އިނގިރޭސި އެފްއޭ ކަޕްގެ ތިން ވަނަ ބުރުގައި އެކްރިންޓަން ސްޓޭންލީއާ ދެކޮޅަށް ކުޅުނު މެޗުން މޮޅުވެ، ލިވަޕޫލް އިން މުބާރާތުގެ އަނެއް ބުރުން ޖާގަ ހޯދައިފި އެވެ.
ލިވަޕޫލްގެ އަމިއްލަ ދަނޑު، އެންފީލްޑުގައި ހޮނިހިރު ދުވަހު ކުޅުނު މެޗު އެ ޓީމުން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި ލިވަޕޫލް އިން ދެ ލަނޑު ޖެހިއިރު، ދެ ވަނަ ހާފުގައި ވަނީ އިތުރު ދެ ލަނޑު ޖަހައިފަ އެވެ.
މެޗުގެ ފުރަތަމަ ހާފުގެ 29 ވަނަ މިނެޓުގައި ލިވަޕޫލް އިން ވަނީ ލަނޑު ޖަހައި ކުރި ހޯދައިފަ އެވެ. އެ ލަނޑު އެ ޓީމަށް ޖަހައިދިނީ ޑިއޭގޯ ޖޮޓާ އެވެ. އެއޯ ޑާވިން ނޫނޭޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުގެ ފުރަތަމަ ހާފުގެ ފަހު ވަގުތުގައި ދެ ވަނަ ލަނޑެއް ޖަހައި ލިވަޕޫލްގެ ލީޑު ފުޅާ ކޮށްދިނީ، ޓްރެންޓް އެލެގްޒެންޑާ އާނޯލްޑް އެވެ. އެއީ ޑޮމިނިކް ސޮބޮސްލާއީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.
މެޗުގެ ދެ ވަނަ ހާފުގައި ލިވަޕޫލްގެ ތިން ވަނަ ލަނޑު ޖެހީ ޖޭޑަން ޑޭންސް އެވެ. އަދި މެޗުގެ އެންމެ ފަހު ވަގުތުގައި ލިވަޕޫލްގެ ފަހު ލަނޑު ޖެހީ ފެޑެރިކޯ ޗިއެސާ އެވެ. މެޗުގައި މި ދެ ކުޅުންތެރިން ވެސް ކުޅެން ނިކުމެފައި ވަނީ ބަދަލު ކުޅުންތެރިންގެ ގޮތުގަ އެވެ.
