ގއ. ވިލިނގިލީ އާސިފް އަޙްމަދުގެ ޒާތީ މައުލޫމާތު ބޭނުންކޮށް، އޭނާގެ ނަމުގައި ފޭކް ސޮއި ކޮށް، ވެރިކަން ހިންގާ ޕީޕީލަސް ނޭޝަނަލް ކޮންގްރެސް (ޕީއެންސީ) އަށް ވައްދާފައިވާ ކަމަށް އޭނާ ބުނެފިއެވެ.
މި ނޫހާ ވާހަކަ ދައްކަމުން އާސިފް ބުނީ މިއީ "ސީދާ ވައްކަމެއް" ކަމަށެވެ.
އާސިފް ބުނީ، އޭނާ އަށް ނޭނގި އެމްޑީޕީ އިން ވަކިކޮށް ޕީއެންސީ އަށް ވައްދާފައި އޮތްކަން އެނގުނީ، އިލެކްޝަންސް ކޮމިޝަނުން އޭނާ އެމްޑީޕީގެ ދަފްތަރުން ވަކި ކުރުމަށް ފަހު އެކަން ޕާޓީ އޮފީހަށް އެންގުމުން ޕާޓީ އޮފީހުން އެ މައުލޫމާތު އޭނާ އަށް ހިއްސާ ކުރަމުންނެވެ.
"އެ ހިސާބުން އަޅުގަނޑު އިލެކްޝަންސް ކޮމިޝަނަށް މެއިލް ކުރީ އަޅުގަނޑު ޕާޓީ ބަދަލު ކުރަން ފޮނުވި ފޯމުގެ ކޮޕީއެއް އަޅުގަނޑަށް ލިބިދާނެތޯ، ދެން ކޮމިޝަނުން ފޯމު އަޅުގަނޑަށް މެއިލް ކުރީ،" މިކަން ހިނގިގޮތް ކިޔައިދެމުން އާސިފް ބުންޏެވެ.
އިލެކްޝަންސް ކޮމިޝަނުން އޭނާ އަށް ފޮނުވި ފޯމުގައި ހުރި އާސިފްގެ ޒާތީ މައުލޫމާތު ދިމާވި ނަމަވެސް، އޭގައި ކޮށްފައިވާ ސޮޔާއި އޭނާގެ އައިޑީ ކާޑުގައިވާ ސޮޔާ ދިމާ ނުވާކަން ފާހަގަ ކުރެވެއެވެ.
ޕާޓީ ބަދަލުވި ކަމުގެ މައުލޫމާތު ސީދާ އާސިފް އަށް ކޮމިޝަނުން ނޭންގީ ކީއްވެތޯ އެހުމުން އޭނާ ބުނީ ފޯމުގައި އޮތީ އޭނާގެ ފޯނު ނަންބަރު ނޫން ކަމަށެވެ. އެހެންވެ ކޮމިޝަނުން ގުޅިޔަސް އޭނާގެ އަސްލު ނަންބަރަށް ގުޅޭނެ ގޮތެއް ނޯންނާނެ ކަމަށް ދެކޭ ކަމަށްވެސް އާސިފް ބުންޏެވެ.
އެ ފޯމުގައި އާސިފްގެ ނަމުގައި ފިންގަރޕްރިންޓް ވެސް ވަނީ ޖަހާފައެވެ.
"ސޮއި ކޮށްފައި އޮތީ އަޅުގަނޑުގެ ސޮޔާ ވައްތަރު ގޮތެއް ދައްކާފަ، އަޅުގަނޑު ސޮއި ކުރި ފޯމެއް، ފުރި ފޯމެއް ވެސް ނޯންނާނެ ޕީއެންސީ އަށް ވަންނަން،" އާސިފް ބުންޏެވެ.
އިލެކްޝަންސް ކޮމިޝަނުން ފޮނުވި ފޯމަށް ބަލާއިރު ފާހަގަ ކުރެވޭ ގޮތުގައި އެ ފޯމުގައި އެއް ހެކިވެރިއެއްގެ ގޮތުގައި ސޮއި ކޮށްފައިވަނީ ހުވައެއް ކުރައްވައިގެން ޒިންމާދާރު މަގާމެއްގައި ހުންނެވި ފަރާތެއް ކަމަށްވާ، މާލެ-ވިލިނގިލި ދާއިރާގެ ޕީއެންސީ އަށް ނިސްބަތްވާ މަޖިލިސް މެމްބަރު މުހައްމަދު އިސްމާއީލް އެވެ.
ދެވަނަ ފަރާތެއްގެ ގޮތުގައި ހެކިވެރިއަކަށް ސޮއި ކޮށްފައިވަނީ ސ. ހިތަދޫ އޯކިޑްމާގޭ އިބްރާހިމް ރައްޒާނު ކިޔާ ފަރަތެކެވެ.
އާސިފް ބުނީ މިއީ ވަރަށް ބޮޑު އޮޅުވާލުމެއް ކަމަށާއި އޭނާ އަށް ނޭނގި އޭނާގެ ޒާތީ މައުލޫމާތު ބޭނުންކޮށް ވަގު ސޮއި ކޮށް، އިނގިލީގެ ނިޝާން ޖަހާ ޕާޓީ ބަދަލު ކުރި މައްސަލަ ޕޮލިހަށް ހުށަހަޅާނެ ކަމަށެވެ.
އެމްޑީޕީ ވިލިނގިލި ދާއިރާގެ ދާއިރާ ރައީސްގެ އިންތިޚާބަށް ތައްޔާރުވަމުން ދާތީ ޕާޓީ ދަފްތަރުގައި އޮތްތޯ އެމްޑީޕީގެ މެމްބަރުން ޗެކް ކުރަމުންދާއިރު ގިނަ ފަރާތްތަކެއް އެމީހުންނަށް ނޭނގި ޕީއެންސީ އަށް ވައްދާފައިވާ ކަން ފާހަގަ ކުރެވޭ ކަމަށްވެސް އާސިފް ބުންޏެވެ.
މީހުންނަށް ނޭނގި ޕީއެންސީ އަށް ވައްދާ ކަމުގެ އެތައް ޝަކުވާ އެއް ވަނީ ފެންމަތިވެފައެވެ. އަދި ޕީއެންސީ އަށް މީހުން ވެއްދުމަށް ދައުލަތުގެ ވަސީލަތްތައް ނުހަމަ ގޮތުގައި ބޭނުން ކުރާ ވާހަކަތައް ވެސް ވަނީ ފެންމަތިވެފައެވެ.
