ތަހުގީގު ކުރަން ބޭރުން ޓީމު ނުގެންނަނީސް ތަން ސާފުކޮށް ދޮވެލައިފި! މިއީ ހެކި ނައްތާލުން ނޫން ދެން ކޮންކަމެއް؟

ބުރާސްފަތި ދުވަހު ހައުސިން މިނިސްޓްރީ ހިންގަމުން އައި އިމާރާތުގައި އަލިފާން ރޯވެ، އެ މިނިސްޓްރީއާއެކު އިތުރު 4 އޮފީހެއް އަނދާ ހުލުވި ދައުލަތުގެ އެތައް މުހިންމު ލިޔެ ކިޔުމެއް ވަނީ ގެއްލިފައެވެ. މިއާއެކު ދެން އުފެދެންފެށި ސުވާލަކީ، އަލިފާން ކޮންޓްރޯލް ނުވެ ދައުލަތުގެ 5 މުއައްސަސާއެއް އަނދާ އަޅިއަށްވާން ދޫކޮށްލީ ކީއްވެގެން ހެއްޔެވެ.

ބައެއް ފަރާތްތަކުން އުފައްދާ ސުވާލަކީ މިއީ ރޭވިގެން ކުރިކަމެއްގެ ވާހަކައެވެ. ރޯވި ހައުސިންގ މިނިސްޓްރީގެ ސަރވަރއެއްވެސް އަދި ލިޔެކިޔުމެއްވެސް ސަލާމަތް ނުވާއިރު، އެތަނުން އަދާ ހުލިވީ މިހާރު އޭސީސީގައި ތަހުގީގުކުރުމަށް އެދި ހުށަހަޅާފައި ހުރި މައްސަލަތަކާއި ގުޅޭ ލިޔެކިޔުންތަކެވެ. އާންމުން އުފައްދާ ސުވާލަކީ ވެރިކަމުގައި ތިބެގެން މިއީ ބަޔަކު ހެކި ނައްތާލަން ކުރިކަމެއްތޯއެވެ.

ކޮންމެއަކަސް ތަން އަނދާ ހުލިވެއްޖެއެވެ. ނަމަވެސް އެމްއެންޑީއެފުން ކުރިއަށްގެންދިޔަ އޮޕަރޭޝަން ކާމިޔާބެވެ. އަދި ކުޅިބަލަން ވަޑައިގެންނެވި ބޭބޭފުޅުންގެ ހިތަށް ފިނިކަންވެސް ގެނުވައިފިއެވެ. ހައުސިންގ މިނިސްޓްރީގެ ބޮޑު ހުޅާއެކު އެތަކެއް ސުވާލެއްގެ ޖަވާބެއް ނުލިބި ފުނިފުންޏަށް ސުވާލުތައްދަނީ ޖެހެމުންނެވެ. ނަމަވެސް މި ސުވާލުތަކަށް ދޭނެ ޖަވާބުތައްވެސް ހުރީ އަނދައިގެން ދިޔަ މިނިސްޓްރީގައެވެ.

މިނިސްޓްރީގައި ރޯވީތޯ ނުވަތަ ރޯކޮށްލީތޯ ކުރެވޭ ސުވާލުގައި، އެތަނުގައި ރޯވިކަމަށް ވުރެ ބޮޑަށް މިއީ ރޭވިގެން ގަސްތުގައި ރޯކޮށްލިކަމަށް ބުނެވޭނެ ޖަގާބޮޑުކަމެކެވެ. މިހެން މި ވާހަކަ ދައްކަން ޖެހެނީ ސަބަބުތަކެއް ވެސް ހުރެގެންނެވެ. ތަނެއްގައި ރޯވީމާ އެތަނެއްގައި ރޯވި ގޮތް ހޯދަނީ ރޯވިތަން ސާފުކުރުމަށްފަހުގައެއް ނޫނެވެ. ރޯވި ސަބަބު ދެނެގަންނަނީ އެތަނެއް އޮތްގޮތަށް ބާއްވައިގެން ތަހުލީކޮށްގެންނެވެ.

