މަޓާޓޯގެ އަހަރީ އާންމު ޖަލްސާ ބާއްވައިފި ރިބްރޭންޑް ކޮށްފި
9 ޖެނުއަރީ 2025 | ބުރާސްފަތި 06:58މަޓާޓޯގެ ރައީސް ކަމަށް އައްޔަންކުރައްވާފައިވަނީ އަބްދުﷲ ޣިޔާޘްއެވެ. ނައިބު ރައީސުންގެ ގޮތުގައި އައްޔަންކުރައްވާފައިވަނީ މުހައްމަދު ހަލީލް އަދި މުހައްމަދު ޝާޒް ވަލީދެވެ.
މަޓާޓޯގެ ރައީސް ކަމަށް އައްޔަންކުރައްވާފައިވަނީ އަބްދުﷲ ޣިޔާޘް
މަޓާޓޯގެ އަހަރީ އާންމު ޖަލްސާގެ ތެރެއިން
މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) ގެ އަހަރީ އާންމު ޖަލްސާ ބާއްވައި ރިބްރޭންޑް ކޮށްފިއެވެ.
މަންހަޓަން ބިޒަނަސް ހޮޓެލްގައި ބޭއްވި ޖަލްސާގައި މަޓާޓޯއިން އެ ވަނީ އެ އެސޯސިއޭޝަންގެ އައު ބޯޑު މޭންބަރުން އައްޔަންކުރައްވާ، ލޯގޯ އިފްތިތާހުކޮށް ވެބްސައިޓް ވެސް ލޯންޗްކޮށްފައެވެ. އަހަރީ އާންމު ޖަލްސާގައި ވެބްސައިޓް ލޯންޗްކޮށްދެއްވީ ޝަރަފުވެރި މެހެމާން، ޓުއަރިޒަމް މިނިސްޓަރު އިބްރާހިމް ފައިސަލްއެވެ.
މި އަހަރަކީ މަޓާޓޯއަށް 18 ވަނަ އަހަރީ ދުވަސް ފާހަގަކުރަމުންދާ އަހަރެވެ. އަހަރީ އާންމު ޖަލްސާގައި ބޯޑު މެންބަރުން ވަނީ އަންޔަންކުރައްވާފައެވެ.
އެގޮތުން މަޓާޓޯގެ ރައީސް ކަމަށް އައްޔަންކުރައްވާފައިވަނީ އަބްދުﷲ ޣިޔާޘްއެވެ. ނައިބު ރައީސުންގެ ގޮތުގައި އައްޔަންކުރައްވާފައިވަނީ މުހައްމަދު ހަލީލް އަދި މުހައްމަދު ޝާޒް ވަލީދެވެ. މަޓާޓޯގެ ސެކްރެޓަރީ ޖެނެރަލްއަކަށް އައްޔަންކުރައްވާފައިވަނީ އަބްދުﷲ ސުއޫދެވެ. ހަޒާންދާރަކަށް އައްޔަންކުރައްވާފައިވަނީ އިބްރާހިމް ދީދީއެވެ.
އެގްޒެކެޓިވް ބޯޑު މެންބަރުންގެ ގޮތުގައި 5 ބޭފުޅަކު ވަނީ އައްޔަންކުރައްވާފައެވެ.
ރަސްމިއްޔާތުގައި ވާހަކަފުޅު ދައްކަވަމުން މަޓާޓޯގެ ރައީސް އަދި އެމްއެމްޕީއާރުސީގެ މިހާރުގެ ޗެއަރޕާސަން އަބްދުﷲ ޣިޔާޘް ވިދާޅުވީ މިއަހަރަކީ މަޓާޓޯއަށް 18 އަހަރު ފުރޭ އަހަރު ކަމަށާއި، ވޭތުވެދިޔަ އަހަރުތަކަކީ އުނދަގޫތަކާއި ފަސޭހަތަކާއި، ގޮންޖެހުންތަކެއް ދިމާވި އަހަރުތަކެއް ނަމަވެސް ކާމިޔާބީތަކެއް ހޯދިފައިވާ ކަމަށެވެ.
މަޓާޓޯއަކީ 2006 ވަނަ އަހަރު ރާއްޖޭގެ ފަތުރުވެރިކަމުގެ ޞިނާޢަތު ކުރިއެރުވުމަށް އުފެއްދި ޖަމްޢިއްޔާއެކެވެ. ފަތުރުވެރިކަން ތަމްސީލުކުރާ އެންމެ ބޮޑު ޖަމިއްޔާ މަޓާޓޯ އަކީ މިހާރު ބައިނަލްއަގުވާމީ ގޮތުން ބަލައިގަނެފައިވާ ޖަމިއްޔާއެކެވެ.
މި ރަސްމިއްޔާތުގައި މަޓާޓޯއަށް އެކި ގޮތްގޮތުން ޚިދުމަތްކޮށްދެއްވާފައިވާ ފަރާތްތަކަށް ހަނދާނީ ފިލާ ދީފައިވެއެވެ.
