރިޒަމް މޮޑެލްތަކަށް ބަރޯސާވިޔަސް، ސަޢޫދީ ޢަރަބިއްޔާއިން އައު ވިސްނުންތައް ވަނީ ތައާރުފް ކޮށްފައެވެ. އެންމެ މަތީ ފަންތީގެ މަންޒިލްތަކާއި، ދުނިޔޭގެ ފެންވަރުގެ ޘަޤާފީ ތަޖުރިބާތަކާއި، ކުރިއަރަމުންދާ މުނިފޫހިފިލުވުމުގެ ޞިނާޢަތެއް ތަރައްޤީކުރުން ފާހަގަ ކުރެވެއެވެ.

ޖަޕާން، ތުރުކީ އަދި ސްޕެއިން ފަދަ ޤައުމުތަކުން މެދުމިނުގެ ކުރިއެރުމެއް ފެނުނު ނަމަވެސް، އެ ޤައުމުތަކަށް ސަޢޫދީ ޢަރަބިއްޔާގެ ބޮޑު ކުރިއެރުމާ ގާތްވެސް ނުކުރެވޭކަން ފާހަގަ ކުރެވެއެވެ. ބަޙްރައިން އަދި ޓެންޒޭނިއާ ފަދަ ޤައުމުތަކުން ފާހަގަކޮށްލެވޭ އަދަދުތަކެއް ދެއްކި ނަމަވެސް، އެ ޤައުމުތައްވެސް ވަރަށް ބޮޑުތަނުން ވަނީ ސައުދީ އަށް ވުރެ ފަހަތުގައެވެ.

2024 ވަނަ އަހަރު، ސައުދީ އަރަބިއްޔާ އަށް ގާތްގަނޑަކަށް 30 މިލިއަން ބައިނަލްއަޤްވާމީ ފަތުރުވެރިން ޒިޔާރަތްކޮށް، އައު ރެކޯޑެއް ޤާއިމުކޮށް، ދުނިޔޭގެ އެންމެ އަވަހަށް ކުރިއަރަމުންދާ މަންޒިލްތަކުގެ ތެރެއިން އެއް މަންޒިލުގެ ގޮތުގައި ފައިހަރުކޮށްލާފައިވާކަން ފާހަގަ ކުރެވެއެވެ.