ޣައްޒާ ސިޓީގެ އެކި ސަރަހައްދުތަކުގައި އިސްރާއީލުން ދިން ވަކިވަކި ވައިގެ ހަމަލާތަކެއްގައި ފަލަސްތީނުގެ އެތައް ބަޔަކު ޝަހީދުވެ، ބަޔަކަށް އަނިޔާވެއްޖެއެވެ.

މި ވައިގެ ހަމަލާތަކުގެ ތެރެއިން އެއް ހަމަލާ އަމާޒުކުރެވުނީ ޣައްޒާގެ ޖަލާއާ އަދި ސަހާބާ ޖަންކްޝަންގައި ހުންނަ ބަރްބަރީ ސްޓޭޝަން ކައިރީގައި ތިބި އާންމު ރައްޔިތުންނަށެވެ. މީގެ ސަބަބުން ގިނަ އާންމު ރައްޔިތުން ޝަހީދުވެ އަދި އެތައް ބަޔަކަށް އަނިޔާވެފައިވެއެވެ. ޒަޚަމްވި ގިނަ ބަޔަކު ވަނީ ނުރައްކާތެރި ހާލަތުގައި ކަމަށް ރިޕޯޓުތަކުގައި ވެއެވެ.

މީގެ އިތުރުން، އުތުރު ޣައްޒާގެ ޖަބާލިއާ ގައި އިސްރާއީލުގެ ހަމަލާ އެއްގައި ޒަޚަމްވި އުމުރުން 43 އަހަރުގެ ސަމާހު އަލް-މަދްހޫން ވަނީ އޭނާއަށް ލިބުނު ބޮޑެތި އަނިޔާތަކާ ގުޅިގެން ނިޔާވެފައެވެ. އޭނާއަށް މި އަނިޔާތައް ލިބުނީ މީގެ އެތައް ދުވަހެއް ކުރިން ޚާން ޔޫނިސް ސަރަހައްދުގައި ހުރި ހިޖުރަކުރި މީހުންގެ ޓެންޓުތަކަށް އިސްރާއީލުން ދިން ވައިގެ ހަމަލާއެއްގައެވެ. މި ހަމަލާގައި އޭނާގެ ތިން ކުދިން ވެސް ވަނީ ޝަހީދުވެފައެވެ.

މީގެ އިތުރުން، އިސްރާއީލުގެ އިސްތިއުމާރީ ބާރުތަކުން އުތުރު ޣައްޒާގެ އެތައް ގެތަކެއްގައި އަލިފާން ރޯކޮށްލުމުގެ ސަބަބުން އެކި ސަރަހައްދުތަކުގައި ބޮޑެތި އަލިފާނުގެ ހާދިސާތައް ހިނގައިފިއެވެ.

2023 ވަނަ އަހަރުގެ އޮކްޓޯބަރު މަހުން ފެށިގެން ޣައްޒާގައި ހިނގަމުންދާ އިސްރާއީލުގެ އަނިޔާވެރިކަމުގެ ސަބަބުން މިހާތަނަށް މަދުވެގެން 46,006 ފަލަސްތީނު މީހުން ޝަހީދުވެއްޖެ ކަމަށް ރެކޯޑްތައް ބުނެއެވެ. އޭގެ އިތުރުން އިސްރާއީލުގެ އަނިޔާވެރި ހަމަލާތަކުގައި ޒަޚަމުވި މީހުންގެ އަދަދު 109,378 އަށްވުރެ މައްޗަށް ވަނީ ގޮސްފައެވެ.

އދ. ގެ ސެކިއުރިޓީ ކައުންސިލުން ވަގުތުން ހަނގުރާމަ ހުއްޓާލުމަށް ގޮވާލާފައިވިޔަސް އަދި އިންޓަނޭޝަނަލް ކޯޓް އޮފް ޖަސްޓިސްއިން ޣައްޒާގައި ނަސްލު ފުހެލުން ހުއްޓުވުމަށާއި އަދި އިންސާނީ ހާލަތު ރަނގަޅުކުރުމަށް ފިޔަވަޅު އެޅުމަށް އަންގާފައިވީ ނަމަވެސް، އިސްރާއީލުން ކުރިއަށް ގެންދާ ނަސްލު ނައްތާލުމުގެ ހަމަލާތައް ހުއްޓުމެއް ނެތި ދަނީ ކުރިއަށެވެ.