އެމެރިކަން އެއާލައިންސްގެ މަތިންދާބޯޓެއް އަސްކަރީ ހެލްކަޕްޓަރެއްގައި ޖެހި ނުރައްކާތެރި އެކްސިޑެންޓެއް ހިނގައިފި

އެމެރިކަން އެއާލައިންސްގެ މަތިންދާބޯޓެއް ރީގަން ވޮޝިންޓަން ނޭޝަނަލް އެއާޕޯޓެއްގައި ޖައްސަން އުޅެނިކޮށް އަސްކަރީ ހެލްކަޕްޓަރެއްގައި ޖެހި ނުރައްކާތެރި އެކްސިޑެންޓެއް ހިނގައިފިއެވެ.

ބޭރުގެ މީޑިއާތަކުން ރިޕޯޓުކޮށްފައިވާ ގޮތުގައި، މި ހާދިސާ ހިނގީ އެ މަތިންދާބޯޓު ރަންވޭއަށް ޖައްސަމުންދަނިކޮށެވެ. މި ނުރައްކާތެރި ހާދިސާގައި، މަތިންދާބޯޓު ޖެހުނީ އެމެރިކާގެ އަސްކަރިއްޔާގެ 'ބްލެކް ހޯކް'ގެ ހެލިކޮޕްޓަރެއްގައެވެ. ސީބީއެސް ނިއުސްއަށް އަށް މައުލޫމާތު ދެއްވި އޮފިޝަލަކު ވިދާޅުވި ގޮތުގައި ހެލިކޮޕްޓަރުގައި އެމެރިކާގެ ތިން ސިފައިން ތިއްބެވެ. ނަމަވެސް އިތުރު ތަފްސީލެއް ހާމަ ކޮށްފައެއް ނުވެއެވެ.

މިއެކްސިޑެންޓް ހިނގުމާއެކު، މަތިންދާބޯޓު ވަނީ ރަންވޭގައި ނުޖެއްސި ކައިރީގައި އޮންނަ ޕޮޓަމަކް ކޯރަށް ވެއްޓިފައެވެ.

އެމެރިކަން އެއަރލައިންސްގެ ފްލައިޓް 5342 ގައި 60 ފަސިންޖަރުންނާއި 4 ކްރޫ މެންބަރުން ތިއްބެވެ. މި ހާދިސާ ހިނގި ވަގުތުން ފެށިގެން އެމީހުން ސަލާމަތް ކުރުމުގެ މަސައްކަތް ރެސްކިއު ޓީމު ތަކުން ފަށާފައިވާ ކަމަށް ރިޕޯޓުކޮށްފައިވެއެވެ.

ގިނަ އަދަދެއްގެ ރެސްކިއު ޓީމުތަކުން އެ ސަރަޙައްދުގައި ހަރަކާތްތެރިވަމުންދާއިރު، މިހާތަނަށް 4 މީހަކު ސަލާމަތްކުރެވިފައިވާ ކަމަށް ރިޕޯޓްކޮށްފައިވެއެވެ. ނަމަވެސް މަރުވި މީހުންގެ އަދަދެއް އަދި ހާމަކޮށްފައިނުވެއެވެ.

އެ މަތިންދާބޯޓު ވޮޝިންޓަންއަށް ދަތުރުކުރަމުން ދިޔައީ ކެންސަސް އިންނެވެ.

މި ހާދިސާއާ ގުޅިގެން ވޮޝިންގޓަންގެ ރޭގަން އިންޓަރނޭޝަނަލް އެއާޕޯޓުގެ ހުރިހާ ފްލައިޓުތަކެއް މިހާރު ވަނީ ކެންސަލްކޮށްފައެވެ. އަދި މިއެކްސިޑެންޓް ހިނގަން މެދުވެރި ސަބަބު ހޯދުމަށް ޚާއްސަ ތަހުގީގެއް ފަށާފައިވާ ކަމަށް ރިޕޯޓުކޮށްފައިވެއެވެ.

އެމެރިކަން އެއާލައިންސްއަކީ އެ ގައުމުގެ އެންމެ ބޮޑު އެއް އެއާލައިނެވެ.