ކަސްޓަމްސްގެ މަނީލޯންޑަރިންގެ މައްސަލަ - މައްސަލައިގައި ހިމެނޭ އޮފިސަރަކު ރިޓަޔަރ ނުކުރޭ!
މައްސަލަތަކާ ގުޅުން ހުރި ބައެއް ކަންކަން ރައްޔިތުންގެ މަޖިލިހުގެ 241 ކޮމިޓީ އަށް ވެސް މިހާރު ވަނީ ހުށަހަޅާފައި
ކަސްޓަމްސްގެ މުވައްޒަފުންތަކެއް
މޯލްޑިވްސް ކަސްޓަމްސް ސާވިސަސް މުވައްޒަފުންތަކެއްގެ އެކައުންޓުގައި 400 މިލިއަން ރުފިޔާ ދައުރުވި މައްސަލައެއް ފުލުހުން ތަހުގީގު ކުރަން ފަށާފައިވާ އިރު، އެ މައްސަލައިގައި ހިމެނޭ އެއްވެސް އޮފިސަރަކު ރިޓަޔަރކޮށްފައި ނުވާނެ ކަމަށް ކަސްޓަމްސް އިން ބުނެފިއެވެ.
400 މިލިއަން ރުފިޔާ ދައުރުވި މައްސަލައިގައި 20 އޮފިސަރުން ހިމެނޭ ކަމަށް މައުލޫމާތު ވަނީ ލިބިފައެވެ. ފައިސާ ހޯދާފައި ވަނީ ޑިއުޓީ އޮޅުވާލައިގެންނާއި ކަސްޓަމްސްއިން ދޭ އެހެނިހެން ހިދުމަތްތަކުގެ ތެރެއިންނެވެ. މައްސަލަ ފުލުހުންގެ އިތުރުން ރައްޔިތުންގެ މަޖިލީހުން ވެސް ދަނީ ބަލަމުންނެވެ.
އެގޮތުން އެ މައްސަލަތަކާ ގުޅުން ހުރި ބައެއް ކަންކަން ރައްޔިތުންގެ މަޖިލިހުގެ 241 ކޮމިޓީ އަށް ވެސް ހުށަހަޅާފައިވާއިރު، ކޮމިޓީގެ ބައްދަލުވުންތައް ސިއްރުކޮށްގެން ސަރުކާރުގެ ކަމާ ގުޅުންހުރި އިދާރާތަކުގެ ބައެއް އިސްވެރިންނާ ސުވާލުކޮށްފައިވާ ކަމަށްވެސް މައުލޫމާތު ލިބެ އެވެ.
މައުލޫމާތު ލިބިފައިވާ ގޮތުގައި ހިޔާނާތުގެ މި މައްސަލައިގައި ހިމެނޭ ކަސްޓަމްސްގެ 20 އޮފިސަރެއްގެ މައްސަލަ ކަމާބެހޭ ފަރާތްތަކުގެ ސަމާލުކަމަށް ވަނީ އައިސްފަ އެވެ. އެގޮތުން މި 400 މިލިއަން ރުފިޔާ ދައުރުވެފައިވަނީ 20 މީހެއްގެ އެކައުންޓުގައި ކަމަށާއި ނަމަވެސް ފުލުހުން ތަހުގީގު މިހާތަނަށް ހިންގާފައިވަނީ ތިން ހަތަރު އޮފިސަރެއްގެ މައްޗަށް ކަމަށް މައުލޫމާތު ލިބެ އެވެ.
އެގޮތުން ތުހުމަތު ކުރެވޭ 20 އޮފިސަރުންގެ ތެރެއިން ހަތަރު މީހެއްގެ ފޯނާއި އިލެކްޓްރޯނިކް ވަސީލަތްތައް ފުލުހުން ކޯޓު އަމުރެއްގެ ދަށުން ބަލައި ފާސްކޮށްފައިވެއެވެ. ނަމަވެސް އޭގެ ތެރެއިން އެއްވެސް މީހަކު ހައްޔަރު ކުރިކަމެއް ނުވަތަ ނޫން ކަމެއް އަދި އެނގިފައެއް ނުވެއެވެ.
