އިނގިރޭސި ޕްރިމިއަރ ލީގުގައި ބެރްންޓްފޯޑާ ދެކޮޅަށް ކުޅުނު މެޗުން މޮޅުވެ، އާސެނަލް އިން ލީގު ތާވަލްގެ ދެ ވަަނަ އަށް ޖެހިލައިފި އެވެ.

ބްރެންޓްފޯޑުގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު އާސެނަލް އިން ކާމިޔާބު ކުރީ 3-1 އިންނެވެ. މެޗުގައި ބެރެންޓްފޯޑުން ލަނޑު ޖަހައި ކުރި ހޯދާފައި ވަނިކޮށް، އާސެނަލް އިން ވަނީ ފަހަތުން އަރައި ތިން ލަނޑު ޖަހައިގެން މެޗުން މޮޅުވެފަ އެވެ.

މެޗު ފަށައިގެން 13 ވަނަ މިނެޓުގައި ބްރެންޓްފޯޑަށް ލީޑު ނަގައިދިނީ ބްރަޔަން އެމްބެއުމޯ އެވެ. ނަމަވެސް ފުރަތަމަ ހާފުގެ 29 ވަނަ މިނެޓުގައި ގަބްރިއަލް ޖީސޫސް ޖެހި ލަނޑުން އާސެނަލް ވަނީ މެޗުގެ ނަތީޖާ ހަމަހަމަ ކޮށްފަ އެވެ. މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި މިކޭލް މެރިނޯ ޖެހި ލަނޑުން އާސެނަލް ވަނީ ލީޑު ހޯދއިފަ އެވެ. އަދި އޭގެ ތިން މިނެޓު ފަހުން ގަބްރިއެލް މާޓިނެލީ ވަނީ އާސެނަލްގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ.

މޮޅާއެކު އާސެނަލް ލީގު ތާވަލްގެ ދެ ވަނައިގައި އޮތީ މިހާތަނަށް ކުޅުނު 19 މެޗުން 39 ޕޮއިންޓާ އެކު އެވެ. އާސެނަލަށް ވުރެ އެއް މެޗު މަދުން ކުޅެފައިވާ ލިވަޕޫލަށް އެއް ވަނައިގައި ލިބެނީ 45 ޕޮއިންޓެވެ. ތިން ވަަނައިގައި ނޮޓިންހަމް ފޮރެސްޓު އޮތްއިރު، ހަތަރު ވަނައިގައި އޮތީ ޗެލްސީ އެވެ. ފަސް ވަނައިގައި ނިއުކާސަލް ޔުނައިޓެޑު އޮތްއިރު، އެންމެ ފަހުގެ ޗެމްޕިއަން މެންޗެސްޓަރ ސިޓީ އޮތީ ހަ ވަނައިގަ އެވެ.