ސުޕްރީމް ކޯޓުން ޖިހާދުގެ މައްސަލަ ބަލައިގަނެފައި އޮއްވާ ހައިކޯޓުގެ ފަނޑިޔާރުންގެ ބެންޗުން ވެސް އެ މައްސަލަ އަލުން ހުށަހެޅުމުގެ ހުއްދަ ދީފިއެވެ.
ޕްރޮސެކިއުޓަރ ޖެނެރަލްގެ އޮފީހުން ބުނީ ކުރީގެ ނައިބު ރައީސް އަދި ޑރ. މުއިއްޒުގެ ސަރުކާރުން މޯލްޑިވްސް އިންޓަނޭޝަނަލް ފައިނޭންޝަލް ސާވިސަސް އޮތޯރިޓީގެ ޗެއަރޕާރސަން ކަމަށް އައްޔަން ކުރެއްވި އަބްދުﷲ ޖިހާދުގެ މައްޗަށް ދައުލައުތުން ކޮށްފައިވާ ދަޢުވާގެ މައްސަލަ ހައިކޯޓުން ބަލައިނުގަތުމުން އެ މައްސަލަ ސުޕްރީމް ކޯޓަށް ހުށަހަޅާފައިވާ ކަމަށެވެ. އަދި ސުޕްރީމް ކޯޓަށް މައްސަލަ ހުށަހަޅާފައި އޮއްވާ، ހައިކޯޓުގެ ފަނޑިޔާރުންގެ ބެންޗުންވެސް އެ މައްސަލަ އަލުން ހުށަހެޅުމުގެ ހުއްދަ ދީފައިވާ ކަމަށެވެ.
ޕީޖީ އޮފީހުން ބުނީ ހައިކޯޓުގެ ފަނޑިޔާރުންގެ ބެންޗުން އެ ހުއްދަ ދިނުމާއެކު، މައްސަލަ އަލުން ހުށަހެޅުމަށްޓަކައި ކުރަންޖެހޭ ކަންކަން ކުރަމުން އަންނަ ކަމަށާއި، މި ހަފްތާ ތެރޭގައި ހައިކޯޓަށް މައްސަލަ އަނބުރާ ވައްދާނެ ކަމަށެވެ.
ޖިހާދުގެ މައްޗަށް ދައުވާކުރަނީ 2013 ވަނަ އަހަރު އޭނާ ފިނޭންސް މިނިސްޓަރަކަށް ހުންނެވިއިރު ފުށިދިއްގަރުފަޅުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވުމުގައި ދައުލަތަށް ފައިދާނުވާ ގޮތަށް އަމަލުކުރެއްވި ކަމަށް ބުނެއެވެ. އެ މައްސަލާގައި ޖިހާދުގެ މައްޗަށް ކުރަނީ ދައުލަތަށް ފައިދާވާން އޮތް ކަމެއްގައި އެ ނޫން ގޮތަކަށް އަމަލުކުރުމުގެ ދައުވާއެވެ.
ޖިހާދުގެ މައްސަލަ ހައިކޯޓަށް ހުށަހެޅީ، ކްރިމިނަލް ކޯޓުން އެ މައްސަލަ ނުބެލޭނެކަމަށް ބުނެ މައްސަލަ ބޭރުކޮށްލުމުންނެވެ. އަދި ހައިކޯޓަށް ހުށަހެޅި މައްސަލައިގައި ޖިހާދަށް ޗިޓް ރައްދު ނުކުރެވިގެން އެ މައްސަލަ ކޯޓުން ބޭރުކޮށްލިއެވެ. އަދި ފަހުން އެ މައްސަލަ ހުށަހެޅުމުން ހައިކޯޓުން ޕީޖީ އަށް ދިން މުއްދަތު ހަމަވެފައިވާ ކަމަށް ބުނެ ކޯޓުން ދެވަނަ ފަހަރަށް މައްސަލަ ބޭރުކޮށްލިއެވެ. އަދި ފަހުން އެ ނިންމުން މުރާޖާ ކުރުމަށް ފަނޑިޔާރުންގެ މަޖިލީހަށް ހުށަހެޅުމުން އެ މައްސަލަ ބަލައިގަންނަން ފެންނަ ކަމަށް ނިންމީ އެންމެ ފަނޑިޔާރެކެވެ.
ޖިހާދުގެ މައްޗަށް ދައުލަތުން ދައުވާކުރާ މައްސަލަ ކްރިމިނަލް ކޯޓުން ނުބެލޭނެ ކަމަށް ބުނެ ބޭރުކޮށްލުމުން ޕީޖީ އިން ހައިކޯޓަށް ހުށަހެޅީ އެ މައްސަލަ ކްރިމިނަލް ކޯޓުން އަލުން ބަލަން އަމުރުކޮށް ދިނުމަށެވެ.
ޕީޖީ އޮފީހުން މައްސަލަ އިސްތިއުނާފް ކުރީ ކްރިމިނަލް ކޯޓުގެ ނިންމުން ބިނާކުރި އަސާސެއް ނެތުމާއި އެކަށީގެންވާ މިންވަރަށް ސަބަބު ބަޔާން ކޮށްފައި ނެތުމުން ކަމަށް ބުނެއެވެ. އިސްތިއުނާފް މައްސަލަ ބަލައިނުގަތުމަށް ހައި ކޯޓުގެ ރަޖިސްޓްރާ ނިންމެވުމާ ގުޅިގެން އެ ނިންމުން ފަނޑިޔާރުންގެ މަޖިލީހަށް ހުށަހެޅުމުން މައްސަލަ ބަލައިގަންނަން ޖެހޭނެ ކަމަށް ނިންމެވީ ފަނޑިޔާރު ހަސަން ޝަފީއު އެކަންޏެވެ.
ފަނޑިޔާރުންގެ މަޖިލީހުގެ އަޣުލަބިއްޔަތުގެ ރައުޔަކީ ހައިކޯޓުގެ ރެޖިސްޓަރަރ މައްސަލަ ބަލައި ނުގަންނަން ނިންމީ ރަނގަޅަށް ކަމަށެވެ. އެ ގޮތުން ފަނޑިޔާރު ހުޒައިފާ މުހައްމަދު އަދި ދީބާނާޒް ފަހުމީ ނިންމެވީ، މައްސަލަ ބަލައި ނުގަތުމަށް ނިންމީ ރަނގަޅަށް ކަމަށެވެ.
