ވަގު ގޯތީގެ މައްސަލަ - ފަޒުލްއާއި ފަޒީލް ފިޔަވައި 9 މީހެއްގެ ޕާސްޕޯޓް ދޫކޮށްލައިފި

ހައުސިންގ ޑިވަލަޕްމަންޓް ކޯޕަރޭޝަން (އެޗްޑީސީ) މެދުވެރިކޮށް ވަގު ގޯތިތަކަށް ދިން މައްސަލައިގައި ފުރުން މަނާކޮށް ޕާސްޕޯޓް ހިފެހެއްޓި 9 މީހެއްގެ ޕާސްޕޯޓް ދޫކޮށްލައިފިއެވެ.

ފުލުހުން ބުނީ ބިންވެރިޔާ ހައުސިންގ ސްކީމާ ގުޅުންހުރި މައްސަލައާ ގުޅިގެން، ކުރިން ރާއްޖެއިން ބޭރަށް ދަތުރު ކުރުން މަނާކުރި މީހުންގެ ތެރެއިން 9 މީހެއްގެ މައްޗަށް ނެރެފައިވާ އަމުރު ވަނީ ބާޠިލު ކޮށްފައިވާ ކަމަށެވެ. އަދި މި ފިޔަވަޅު އަޅާފައިވަނީ ޕްރޮސެކިއުޓަރ ޖެނެރަލްއާ މަޝްވަރާކޮށް، ޕްރޮސެކިއުޓަރ ޖެނެރަލްގެ ލަފާގެ މަތިން ކަމަށް ފުލުހުން ބުނެއެވެ.

Advertisement

ފުލުހުން ބުނީ ދަތުރު ކުރުން މަނާ ކުރުމުގެ އަމުރު ބާޠިލު ކުރި މީހުންގެ ތެރޭގައި އެޗްޑީސީގެ ކުރީގެ މެނޭޖިންގ ޑިރެކްޓަރު އިބްރާހިމް ފަޒުލް ރަޝީދު އާއި އެމްޑަބްލިއުއެސްސީގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު ފަޒުލް ރަޝީދު ނުހިމެނޭ ކަމަށެވެ.

ބިންވެރިޔާ ސްކީމް ގޯތީގެ ވައްކަމާއި ގުޅިގެން 20 މީހެއްގެ ޕާސްޕޯޓު ހިފަހައްޓާފައިވެއެވެ. ޕާސްޕޯޓް ހިފެހެއްޓި މީހުންގެ ތެރޭގައި ފަޒުލްއާއި ފަޒީލްގެ އިތުރުން ކުރީގެ ހައުސިންގ މިނިސްޓްރީގެ ސިޔާސީ މަގާމު ގައި ތިބި 2 މުވައްޒަފަކާއި، މިހާރުގެ ހައުސިންގ މިނިސްޓްރީގެ 2 މުވައްޒަފުން ހިމެނެއެވެ. އޭގެ އިތުރުން އެޗްޑީސީގެ ބޯޑު މެމްބަރުންނާއި އެޗްޑީސީ ގެ މުވައްޒަފުން ހިމެނެއެވެ. މީގެ ތެރޭގައި ފަޒުލް ގެ ބޭބެ އަށް ގަވައިދާ ޚިލާފަށް ދިން ގޯތީގެ ވަށާފާރު ރޭނުމުގެ ހުއްދަ އަށް އެދުމުން އެ ގޯތީގެ ވެރިފަރާތް ސާފު ކުރަން އެޗްޑީސީ އިން ހައުސިންގ މިނިސްޓްރީ އަށް ފޮނުވި ސިޓީގައި ސޮއިކޮށްފައިވާ ޑެޕިއުޓީ ޑިރެކްޓަރ އަހްމަދު އައިމަން ވެސް ހިމެނެއެވެ.

މިމައްސަލަ ޖީނާއީ މައްސަލައެއްގެ ގޮތުގައި ތަހުގީގު ކުރަމުންދާއިރު، ގިނަ ތުހުމަތުތަކެއް އެޗްޑީސީގެ އެމްޑީ ފަޒުލްއަށް ވަނީ ކުރެވިފައެވެ. ނަމަވެސް ފުލުހުން ބުނެފައިވަނީ ފަޒުލްގެ މައްޗަށް މިހާތަނަށް އެއްވެސް ތުހުމަތެއް ނުކުރާ ކަމަށެވެ.

ބިންވެރިޔާ ސްކީމްގެ ހިޔާނާތާއި ގުޅިގެން ފުލުހުން ކުރިއަށް ގެންދާ ތަހުގީގުގެ ތެރެއިން އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދުގެ ފޯނު ވެސް ވަނީ ހިފަހައްޓާފައެވެ. އޭނާގެ ފޯނު ހިފެހެއްޓީ މި މަހުގެ 25 ވަނަ ދުވަހުއެވެ.

މީގެ އިތުރުން އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ދިރިއުޅޭ، މ. ޒޭވަރު 23 ޑިސެންބަރު 2024 ވީ ހޯމަ ދުވަހުގެ ރޭގެ ވަގުތެއްގައި ފުލުހުން ވަނީ ބަލާ ފާސްކޮށްފައެވެ. އަދި އެ ގެ ބަލައި ފާސްކުރުމުގެ ތެރޭގައި ބައެއް އިލެކްޓްރޯނިކް އައިޓަމްތައް ފުލުހުންގެ ބެލުމުގެ ދަށަށް ގެނެވިފައިވާކަމަށެވެ.

މީގެ އިތުރުން މި މައްސަލައާއި ގުޅިގެން އެޗްޑީސީގެ 15 މުވައްޒަފަކު ވަޒީފާއިން ވަކިކުރުމަށްފަހު ވަނީ އަލުން ވަޒީފާ އިއާދަކޮށްދީފައެވެ.

ހުޅުމާލެއިން "ބިންވެރިޔާ" ސްކީމްގެ ދަށުން ޝަރުތު ހަމަނުވާ ބަޔަކަށް ގޯތިތަކެއް ވަގަށް ދިން މައްސަލަ ފަޅާ އެރުމާއެކު، އެޗްޑީސީ ގެ ތެރެއިން ހިނގަމުންދާ ވައްކަމާ، ޚިޔާނާތާއި މަކަރު ހީލާތް ހެދުމުގެ އެތައް ކަމެއް ދަނީ ފެންމަތިވަމުންނެވެ.

ކުރީގެ މިނިސްޓްރީ އޮފް ނޭޝަނަލް ޕްލޭނިންގ، ހައުސިން އެންޑް އިންފްރާސްޓްރަކްޗަރގެ ނަމުގައި މި ސަރުކާރުގެ ތެރޭގައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން "ބަންޑާރަ ގޯތީގެ ރަޖިސްޓަރީ" ގެ ވަގު ޑޮކިއުމެންޓް ހަދައިދިންކަން ކަށަވަރުވެ، އެޗްޑީސީ އަށް ކޮރަޕްޝަންގެ ގިނަ ތުހުމަތުތަކެއް ކުރެވިފައި ވަނިކޮށް އެޗްޑީސީގެ މެނޭޖިން ޑިރެކްޓަރ ފަޒުލް ރަޝީދު އިސްތިއުފާ ދެއްވުމުން އާ މެނޭޖިން ޑިރެކްޓަރ ކަމަށް މައުރޫފް ޖަމީލު ވަނީ އައްޔަން ކޮށްފައެވެ.