އިޕްސްވިޗް ޓައުން އަތުން މޮޅުވެ، އާސެނަލް ދެ ވަނަ އަށް

އިނގިރޭސި ޕްރިމިއާ ލީގުގައި އިޕްސްވިޗް ޓައުންއާ ދެކޮޅަށް ކުޅުނު މެޗުން މޮޅުވެ، އާސެނަލް އިން ލީގު ތާވަލްގެ ދެ ވަނަ އަށް ޖެހިލައިފި އެވެ.

އާސެނަލްގެ އެމިރޭޓްސް ސްޓޭޑިއަމްގައި ހުކުރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. މެޗުގައި އާސެނަލް އިން އެ ޓީމުގެ ހަމައެކަނި ލަނޑު ޖެހީ ވެސް ފުރަތަމަ ހާފުގަ އެވެ.

މެޗު ފަށައިގެން ކުރީ ކޮޅު އާސެނަލްގެ ޔޫރިއެން ޓިމްބާ ފޮނުވާލި ބޯޅަ އިޕްސްވިޗް ޓައުންގެ ގޯލު ކީޕަރު ވަނީ މަތަކޮށްފަ އެވެ. އޭގެ ފަހުން މެޗުގެ ފުރަތަމަ ހާފުގެ 23 ވަނަ މިނެޓުގައި އާސެނަލަށް ލީޑު ނަގައިދިނީ ކައި ހަވާޓްޒް އެވެ. އެއީ ލިއާންޑްރޯ ޓްރޮސާޑް ހުރަސްކޮށްދިން ބޯޅައެއް އޭރިޔާ ތެރޭގައި ހުރެ ގޯލަށް ފޮނުވާލައިގެން ހަވާޓްޒް ޖެހި ލަނޑެކެވެ. އޭގެ ފަހުން ވެސް މެޗުގައި އާސެނަލަށް ވަނީ އިތުރު ލަނޑު ޖަހާނެ ފުރުސަތު ވެސް ލިބިފަ އެވެ. އާސެނަލަށް ލިބުނު ކޯނަރެއްގައި ގަބްރިއަލް ޖީސޫސް ބޮލުން ފޮނުވާލި ބޯޅަ ގޯލާ އަމާޒުވާ ގޮތެއް ނުވި އެވެ.

މޮޅާއެކު އާސެނަލް ދެ ވަނައިގައި އޮތީ މިހާތަނަށް ކުޅުނު 18 މެޗުން 36 ޕޮއިންޓާ އެކު އެވެ. ދެ ވަނައިގައި ޗެލްސީ އަށް 35 ޕޮއިންޓު ލިބެނީ ވެސް 18 މެޗުންނެވެ. އާސެނަލަށް ދެ ވަނަ އަށް ޖެހިލުމުގެ ފުރުސަތު ލިބުނީ، އެންމެ ފަހުން ފުލަމްއާ ދެކޮޅަށް ކުޅުނު މެޗުން ޗެލްސީ ބަލިވުމުންނެވެ.