އާސެނަލް ބޭނުން ވަނީ، އިނގިރޭސި ޕްރިމިއާ ލީގު ތާވަލްގެ އެއް ވަނަ މަގާމުގައި އޮންނަން ކަމަށް އެ ޓީމުގެ ކޯޗު މިކޭލް އާޓެޓާ ބުނެފި އެވެ.
އާޓެޓާ މިހެން ބުނީ ލީގުގައި އިޕްސްވިޗް ތައުންއާ ދެކޮޅަށް އާސެނަލް އިން ކުޅުނު މެޗަށްފަހު ނޫސްވެރިންނާ ވާހަކަ ދައްކަމުންނެވެ. އެ މެޗުން މޮޅުވެ، އާސެނަލް އިން ވަނީ ލީގު ތާވަލްގެ ދެ ވަނަ އަށް ޖެހިލައިފަ އެވެ.
އޭނާ ބުނީ މެޗުގެ ފުރަތަމަ ހާފުގައި އާސެނަލްގެ ކުޅުންތެރިންގެ ފަރާތުން ފެނުނީ ވަރަށް ރަނގަޅު ކުޅުމެއް ކަމަށެވެ. އެގޮތުން އާސެނަލް އިން ކުޅެމުން ދިޔައީ މެޗުގެ ކޮންޓްރޯލް ފުރިހަމަ އަށް ހިފަހައްޓައިގެން ކަމަށާއި، އާސެނަލަށް އިތުރު ލަނޑުތަކެއް ޖެހޭނެ ކަމަށް ޤަބޫލު ކުރާ ކަމަށް ވެސް އާޓެޓާ ބުންޏެވެ. ނަމަވެސް، މެޗުގެ ދެ ވަނަ ހާފުގައި އާސެނަލްގެ ކުޅުން ކޮންމެ ވެސް ވަރަކަށް ދަށްވީއިރު، އެ ހާފުގައި އިޕްސްވިޗް ޓައުން ފެނުނީ ވަރަށް ވަރުގަދަކޮށް ކަމަށް ވެސް އާޓެޓާ ވަނީ ބުނެފަ އެވެ.
އެ މެޗުގައި އާސެނަލް އިން ކުޅުނީ އެ ޓީމަށް ކުޅެމުން އަންނަ އިންގްލެންޑުގެ ބުކަޔޯ ސަކާ ނުލަ އެވެ. ސަކާ އަށް ލިބުނު އަނިޔާގެ ސަބަބުން، ގިނަ ދުވަސްތަކެއް ވަންދެން އޭނާ ކުޅުމާ ދުރުގައި ހުންނަން ޖެހޭނެ ކަމަށް ވަނީ އަންދާޒާ ކުރެވިފަ އެވެ. އެކަމަށް އިޝާރާތް ކުރަމުން އާޓެޓާ ބުނީ، ސަކާ ނެތި ނަމަވެސް އާސެނަލްގެ ކުޅުން ވަރަށް ރަނގަޅަށް ފެނުނު ކަމަށެވެ. ނަމަވެސް ކުރިޔާ ބަލާއިރު ތަފާތުތަކެއް ހުންނާނެކަން ފާހަގަކުރަމުން އާޓެޓާ ބުނީ، އެކަން ދެ ވަނަ ހާފުގައި ވަރަށް ބޮޑަށް ފާހަގަވެފައިވާ ކަމަށެވެ. މިހާރު އާސެނަލް ކުޅެމުން އަންނަ ގޮތަކީ އައު ގޮތެއް ކަމަށާއި، އެކަމަށް ހޭނެން ކުޅުންތެރިންނަށް ވަގުތު ނަގާނެ ކަމަށް ވެސް އާޓެޓާ ވަނީ ފާހަގަކޮށްފަ އެވެ.
މީގެ އިތުރުން އާޓެޓާ ބުނީ އާސެނަލަށް ކޮންމެ ވެސް ވަރެއްގެ އުނދަގޫތަކެއް މިފަހަރު ކުރިމަތިވާ ކަމަށެވެ. މެޗުތަކުގައި 10 ކުޅުންތެރިންނާ އެކު ކުޅެން ޖެހުމާއި، އެ ޓީމުގެ ކުޅުންތެރިންނަށް ލިބެމުން އައި އަނިޔާ އަށް ބަލާއިރު، އެ ޓީމު އޮތީ ރަނގަޅު ޙާލަތެއްގައި ކަމަށް ވެސް އާޓެޓާ ބުނެފައިވެ އެވެ. އެހެން ނަމަވެސް، މިއީ އާސެނަލް އެންމެ ބޭނުންވާ ހިސާބު ނޫން ކަމަށާއި، އެ ޓީމު ބޭނުން ވަނީ ލީގު ތާވަލްގެ އެއް ވަނައިގައި އޮންނަން ކަމަށް ވެސް އާޓެޓާ ވަނީ ބުނެފަ އެވެ.
ލީގުގައި މިހާތަނަށް ކުޅުނު 18 މެޗުން 36 ޕޮއިންޓާ އެކު އާސެނަލް އޮތީ ދެ ވަނައިގަ އެވެ. ހަމަ އެ އަދަދަށް މެޗު ކުޅެގެން ތިން ވަނައިގައި ޗެލްސީ އަށް ލިބެނީ 35 ޕޮއިންޓެވެ. މި ދެ ޓީމަށް ވުރެ އެއް މެޗު މަދުން ކުޅެފައިވާ ލިވަޕޫލަށް އެއް ވަނައިގައި ލިބެނީ 42 ޕޮއިންޓެވެ.
