ވަގަށް ގޯތި ދިން ފަޒީލް އާ ދުވަހަކު ވެސް ބައްދަލުވެފައެއް ނުވޭ: އަކްރަމް

ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވަގަށް ގޯތި ދިން އެ ކޯޕަރޭޝަންގެ މެނޭޖިންގ ޑިރެކްޓަރ ފަޒުލް ރަޝީދުގެ ބޭބެ ފަޒީލް ރަޝީދު އާ ދުވަހަކު ވެސް ބައްދަލުވެފައި ނުވާ ކަމަށް ކުރީގެ ހައުސިންގ މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވެއްޖެއެވެ.

އަކްރަމް މިހެން ވިދާޅުވީ، މި މައްސަލަ އާ ގުޅިގެން ހުކުރު ވިލޭރޭ ފުލުހުން ބޭއްވި ނޫސް ކޮންފަރެންސެއްގައި ފަޒީލް އާއި އަކްރަމް އާ ބައްދަލުވިކަން ތަހުގީގުން އެނގޭ ކަމަށް އެސިސްޓެންޓް ކޮމިޝަނަރ އޮފް ޕޮލިސް އަބްދުﷲ ޝަރީފް ވިދާޅުވެފައި ވަނިކޮށްނެވެ.

ފުލުހުން ކުރިއަށް ގެންދާ ތަހުގީގާ ގުޅޭ ގޮތުން ނޫސްވެރިންނަށް މައުލޫމާތު ދެއްވަމުން އެސިސްޓެންޓް ކޮމިޝަނަރ ވިދާޅުވީ، ފަޒީލް ގޯއްޗަށް ޝަރުތު ހަމަ ނުވުމުން "ޝަކުވާ ހިފައިގެން އަކްރަމް އާ ބައްދަލު ކުރި ކަމަށް" ފަޒީލް ބުނެފައިވާ ކަމަށެވެ.

އަކްރަމް އެކްސް ގައި ހުކުރު ދުވަހު ކުރެއްވި ޕޯސްޓެއްގައި ވިދާޅުވީ، އެޗްޑީސީގެ މެނެޖިންގ ޑިރެކްޓަރު އިސްވެ ހުރެ، އުސޫލުން ބޭރުން ހުޅުމާލެއިން ގޯތިތަކެއް ދޫކުރި މައްސަލަ ފެންމަތިވުމުން، އާންމުންގެ ސަމާލުކަން އަނބުރައިލުމަށް ސަރުކާރުން ކުރަމުންގެންދާ ކަންކަމުގެ ތެރެއިން ރޭގައި ފުލުހުން ބޭއްވީ "ސިޔާސީ ނޫސް ކޮންފަރެސެއް" ކަމުގައެވެ.

"ފުލުހުން އެ ބުނާ ފަޒީލްއާ އަޅުގަނޑާ ދުވަހަކުވެސް ބައްދަލުވެފައި ނުވެއެވެ. އަދި، އެއްވެސް މުއާމަލާތެއް ވެސް އޭނާއާ ކޮށްފައި ނުވާނެއެވެ. އެއްވެސް ކަމެއްގައި ބައްދަލު ކުރަން އޭނާ އެދިފައެއްވެސް ނުވެއެވެ." އަކްރަމް ވިދާޅުވިއެވެ.

އަކްރަމް އިތުރަށް ވިދާޅުވީ، އެގްރީމަންޓެއް ކަމަށް ދެއްކުމަށް ޓަކައި ތައްޔާރުކޮށްފައިވާ ޑޮކިއުމަންޓަކާ މެދު ސުވާލު އުފެދުމުން ވެސް، އެ ޑޮކިއުމަންޓްގެ ސައްހަކަން ކަށަވަރުކުރުމަށް ފޮރެންސިކް ތަހުލީލެއް ވެސް ނުހަދައި، ކުރީ ސަރުކާރުން ދޫކުރި ލިޔުމެއްގެ ގޮތުގައި (ފުލުހުން) އެވާހަކަ ދެއްކީ ރައްޔިތުންނަށް ހަގީގަތް އޮޅުވާލުމަށް ކަމަށް ދެކޭ ކަމަށެވެ.

"ބިންވެރިޔާ އަދި ގެދޮރުވެރިޔާ ސްކީމްގެ ދަށުން އެއްވެސް ލިޔުމެއް އުސޫލުން ބޭރުން ނުވަތަ ގަވާއިދާ ހިލާފަށް ނުވަތަ ނުރަސްމީކޮށް އެއްވެސް ފަރާތަކަށް ކުރީގެ ހައުސިންގ މިނިސްޓްރީން ދޫކޮށްފައި ނުވާނެކަމުގެ ޔަގީންކަން އަރުވަމެވެ." އަކްރަމް ވިދާޅުވިއެވެ.