ޓޮޓެންހަމް ބަލިކޮށް، އާސެނަލް ދެ ވަނައިގައި

އިނގިރޭސި ޕްރިމިއަރ ލީގުގައި ޓޮޓެންހަމާ ދެކޮޅަށް ކުޅުނު މެޗުން މޮޅުވެ، އާސެނަލް އިން ލީގު ތާވަލްގެ ދެ ވަނަ މަގާމަށް ޖެހިލައިފި އެވެ.

އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި ބުދަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. އެއީ މެޗުގައި ޓޮޓެންހަމް އިން ފުރަތަމަ ލަނޑު ޖަހައި ކުރި ހޯދާފައި ވަނިކޮށް، ފަހަތުން އަރަައި ދެ ލަނޑު ޖަހައިގެންނެވެ.

މެޗުގެ ފުރަތަމަ ހާފުގެ 25 ވަނަ މިނެޓުގައި ޓޮޓެންހަމަށް ކުރި ހޯދައިދިނީ ދެކުނު ކޮރެއާގެ ސޮން ހެއުން މިން އެވެ. އޭގެ ފަހުން ފުރަތަމަ ހާފުގެ 40 ވަނަ މިނެޓުގައި އާސެނަލަށް މެޗުގެ ނަތީޖާ ހަމަހަމަވީ، ޓޮޓެންހަމްގެ ޑޮމިނިކް ސޮލާންކޭ އަތުން ބައި ކޮޅަށް ވަތް ލަނޑުންނެވެ. މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް، އާސެނަލަށް ކުރި ހޯދައިދިނީ ލިއާންދްރޯ ޓޮރޮސާޑް އެވެ. އޭނާ އެ ލަނޑު ޖެހީ މާޓިން އޮޑެގާޑް ތަނަވަސްކޮށްދިން ފުރުސަަތެއްގަ އެވެ. މެޗުގެ ދެ ވަނަ ހާފުގައި ވެސް އާސެނަލް އިން ވަނީ ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ.

މޮޅާއެކު އާސެނަލް ދެ ވަނައިގައި އޮތީ މިހާތަނަށް އެ ޓީމު ކުޅެފައިވާ 21 މެޗުން 43 ޕޮއިންޓާ އެކު އެވެ. 12 މެޗުން އާސެނަލް މޮޅުވެފައިވާއިރު، ހަތް މެޗުން ވަނީ އެއްވަރުވެފަ އެވެ. އަދި ދެ މެޗުން ވަނީ ބަލިވެފަ އެވެ. އާސެނަލަށް ވުރެ އެއް މެޗު މަދުން ކުޅެގެން އެއް ވަނައިގައި ލިވަޕޫލަށް ލިބެނީ 47 ޕޮއިންޓެވެ. ދެ ޓީމުގެ ދެ މެދުގައި ހަތަރު ޕޮއިންޓުގެ ފަރަގެއް އޮތް ނަމަވެސް، ދެން ކުޅޭ މެޗުން މޮޅުވެ ލީޑު ފުޅާ ކުރުމުގެ ފުރުސަތު ލިވަޕޫލަށް އޮންނާނެ އެވެ.