ސޯޝަލް މީޑިޔާގެ އެއްވެސް ޕްލެޓުފޯމެއް ބްލޮކުކުރުމަށް ސަރުކާރުން ނިންމާފައިނުވޭ: ހީނާ
ސޯޝަލް މީޑިއާގެ އެއްވެސް ޕްލެޓްފޯމް އެއް ސަރުކާރުން ބްލޮކް ނުކުރާނެ
ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕަރސަން ހީނާ ވަލީދު
ސޯޝަލް މީޑިއާގެ ބައެއް ޕްލެޓްފޯމް ރާއްޖޭގައި ބްލޮކް ކުރަން އުޅޭ ކަމަށް ދެކެވޭ ވާހަކަ ސަރުކާރުން މިއަދު ދޮގުކޮށްފި އެވެ.
ސަރުކާރުން މިފަދައިން ބުނީ ރާއްޖޭގައި އެންމެ ގިނަބަޔަކު ބޭނުންކުރަމުން އަންނަ ސޯޝަލް މީޑިއާ ޕްލެޓްފޯމެއް ކަމުގައިވާ "ޓިކްޓޮކް" ބްލޮކް ކުރަން ސަރުކާރުން މައްސަކަތް ކުރާކަމަށް ބުނެ އަޑުފެތުރިފައިވާ ވަގުތެއްގައެވެ.
ރައީސް އޮފީހުގެ ތަރުޖަމާނު ހީނާ ވަލީދު އެކްސްގައި ކުރެއްވި ޕޯސްޓެއްގައި މިއަދު ވިދާޅުވީ އެއްވެސް ސޯޝަލް މީޑިއާ ޕްލެޓްފޯމެއް ބްލޮކް ކުރަން ސަރުކާރުން ނުވިސްނާ ކަމަށާއި އެފަދަ މަޝްވަރާތަކެއް ވެސް ކޮށްފައިނުވާ ކަމަށެވެ.
"ބައެއް ސޯޝަލް މީޑިއާ ޕްލެޓްފޯމްތައް ބްލޮކް ކުރަން އުޅޭ ކަމަށް ދެކެވޭ ވާހަކަތަކަކީ ކަނޑައެޅިގެން ދޮގެއް. ސޯޝަލް މީޑިއާގެ އެއްވެސް ޕްލެޓްފޯމެއް ބްލޮކް ކުރަން ސަރުކާރަކުން ނުނިންމާ އަދި އެފަދަ މަޝްވަރާ އެއް ވެސް ނުކުރޭ،" ހީނާ ވިދާޅުވި އެވެ.
ހީނާ އިތުރަށް ވިދާޅުވީ، ގާނޫނުއަސާސީއިން ރައްޔިތުންނަށް ލިބިދޭ އަސާސީ ހައްގުތައް ރައްކާތެރިކޮށް ކުރިއަރުވަން ރައީސް ޑރ. މުހައްމަދު މުއިއްޒު ވަރަށް ބޮޑު އިސްކަމެއް ދެއްވާ ކަމަށެވެ.
މި ސަރުކާރުން ވެރިކަމަށް އައިތާ ކުރީކޮޅު ވަނީ ދެ ވެބްސައިޓެއް ބްލޮކް ކޮށްފަ އެވެ. ސަރުކާރުން ވަނީ އެކަން ފުރަތަމަ ދޮގުކޮށްފަ އެވެ. ފަހުން ބުނެފައި ވަނީ އެ ވެބްސައިޓު ބްލޮކް ކުރީ ރަޖިސްޓްރީނުކޮށް ހިންގާތީ ކަމަށެވެ.
