މި ސަރުކާރުގައި ދެ ފެކްޝަނެއް އުފެދި އެއްބަޔަކު އަނެއްބައެއްގެ ނާގާބިލްކަން ދަނީ ހާމަކުރަމުން: އިކްރާމް
23 ޖެނުއަރީ 2025 | ބުރާސްފަތި 07:25މިނިސްޓަރު އިހުސާންއަކީ ރައީސް މުއިއްޒު ފެކްޝަންގެ އަރިސް ބޭފުޅެއް
ރާއްޖެޓީވީގެ ފަލަސުރުހީ ޕްރޮގްރާމްގައި ރައްޔިތުންގެ މަޖިލީހުގެ ދިއްގަރު ދާއިރާގެ ކުރީގެ މެންބަރު އިކްރާމް ހަސަން ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރުގައި ދެ ފެކްޝަނެއް އުފެދި އެއްބަޔަކު އަނެއްބައެއްގެ ނާގާބިލްކަން ހާމަކުރަމުންދާ ކަމަށް ރައްޔިތުންގެ މަޖިލީހުގެ ދިއްގަރު ދާއިރާގެ ކުރީގެ މެންބަރު އިކްރާމް ހަސަން ވިދާޅުވެއްޖެއެވެ.
ބުދަ ދުވަހުގެ ރޭ ކުރިއަށް ގެންދިޔަ ރާއްޖެޓީވީގެ ފަލަސުރުހީ ޕްރޮގްރާމްގައި އިކްރާމް ވިދާޅުވީ މިސަރުކާރުގެ ތެރޭގައި ދެ ފެކްޝަނެއް އުފެދިފައިވާ ކަމުގެ މައުލޫމާތު ލިބިފައިވާ ކަމަށެވެ. އެއީ މަޖިލީހުގެ ރައީސް އަބްދުއްރަހީމް އަބްދުﷲގެ ފެކްޝަނާއި، ރައީސް މުއިއްޒުގެ ފެކްޝަން ކަމަށެވެ. މިހާރު މި ދެފެކްޝަންގެ މައްސަލަތައް ބޮޑުވެ، އެއްބަޔަކު އަނެއްބަޔެއްގެ ކަންކަން ފަލީހަތްކޮށް، އެބޭފުޅުންގެ ނާގާބިލްކަން ރައްޔިތުންނަށް ސާބިތުކޮށްދެމުންދާ ކަމަށް އޭނާ ވިދާޅުވިއެވެ.
ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) ގައި ރައްކައުކޮށްފައި ހުރި ރައްޔިތުންގެ ޒާތީ މައުލޫމާތު ބޭނުންކޮށްގެން ގަވައިދާ ޚިލާފަށް ވަގަށް ރައީސް މުއިއްޒުގެ ޕާޓީ ޕީއެންސީ އަށް މީހުން ވެއްދި ކަމަށް ތުހުމަތުވާ މައްސަލައަށް އިޝާރާތް ކުރައްވައި އިކްރާމް ވިދާޅުވީ މިހާރު ސަރުކާރުގެ ތެރެއިން ގިނަ މައްސަލަތައް ރައްޔިތުންނާއި ހަމައަށް ފެންމަތިވަމުންދަނީ މި ދެފެކްޝަންގެ ކޯޅުމުގެ ސަބަބުން ކަމަށެވެ. ޑީއެންއާރުން މައުލޫމާތު ވަގަށް ނެގި މައްސަލާގައި އެންމެ ބޮޑު ތުހުމަތެއް އަމާޒުވެފައިވާ ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހުސާންއަކީ ރައީސް މުއިއްޒު ފެކްޝަންގެ އަރިސް ބޭފުޅެއް ކަމަށް އޭނާ ވިދާޅުވިއެވެ. އަދި ވިދާޅުވީ ސަރުކާރުގެ ތެރެއިން މިހާރު ޓުއަރިޒަމް މިނިސްޓަރު އިބްރާހިމް ފައިސަލް މަގާމުން ވަކިކުރުމުގެ މަސައްކަތްތައް ކުރަމުންދާކަމުގެ މައުލޫމާތު ލިބިފައިވާ ކަމަށެވެ.
މީގެ އިތުރުން އިކްރާމް ވިދާޅުވީ ރައީސް މުއިއްޒު ވެރިކަމަށް ގެނައުމަށް އެންމެ ބުރަކޮށް، އެންމެ ބޮޑު މަސައްކަތެއް ކުރެއްވީ މަޖިލީހުގެ ރައީސް އަބްދުއްރަހީމް ކަމަށެވެ. ނަމަވެސް މިހާރު ސަރުކާރުގެ ތެރޭގައި ހިނގާކަންކަމުން އަބްދުއްރަހީމް ވަރަށް ބޮޑަށް އެކަހެރިކޮށްފައިވާ މަންޒަރު ފެންނަ ކަމަށް އޭނާ ވިދާޅުވިއެވެ. އަދި ވިދާޅުވީ 13 ޖެނުއަރީ 2025ގައި ރައީސް މުއިއްޒު ރަސްމީ ދަތުރުފުޅެއްގައި އެސްޓޯނިއާއަށް ވަޑައިގެންނެވިއިރު، އެދަތުރުފުޅުގައި އަބްދުއްރަހީމް ބައިވެރިކޮށްފައިނުވާ ކަމަށެވެ. ނަމަވެސް އަމިއްލަ ކުންފުނިތަކުގެ ވެރިންނާއި، ކެބިނެޓްގެ ވަޒީރުން ބައިވެރިވެވަޑައިގެންވި ކަމަށް އިކްރާމް ވިދާޅުވިއެވެ.
ރައީސް މުއިއްޒު އިސްކޮށް ހުންނަވައި، ސިޔާސީ ކަންކަމުގައި އިސްކޮށް އުޅުނު ބޭފުޅުން ނިކަމެތިކުރަމުންދާކަން ފާހަގަކުރައްވައި އިކްރާމް ވިދާޅުވީ މިހާރު ގައުމު އޮތް ހާލަތުން ގައުމު ހަމަމަގަށް ގެންދިއުމަށް ޑިމޮކްރަސީގެ އުސޫލުން މަސައްކަތް ކުރާ ޕާޓީއަކަށް އޮތީ ހަމައެކަނި އެމްޑީޕީ ކަމަށެވެ. އެހެންކަމުން ހުރިހާ ރައްޔިތުން ވެސް އެމްޑީޕީއާއެކު ކުރިއަށް ދިއުމަކީ މުހިންމު ކަމެއް ކަމަށް އޭނާ ވިދާޅުވިއެވެ.
