ވެނެޒިއާ ބަލިކޮށް، ލީގު ރޭހުގައި ނަޕޯލީން ވިއްދާފައި
ލީގު ތާވަލްގެ އެއް ވަަނައިގައި އެޓަލަންޓާ އޮތީ 18 މެޗުން 41 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި ނަޕޯލީ އަށް ވެސް ލިބެނީ 41 ޕޮއިންޓެވެ.
ނަޕޯލީ އާއި ވެނެޒިއާ ކުޅުނު މެޗުގެ ތެރެއިން
އިޓާލިއަން ލީގުގައި ވެނެޒިއާއާ ދެކޮޅަށް ކުޅުނު މެޗުން މޮޅުވެ، ނަޕޯލީން ލީގު ރޭހުގައި ވިއްދައިފި އެވެ.
ނަޕޯލީގެ އަމިއްލަ ދަނޑުގައި ވެނެޒިއާއާ ދެކޮޅަށް ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. މެޗުގައި ނަޕޯލީން ލަނޑު ޖެހީ ވެސް ދެ ވަނަ ހާފުގަ އެވެ. މެޗުގައި ނަޕޯލީން ރަނގަޅަށް ކުޅެފައިވާއިރު، އެ ޓީމުން ވަނީ ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ. އަދި ވެނެޒިއާ އިން ވެސް ވަނީ މެޗުގައި ލަނޑު ޖެހުމަށް ފުރުސަތުތަކެއް ތަނަވަސްކޮށްފަ އެވެ.
މެޗުގެ ފުރަތަމަ ހާފުގައި ނަޕޯލީ އަށް ވަނީ ޕެނަލްޓީއެއް ލިބިފަ އެވެ. އެއީ ވެނެޒިއާގެ ގޯލު އޭރިޔާ ތެރެއިން ނަޕޯލީގެ ކްވިޗާ ކްވަރަޝްކޭލިއާ އަށް ކުރި ފައުލަކަށް ރެފްރީ ދިން ޕެނަލްޓީ އެކެވެ. ޕެނަލްޓީގައި ނަޕޯލީގެ ރޮމެލޫ ލުކާކޫ ފޮނުވާލި ބޯޅަ ވެނެޒިއާގެ ގޯލު ކީޕަރު ވަނީ މަތަކޮށްފަ އެވެ. މެޗުގެ ދެ ވަނަ ހާފުގައި ނަޕޯލީ އަށް ލީޑު ނަގައިދިނީ ޖިއާކޮމޯ ރަސްޕަޑޯރީ އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ.
މޮޅާއެކު ނަޕޯލީން ވަނީ އެއް ވަނައިގައި އޮތް އެޓަލަންޓާގެ ފުލުގައި ވިއްދައިފަ އެވެ. ލީގު ތާވަލްގެ އެއް ވަަނައިގައި އެޓަލަންޓާ އޮތީ 18 މެޗުން 41 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި ނަޕޯލީ އަށް ވެސް ލިބެނީ 41 ޕޮއިންޓެވެ.