މި މައްސަލައާއި ގުޅިގެން ކަސްޓަމްސްއިން ބުނެފައިވަނީ ކަސްޓަމްސްގެ ބައެއް އޮފިސަރުންނަށް ތުހުމަތު ކުރެވިގެން، މަނީ ލޯންޑްރިންގ، ޚިޔާނާތް އަދި ރިޝްވަތާގުޅޭގޮތުން، ދިވެހި ފުލުހުންގެ ޚިދުމަތުން ތަޙްޤީޤެއް ކުރައްވަމުން ގެންދަވާކަމަށް އެ ސަރވިސްއަށް އަންގާފައިވާ ކަމަށެވެ. އަދި އެގޮތުން ތަޙްޤީޤުގައި ހިމެނޭ އޮފިސަރުންކަމަށް އެ ޚިދުމަތުން މައުލޫމާތު ދެއްވާފައިވާ އެއްވެސް އޮފިސަރެއް ރިޓަޔަރކޮށްފައި ނުވާ ކަމަށެވެ.
މި މައްސަލައާއި ގުޅިގެން ފުލުހުން ބުނީ ކަސްޓަމްސް މުވައްޒަފުންތަކަށް ތުހުމަތު ކުރެވޭ މަނީ ލޯންޑަރިން، ހިޔާނާތް އަދި ރިޝްވަތުގެ މައްސަލައެއް ފުލުހުންގެ ސަމާލުކަމަށް އައުމާ ގުޅިގެން، މިދިޔަ އަހަރުގެ އޮގަސްޓް 19 ވަނަ ދުވަހު އެ މައްސަލައިގެ ތަހުގީގު ފަށާފައިވާ ކަމަށެވެ. ނަމަވެސް މި މައްސަަލައިގެ އިތުރު ތަފްސީލެއް ފުލުހުން ނުދެއެވެ.
މިފަދަ ބޮޑު ޚިޔާނާތުގެ މައްސަލައެއް ފެންމަތިވެފައިވާއިރު، ޔުނިފޯމް އެޅި މުއައްސަސާތަކުގެ ތެރޭގައި ކޮރަޕްޝަންގެ ޒައްރެއްގެ މިންވަރު ވެސް ނުބާއްވާނެކަމަށް ހޯމް މިނިސްޓަރ އަލީ އިހުސާން ވަނީ ވިދާޅުވެފައެވެ.
ހޯމް މިނިސްޓަރ އަލީ އިހުސާން މިފަދައިން ވިދާޅުވެފައި ވީނަމަވެސް ޔުނިފޯމް އެޅި މުއައްސަސާތަކާ މެދު އިތުބާރު ކޮށްގެން ބަލަން ތިބެވެން ނެތް ކަމަށާއި 241 ކޮމިޓީން ބަލަމުންދާ މައްސަލަތައް ނިމުމުން، މަސްތުވާތަކެތީގެ މައްސަލަ ފަދަ ކަންކަމުގައި ވެސް ހައްލުތަކެއް ހުށަހަޅުއްވާނެ ކަމަށް ރައްޔިތުންގެ މަޖިލީހުގެ ނައިބު ރައީސް އަހްމަދު ނާޒިމް މިދިޔަ ޑިސެމްބަރު މަހު ވަނީ ވިދާޅުވެފައެވެ. އަދި ކަސްޓަމްސްގެ އިހުމާލު ވެސް ވަރަށް ބޮޑަށް އޮތް މަންޒަރު ކުރިން ވެސް ފެނިވަޑައިގެންފައިވާ ކަމަށް ވެސް ނާޒިމް އޭރު ވިދާޅުވިއެވެ.
