"އަލިފާނުގެ ހާދިސާގައި ގެއްލުނު ގިނަ ލިޔުންތައް ރިކަވަރ ވާނެ ކަމަށް ބެލެވޭ، ގެއްލުމުގެ ތަފްސީލް އެނގޭނީ އެސެސްމެންޓަށް ފަހު"

ބުރާސްފަތި ދުވަހު މާލޭގައި ހުންނަ ހައުސިންގ މިނިސްޓްރީ ހުރި ކޮށީގައި ހިނގި ބޮޑު އަލިފާނުގެ ހާދިސާ އާ ގުޅިގެން އެ ކޮށީގައި ހިނގަމުންދިޔަ މާލޭ ސިޓީގެ ރަށްވެހިކަމާއި ގޯތި ގެދޮރާއި ބެހޭ އޮފީހުގައި ހުރި ލިޔުންތަކުގެ ބޮޑުބައި އިއާދަކުރެވޭނެ ކަމަށް ބެލެވޭ ކަމަށާއި ލިބުނު ގެއްލުން އެނގޭނީ އެސެސްމެންޓެއް ހަދާ ނިމުމުން ކަމަށް މާލެ ސިޓީ ކައުންސިލްގެ މޭޔަރ އާދަމް އާޒިމް ވިދާޅުވެއްޖެއެވެ.

އަލިފާނުގެ ހާދިސާ އާ ގުޅިގެން އިނގިރޭސިވިލާތުގައި ހުންނަވާ ރާއްޖެޓީވީ އަށް ދެއްވި ބަސްދީގަތުމެއްގައި އާޒިމް ވިދާޅުވީ، ފުދޭވަރަކަށް ގިނަ ޑޮކިއުމެންޓްތައް ގެއްލުން ލިބުނު އިމާރާތުގައި ހުރި ކަމަށާއި އަލިފާނުގެ ސަބަބުން އިމާރާތައް ބޮޑު ގެއްލުމެއް ވެފައިވާ ކަމަށް އާޒިމް ވިދާޅުވިއެވެ. ނަމަވެސް ލިބިފައިވާ ގެއްލުމުގެ ތަފްސީލްތައް އެނގޭނީ ފުރިހަމަ އެސެސްމެންޓަކަށް ފަހުގައި ކަމަށް އޭނާ ވިދާޅުވިއެވެ.

އަލިފާން ހިފުމުގެ ކުރިންވެސް މާލެ ސިޓީ ކައުންސިލްގެ އިމާރާތަށް ވަނުމަށް ސިޓީ ކައުންސިލްގެ މުވައްޒަފުން މަސައްކަތް ކުރި ކަމަށާއި އެ ތަނުން ދުން އަރަމުން ދިއުމާއި ގުޅިގެން އެތަނަށް ވަންނަން މުވައްޒަފުންނަށް ފުރުސަތު ނުލިބުނީ ކަމަށް އާޒިމް ވިދާޅުވިއެވެ. އާޒިމް ވަނީ ޚިދުމަތްތައް އާދިއްތަ ދުވަހު ފެށޭނެ ކަމަށާއި ޚިދުމަތަށް ބުރު ނާރާނެ ކަމަށް ވިދާޅުވެފައެވެ. އަދި ޑޮކިއުމެންޓްތައް ރިކަވަރ ކުރެވޭނެ ގޮތެއް ހޯދަމުންދާކަމަށް އާޒިމް ވަނީ ވިދާޅުވެފައެވެ.

މާލެ ސިޓީ ކައުންސިލާއި ހަވާލުވި އިރު ލިޔެ ކިޔުން ބެލެހެއްޓުމުގެ ކަންކަން ހުރީ މުނިސިޕަލް ޒަމާނުއްސުރެ ކުރީގެ ގޮތަށް ކަމަށް އާޒިމް ވިދާޅުވިއެވެ.

