‎އިހުތިޖާޖުގައި ބައިވެރިވި ޓެކްސީތައް ފުލުހުންގެ ބެލުމުގެ ދަށަށް ގެންދަން ފަށައިފި

ބުރާސްފަތި ވިލޭރޭ ހުޅުމާލޭ ހައިވޭ ސަރަހައްދުގައި ކުރިއަށް ދިޔަ ޓެކްސީ ޑްރައިވަރުންގެ އިހުތިޖާޖުގައި ބައިވެރިވި ޓެކްސީތައް ފުލުހުންގެ ބެލުމުގެ ދަށަށް ގެންދަން ފަށައިފިއެވެ.

ބުދަ ދުވަހު ހަވީރުން ފެށިގެން ޓެކްސީ ޑްރައިވަރުން ވަނީ އެމީހުންގެ ކަންބޮޑުވުންތައް ސަރުކާރުން އަޑު ނާހާ ކަމަށްބުނެ ސުލްހަވެރި މުޒާހަރާއަށް ނުކުމެފައެވެ.

އިހުތިޖާޖުގައި ބައިވެރިވި ޓެކްސީތައް ފުލުހުންގެ ބެލުމުގެ ދަށަށް ގެންގޮސްފައިވާއިރު، ޓެކްސީތައް ގެންދާ ސަބަބު ސާފު ކުރަން ޑްރައިވަރުން އެދުމުން، ފުލުހުން ބުނީ އިދާރާ އަށް ޙާޟިރުވެ އެކަން ސާފު ކުރުމަށެވެ.

ފުލުހުން ޓެކްސީތައް ޓޯ ކުރަން ފެށީ އެއްވެސް އިންޒާރެއް ދިނުމެއް ނެތިއެވެ.

މިހާތަނަށް ވަނީ 20 އަށް ވުރެ ގިނަ ޓެކްސީތައް ފުލުހުންގެ ބެލުމުގެ ދަށަށް ގެންގޮސްފައިވެއެވެ.

ރާއްޖެއެމްވީ އާއި ވާހަކަ ދައްކަމުން ޓެކްސީ ޑްރައިވަރަކު ބުނީ ކަންބޮޑުވުންތައް ފާޅުކޮށް އިހުތިޖާޖު ކުރިނަމަވެސް އަދި ސަރުކާރުގެ ފަރާތުން މިކަމާ ގުޅިގެން އެއްވެސް ބަހެއް ބުނެފައި ނުވާކަމަށެވެ.

އެހެންކަމުން މިކަމުގައި ކުރިއެރުމެއް ނުލިބޭ ކަމަށްވާނަމަ ކުރިއަށް އޮތްތާގައިވެސް އިހުތިޖާޖު ކުރިއަށްގެންދާނެ ކަމަށެވެ.

މީގެ އިތުރުން އޭނާ ބުނީ، ރާއްޖޭގެ އެއްވެސް ވެރިކަމެއްގައި ޓެކްސީ ދާއިރާގެ މީހުންނަށް މިހާ ޖެއްސުން ކޮށްފައި ނުވާކަމަށެވެ.