ވަގުން ވާނީ ވަގުންނަން، އެހެންނަމަވެސް އީސީ އިން ޕީއެންސީގެ ފޯމްތައް ބަލާނުލާ ޕްރޮސެސްކުރުމަކީ ކަންބޮޑުވާކަމެއް - އައިކް
ފޯމް ޕްރޮސެސްކުރާއިރު ބަލަންޖެހޭ ކަންކަމަށް އިލެކްޝަންސް ކޮމިޝަނުން ބަލާފައި ނެތް
އެމްޑީޕީގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ އައިކް އަހުމަދު އީސަ
ވަގުން ވާނީ ވަގުންނަން ކަމަށާއި، އެހެންނަމަވެސް އިލެކްޝަންސް ކޮމިޝަނުން ޕީއެންސީގެ ފޯމްތައް ބަލާނުލާ ޕްރޮސެސްކުރުމަކީ ކަންބޮޑުވާކަމެއް ކަމަށް އެމްޑީޕީގެ ގާނޫނީ ޓީމުގައި ހިމެނިވަޑައިގަންނަވާ އައިކް އަހުމަދު އީސަ ވިދާޅުވެއްޖެއެވެ.
ރާއްޖެޓީވީގެ ފަލަސުރުހީގައި ވާހަކަ ދައްކަވަމުން އައިކް އަހުމަދު އީސާ ވިދާޅުވީ މިހާތަނަށް އެމްޑީޕީ އަކުން ވަގުފޯމެއް ހުށަހަޅާފައި ނުވާނެ ކަމަށެވެ. އެގޮތުން ޕާޓީއަށް ހުށަހަޅާ ފޯމްތައް ބަލާފައި އެ ފޯމެއްގައި އައިޑީކާޑުގައި އިންނަ ފޮޓޯ ޖަހާފައިވާނަމަ ޕާޓީން އެ ފޯމެއް ރިޖެކްޓްކުރާނެ ކަމަށެވެ. އަދި މިފަދައިން އޭނާ ހުށަހެޅި ފޯމްވެސް ރިޖެކްޓްކޮށްފައިވާ ކަމަށާއި، ސަބަބަކީ އިލެކްޝަންސް ކޮމިޝަންގެ ގަވާއިދުގައިވެސް އައިޑީކާޑުގައި އިންނަ ފޮޓޯ ފޯމުގައި ނުޖެހޭނެކަމަށް ބުނެފައިވާތީ ކަމަށެވެ. އައިކް ވިދާޅުވީ މިއީ ވެރިފިކޭޝަން މަރުހަލާގެ ޕްރޮސެސްއެއް ނަމަވެސް، ހުރިހާ ކަންކަމެއް ދޫކޮށްލާފައި ޕީއެންސީން ހުށަހެޅި ފޯމްތައް އިލެކްޝަންސް ކޮމިޝަނުން ޕްރޮސެސް ކޮށްފައިވާ ކަމަށެވެ.
އައިކް ވިދާޅުވީ ހަމަބުއްދި ހުރި މީހަކު މި މައްސަލައާއި ގުޅިގެން ވިސްނާލުމުން ހުރިހާކަމެއްވެސް ސާފުވާނެ ކަމަށެވެ. ޕާޓީއަށް މެންބަރުން އިތުރު ކުރުމަށް އަބަދުވެސް ފޯމް ހުށަހަޅާނެ ކަމަށާއި، ނަމަވެސް ގާނޫނުތަކާއި ގަވާއިދުތަކުގައި ލިޔެފައި ހުރި ރައްކާތެރިކަމުގެ ފިޔަވަޅުތައް އެއްވެސް ވަރަކަށް މަސައްކަތް ނުކުރީ ކީއްވެގެންތޯ އައިކް ސުވާލު އުފެއްދެވިއެވެ.
އޭނާ ވިދާޅުވީ މިދައްކަނީ އެންމެ ފޯމެއް ދެފޯމެއް ނޫން ކަމަށާއި، ހާހުން ފޯމުގައި މި މައްސަލަ އުޅޭކަން ފާހަގަކުރެވުމަކީ އިލެކްޝަންސް ކޮމިޝަންގެ ބައިވެރިވުންވެސް މިކަމުގައި އޮތްކަން ހާމަވާ ކަމެއް ކަމަށެވެ. އަދި މިކަން ބަލަންތިބި އިދާރާތައް މައްސަލަ ނުބަލަންވި ސަބަބެއްވެސް ނެތް ކަމަށެވެ. ސޯޝަލް މީޑިއާއިން ފެށިގެން ރަސްމީކޮށް މައްސަލަތައް ހުށަހެޅިފައިވީނަމަވެސް މި މައްސަލަ އަދިވެސް ނުބަލާކަމަށް އެނާ ވިދާޅުވިއެވެ.