ނަމަވެސް ދައުލަތުގެ އެތައް ލިޔެކިޔުމެއް އަނދާ އަޅިއަށްވެ، އެތައް ކޮރަޕްޝަންގެ މައްސަލައެއްގެ ހެކިތައް ހުރިތަނެއް އަނދާ ހުލިވުމުން، އެތަން ރޯވި ސަބަބު ހޯދަނީ އެތަން ސާފުކޮށްގެންނެވެ. ތަހުގީގުކުރާނަމަ އެތަން ސާފުކޮށްގެންވެސް ނުވާނެއެވެ. އެތަނަށް ކޮންމެ ކޮންމެ ބަޔަކަށް ވަދެވިގެންވެސް ނުވާނެއެވެ. އަދި ބޭރުން މާހިރުން ގެނެސްގެސް ތަހުގީގުކުރާނަމަ އަމުދުން ސީން ރޫޅާލައިގެން ނުވާނެއެވެ. ސީން ރޫޅާލުމަކީ ހެކި ނައްތާލުމެވެ. ރޯވާން މެދުވެރި ސަބަބު ދެނެގަންނަން އޮތް މަގު ބަންދުކުރުމެވެ. މިއާއެކު ސުވާލު އުފެދެނީ ހަމަރޯވީތޯ ނުވަތަ ރޯކޮށްލީތޯއެވެ.

އަނދައިގެން ދިޔަ މިނިސްޓްރީތަކާ ގުޅޭ ގޮތުން އެކި ސަރުކާރުތަކުގައި ހިންގާފައިވާ ކޮރަޕްޝަންތަކުގެ ތަހުގީގަކަށް ދާއިރު، ބޭނުންވާ ހެކިތަކަށް ވެސް ދެން ފެންނާކަށް ނުހުންނާނެއެވެ. އަދި އެ ހެކިތައް ނައްތާލަން ކުރި ކަމެއްގެ ގޮތުގައި ރޯކޮށްލީ

އަލިފާނުގެ ހާދިސާ ތަހުގީގު ކުރުމަށް ރާއްޖެއިން ބޭރުން ޓީމެއް ގެންނަ ކަމަށް ފުލުހުން ބުނެފައިވެއެވެ. ނަމަވެސް ޓީމް އައުމުގެ ކުރިން ތަންސާފުކޮށް ސީން ރޫޅާލުމުން މި ހާދިސާގައިވެސް ދެން ފެންނާނެ އެއްޗެއް ނެތެވެ. ފިނިފެންމާ ލޯންޗުގެ ގޮއްވާލި ހާދިސާ ވެސް ބޭރުގެ ތިން ގައުމަކުން އައިސް ތަހުގީގު ކުރިއެވެ. ނަމަވެސް އެ ތަހުގީގުން ނުކުތް ނަތީޖާއެއްނެތެވެ. ހާދިސާގެ ސަބަބު ހޯދިފައިނުވަނީ އެބޭފުޅުންގެ އެހީތެރިކަން ހޯދިއިރު، ފުލުހުންގެ އަމިއްލަ ތަހުގީގަށް ހަނދާނެ ހުރިހާ ގޮތެއް ހަދާފައިވާތީއެވެ. މި އަލިފާނުގެ ހާދިސާގައި ވެސް މިހާރު މުޅި ސަރަހައްދު ސާފުކުރާއިރު، މިއީ ގަސްތުގައި ކުރި ކަމެއްނަމަ ތަން ސާފުކުރުމަކީ ހެކި ނައްތާލުމަށް ކުރަމުންދާ ކަމެކެވެ. މިއީ ރޭވި އިންތިޒާމްވެގެން ކުރަމުންދާ ކަމެކެވެ.