އާސެނަލް އަތުން ލިބުނީ ހައްގު މޮޅެއް: އަމޯރިމް

އިނގިރޭސި އެފްއޭ ކަޕްގެ ތިން ވަނަ ބުރުގައި އާސެނަލާ ދެކޮޅަށް ކުޅުނު މެޗުން، މެންޗެސްޓަރ ޔުނައިޓެޑަށް ލިބުނީ ހައްގު މޮޅެއް ކަމަށް އެ ޓީމުގެ ކޯޗު ރުބެން އަމޯރިމް ބުނެފި އެވެ.

އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި ކުޅުނު މެޗު ޔުނައިޓެޑުން ކާމިޔާބު ކުރީ ޕެނަލްޓީ ޖަހައިގެންނެވެ. މެޗުގެ ފުރިހަމަ ވަގުތު ހަމަވީއިރު ވެސް ދެ ޓީމު އެއްވަރުވެފައި އޮތުމުން، ނަތީޖާ ނެރުމަށް ޖެހި ޕެނަލްޓީ ކާމިޔާބުކޮށް ޔުނައިޓެޑުން ވަނީ އާސެނަލް ކަޓުވާލައި މުބާރާތުގެ އަނެއް ބުރުން ޖާގަ ހޯދައިފަ އެވެ.

އެ މެޗަށްފަހު ވާހަަކަ ދައްކަމުން އަމޯރިމް ބުނީ، މެޗުން މޮޅުވުމަށް ޔުނައިޓެޑަށް ވަރަށް މަސައްކަތް ކުރަން ޖެހުނު ކަމަށާއި، މެޗުން މޮޅުވީ ހިތްވަރު ދޫކޮށްނުލައި ކުރި މަސައްކަތުން ކަމަށެވެ. މެޗުގައި ޔުނައިޓެޑަށް އިތުރު ލަނޑު ޖަހާނެ ފުރުސަތުތަކެއް ވެސް ލިބުނުކަން ފާހަގަ ކުރަމުން އަމޯރިމް ބުނީ، މެޗުގައި ޔުނައިޓެޑަށް ލިބުނީ ހައްގު މޮޅެއް ކަމަށެވެ. މެޗުގައި އާސެނަލް އިން ދެއްކި ކުޅުމަށް ބަލާއިރު، އެ ޓީމަށް ބަލިވުން ހައްގު ނުވި ނަަމަވެސް، ޔުނައިޓެޑަށް މޮޅެއް ހައްގު ކަމަށް އަމޯރިމް ވަނީ ބުނެފަ އެވެ.

މެޗުން މޮޅުވެ ޔުނައިޓެޑު އަނެއް ބުރަށް ދަތުރުކުރިއިރު، ޔުނައިޓެޑުގެ ނަތީޖާއާ މެދު އެ ޓީމުގެ ސަޕޯޓަރުން ތިބީ ޤަބޫލު ކުރަން ދަތިވެފައި ކަމަށް އަމޯރިމް ބުންޏެވެ. އެހެން ނަމަވެސް، މިއީ މިވަގުތު ޔުނައިޓެޑަށް ލިބުނު ހަމަޖެހުމެއްގެ ގޮތުގައި އަމޯރިމް ވަނީ ސިފަ ކޮށްފަ އެވެ. އަދި ކުޅުންތެރިންނަށް ބޭނުންވާ ރެސްޓު ދިނުމަށްފަހު، ކުރިއަށް އޮތް މެޗުތަކަށް އަނެއްކާ ވެސް ފުރިހަމަ އަށް ތައްޔާރުވާނެ ކަމަށް އަމޯރިމް ވަނީ ބުނެފަ އެވެ.

މެޗުގެ ވަކި ހިސާބަކުން ޔުނައިޓެޑުގެ ޑިއޭގޯ ޑަލޮޓް އަށް ދެ ވަނަ ރީނދޫ ކާޑާ އެކު ރަތް ކާޑު ދައްކައި ދަނޑުން ފޮނުވާލިއިރު، މެޗުގެ ބާކީ ބައި އެ ޓީމުން ފުރިހަމަ ކުރަން ޖެހުނީ އެއް ކުޅުންތެރިޔަކު މަދުންނެވެ. އަމޯރިމް ބުނީ އެފަދަ މެޗެއްގައި އެކަންވީ ވަރަށް ބޮޑު ޕްރެޝަރަކަށް ކަމަށާއި، މެޗުގައި އެތައް އުނދަގޫތަކެއް އެކަމުގެ ސަބަބުން ކުރިމަތިވި ކަމަށެވެ.

ޔުނައިޓެޑަށް ދެން އޮންނަނީ މި މަހުގެ 17 ވަނަ ދުވަހު އަމިއްލަ ދަނޑުގައި ސައުތެމްޓަނާ ދެކޮޅަށް ކުޅޭ މެޗެވެ. މި ސީޒަންގެ ވަކި ހިސާބަކުން ޔުނައިޓެޑުގެ ކޯޗުކަމާ ހަވާލުވި އަމޯރިމްގެ އިރުޝާދުގެ ދަށުން ވެސް އެ ޓީމުގެ ނަތީޖާތައް ދަށްވަމުން އަންނަނާތީ، އޭނާ އަށް ފާޑު ކިޔުންތައް އަމާޒުވަމުން އަންނައިރު، ޕްރެޝަރު ބޮޑުވަމުން އަންނަ ކަމަށް ވެސް މީޑިއާ ތަކުގައި ވަނީ ރިޕޯޓުކޮށްފަ އެވެ.