އިނގިރޭސި އެފްއޭ ކަޕްގެ ތިން ވަނަ ބުރުގައި ޓަމްވޯތު ބަލިކޮށް، ޓޮޓެންހަމް އިން މުބާރާތުގެ އަނެއް ބުރުން ޖާގަ ހޯދައިފި އެވެ.

ޓަމްވޯތުގެ އަމިއްލަ ދަނޑުގައި ކުޅުނު މެޗު ޓޮޓެންހަމް އިން ކާމިޔާބު ކުރީ 3-0 އިންނެވެ. މެޗުގައި ޓޮޓެންހަމް އިން އެ ޓީމުގެ ތިން ލަނޑު ވެސް ޖެހީ، އިތުރު ވަގުތުގެ ދެ ހާފުގަ އެވެ.

މެޗު ފަށައިގެން ޓަމްވޯތުން ވަނީ ލަނޑު ޖެހުމަށް ފުރުސަތު ތަނަވަސްކޮށްފަ އެވެ. އެ ޓީމުގެ ބެން ރޭ އޮނެރޫ ފޮނުވާލި ބޯޅަ ޓޮޓެންހަމްގެ ގޯލު ކީޕަރު ވަނީ މަތަކޮށްފަ އެވެ. އޭގެ ފަހުން ޓޮޓެންހަމްގެ ޖޭމްސް މެޑިސަން ފޮނުވާލި ބޯޅަ ބޭރަށް ދިޔައީ ޓަމްވޯތުގެ ކުޅުންތެރިޔެއްގެ ބޮލުގައި ޖެހިފަ އެވެ. އޭގެ ފަހުން މެޑިސަން ފޮނުވާލި ބޯޅަ ޓަމްވޯތުގެ ކީޕަރު ވަނީ މަތަކޮށްފަ އެވެ. މެޗުގެ ދެ ވަނަ ހާފުގެ ކުރީ ކޮޅު މެޑިސަން ބޮލުން ފޮނުވާލި ބޯޅަ ދިފާއު ކުރީ ޓަމްވޯތުގެ ޑިފެންޑަރެެކެވެ.

މެޗުގެ 101 ވަނަ މިނެޓުގައި ޓޮޓެންހަމް އަށް ލީޑު ލިބުނީ ޓަމްވޯތުގެ ނެތަން ޝިކުނާ އަތުން ބައި ކޮޅަށް ވަތް ލަނޑުންނެވެ. އޭގެ ފަހުން މެޗުގެ 107 ވަނަ މިނެޓުގައި ޓޮޓެންހަމްގެ ދެ ވަނަ ލަނޑު ޖެހީ ޑެޖާން ކުލުސެވްސްކީ އެވެ. އޭނާ އެ ލަނޑު ޖެހީ ސޮން ހެއުން މިން ތަނަވަސްކޮށްދިން ފުރުސަތެއްގަ އެވެ. މެޗުގައި ޓޮޓެންހަމްގެ ތިން ވަނަ ލަނޑު ޖެހީ ބްރެނާން ޖޯންސަން އެވެ.

އެފްއޭ ކަޕްގެ ހަތަރު ވަނަ ބުރުގައި ޓޮޓެންހަމް ނިކުންނާނީ އެސްޓަން ވިލާއާ ދެކޮޅަށެވެ. އެ މެޗު އޮންނާނީ އަންނަ ފެބްރުވަރީ މަހުގެ އަށް ވަނަ ދުވަހު އެވެ.