އާޒިމް ވިދާޅުވީ، އަލިފާނުގެ ހާދިސާ ހިނގާފައި މި ވަނީ ލިޔުންތައް ޑިޖިޓަލްކޮށް ރެކޯޑް ބެލެހެއްޓުން ޒަމާނީ ފެންވަރަށް ބަދަލުކުރުމަށް މަސައްކަތްކުރަމުން ދަނިކޮށް ކަމަށެވެ.

އާޒިމް އިތުރަށް ވިދާޅުވީ މިހާ ޒަމާންވި އިރު ވެސް ލިޔެކިޔުންތައް މިގޮތަށް ބަލަހައްޓަމުން ދިއުމަކީ ވަރަށް ބޮޑު މައްސަލަ އެއްކަމަށް ޤަބޫލުކުރައްވާ ކަމަށެވެ. މާލެ ސިޓީ ކައުންސިލްހާ ހާލުގައި އޮތް ކައުންސިލެއް ނެތް ކަމަށާއި މި ހާދިސާ ހިނގާފައި ވަނީ ކައުންސިލުގެ ޚިދުމަތްތައް އެއްތަނަކުން ދިނުމަށް އާ އިމާރާތެއްގެ މަސައްކަތް އެކުލަވާލަމުން ދިޔަ ދަނޑިވަޅެއްގައި ކަމަށް އާޒިމް ވަނީ ވިދާޅުވެފައެވެ.

ބުރާސްފަތި ދުވަހު މާލޭގައި ހުންނަ ހައުސިންގ މިނިސްޓްރީ ހުރި ކޮށީގައި ހިނގި ބޮޑު އަލިފާނުގެ ހާދިސާ އާ ގުޅިގެން އެ ކޮށީގައި ހިނގަމުންދިޔަ މާލޭ ސިޓީ ކައުންސިލުގެ ރަށްވެހިކަމާއި ގޯތި ގެދޮރާއި ބެހޭ އޮފީހުން އެއްވެސް މީހެއްގެ ގޯތީގެ ރަޖިސްޓަރީ ގެއްލިއްޖެ ނަމަ ކުރެވޭނެ އެއްވެސް ކަމެއް ނޯންނާނެ ކަމަށް މާލޭ ސިޓީގެ ޑެޕިއުޓީ މޭޔަރ އަހްމަދު ނަރީޝް ވަނީ މީގެ ކުރިން ވިދާޅުވެފައެވެ.

އަލިފާނުގެ ހާދިސާގެ އަސަރު އެންމެ ބޮޑަށް ކުރި އިމާރާތުގައި ހައުސިންގ މިނިސްޓްރީ އާއި ކޮންސްޓްރަކްޝަން މިނިސްޓްރީ ވަނީ ހިނގަމުން އައިސްފައެވެ.

އޭގެ އިތުރުން އިމާރާތާއި އިންވެގެން ހުންނަ އެންވަޔަރަންމަންޓް މިނިސްޓްރީ ހިނގަމުން އަންނަ ގްރީން ބިލްޑިން އަށް އަލިފާން ގަނޑު ފެތުރި އެ އިމާރާތައްވެސް ވަނީ ގެއްލުން ލިބިފައެވެ.

މާލޭ ސިޓީ ކައުންސިލުގެ ގޯތި ގެދޮރާއި ރަށްވެހި ކަމާ ބެހޭ ޚިދުމަތްތައް ދެމުން އަންނަ ސެކްޝަން ވެސް ހިނގަމުން އައިސްފައިވަނީ އަލިފާނުގެ ހާދިސާ ހިނގި ބްލޮކްގައެވެ. އެއިމާރާތައް ވެސް އަލިފާނުގެ އަސަރުކޮށްފައި ވުމާއެކު އިމާރާތުގައި ހުރި ލިޔެކިޔުންތައް ރައްކައުތެރި ތަނަކަށް ބަދަލު ކުރުމުގެ މަސައްކަތް ވަނީ ކޮށްފައެވެ.